ماذا لو ؟؟
اختفت كتب التاريخ و الحكايات اللى اتحكى لينا عنها زمان
وما بقيناش عارفين حاجة عن اللى فات
واتحشيت عقولنا بحاجات
محددة على مزاج بعض الناس
طيب ما هو ده بيحصل فعلا من غير اختفاء
ما احنا عايشين فعلا مغيبين وبقينا تايهين
مش عارفين نصدق اللى اتقال وحكوه الاسلاف
بيشككوا فى كل حاجة اعتنقناها من زمان
قاصدين يمحوا اللى اتربينا عليه
ويبدلوه بكلام فارغ وهرى كتير
وقليلين اللى لسه مكملين وماشين باللى اتربوا عليه من غير ما يتلوثوا بالغزو الجديد
بس تخيل بقى جيل جديد يطلع ما يعرفش حاجة عن قصة الخلق وديه بداية النهاية بالتأكيد…
أصل اللى هنلمحه بيتكلم عليها على المحرقة هنوديه.. مفيش هنا حد هيتعلم تاريخ ولا دين..
هتصدقوا بس اللى هنقولكم عليه وتمشوا به.
حاجة تخوف صحيح بس متوقعة للاسف أن ده بيحصل بشكل ما مش زى طبعا ما موجود فى الرواية لكن جرب كده تنزل الشارع وتسأل حد من الشباب أبسط الأسئلة مش هتلاقى إجابات
يبقى ازاى الحال !!!
الفرق أن لسه المحرقة ما تنصبتش ولسه فيه قلة متمسكة بالتعاليم وربنا يستر على اللى لسه جايين ..
الرواية هعتبرها ديستوبيا وده نوع بحبه … هو صحيح بيسود الدنيا فى وشك 😄 بس عادى احنا اتعودنا خلاص واخدنا اللقاح 🤦🏼♀️
لكن الفكرة شوفتها كتير فى أفلام ومسلسلات وروايات تانيين.. فبالنسبة ليا مفيش جديد.. لكن اعتقد لو سن أصغر منى بحبة حلويين 😄 ممكن يبقوا بها منبهرين.
جزء " بداية الخلق " اتعرض بشكل مبسط وكأننا فعلا بنتعلم من اول وجديد حسيته شوية أنه فى طريقة سرده يناسب سن صغير ومش عارفة ديه مقصودة من الكاتبة سردها بالطريقة ديه علشان السن اللى فعلا معلوماته شبه معدومة توصلهم بشكل خفيف ولا مكتوبة بالشكل ده فى الرواية على اساس أن الأحداث فى الرواية أنهم لسه بيبنوا ويكتبوا فى التاريخ … المقصود فى عقل الكاتبة بقى 😁🤷♀️
هى عامة رواية ديستوبيا لايت 😄 هتقولى ازاى الاتنين هقولك ما هو الواقع اللى عايشين فيه ماخلاش للخيال حاجة نترعب منها وبقينا قاعدين متوقعين أى شىء.
أقدر أقول أن جزء الديستوبيا كان بالنسبة ليا تمام وكنت محتاجاه يطول أكتر من كده ويبقى التركيز عليه، لكن جزء بداية الخلق حسيته مش مناسب لسنى.
#مكنبة_دنيا
#قراءات_٢٠٢٤