حاسة اني مش هقدر أكتب مراحعة جميلة توفي حق الرواية، ولكني حابة أكتب عن رأيى في واحدة من أجمل الروايات اللي قرأتها واللي أظن مش هلاقي في جمالها تاني ❤️
بداية انا فعلا كنت خايفة من حجمها، خوفت الموضوع يكون أوڤر اوي ان ليه اقرأ كل ده عن سيرة بني اسرائيل اللي كل الذكر عنهم في القرآن هو العصيان والجحود؟ وكنت بطيئة في الرواية لحد الصفحة ١٠٧، كنت بكل كل يومين تقريبا ورقة ولا ورقتين من اوراق شمعون، بس الساعة ٤ عصرا يوم ٢٢ فبراير وعينك ما تشوف الا النور، مسبتهاش الا الساعة ١:١٠ صباحا ليلة ٢٣ فبراير غير وانا مخلصاها !
الرواية فيها أكتر بكتير من اخبار بني اسرائيل وعصيانهم وتحديهم لنبي الله موسى وكل العواقب اللي حصلت فيهم، لا، الرواية واصلة لحدود مكة واللي حصل فيها من فتنة قبل هدم الكعبة!
مشاعر كتير اوي مختلطة عن اللي قرأته، أشخاص كتير اوي اتعلقت بيهم زي الشيخ عابر وشمعون وأروى ورومانا وزخاري وشهبور وحتى الشخصية اللي مقعدتش معانا كتير "الشيخ نابت" حاسة اني هفتقدهم كلهم وهفتقد حديثهم وأخبارهم وأحوالهم، هفتقد كلام شمعون عن وصوله للمعنى الحقيقي للأرض المقدسة، وان الله في قلوبنا مش في بيت ولا في بلد، وان أرض الله كلها لله، وان الشخص مهمته في الحياه يصلح ويقوم ويعمل الخير..
شكرا للكاتب على لغته ومعلوماته وصياغته لفترة مهمة زي دي بالشكل ده، وربطه لأحداث كتيرة في القرآن بالقصة دي زي وجود ذكر لسيدنا الخضر في الرواية فجأة ووجود حد يتقفى اثره ❤️
اتمنى ارجع اقرأها تاني في يوم من الأيام، وان شاء الله ده يحصل