حرامي كتب؟!
لا مكنتش أتصور بلال فضل يطلع كده أبدا. المثل العليا انهارت في عيني. أه يا عيني ;) أنت لو تعرف يا عمنا الجرايم اللي عملناها في الحته دي هتقول علينا ايه. أنا شخصيا ممكن استحق محاكمة جنائية. طيب انت كنت بتسرق كتب أبوك لكن أنا اعرف واحد - اللي هو أنا طبعا بس أنا أذكي من إني أقول يعني - كان هو و اصحابه بيضربوا الكتب من بعض و اتطور الأمر لتقليب الكتب من مكتبة المدرسة اللي كانوا بيخلونا ندخلها بطلوع الروح و بيمنعوا استعارة الكتب و كمان بيخلونا نقرأ كتب معينة على كيفهم. حاولت أكفر عن الجريمة دي بإني اتبرعت لمكتبات المدارس دي بعد كده بفلوس لكن إدارات المدارس احتفظت بحقها في التصرف في الفلوس برضو.
المهم بقى ان الكتاب ده عمل حاجه جميلة أول مره أشوفها في كتب بلال ألا و هيا الصور الملونة اللي كانت اضافة حلوة. لكن خروجا عن الاجماع الكتاب في وجهة نظري مادانيش الجرعة الساخرة الشاخرة المتعودين عليها أو الحاله اللي عملتهالنا أم ميمي طمعتنا في حاجه أعلى من كده. في النهاية صحبة بلال فضل ممتعة دايما و ربنا ما يحرمنا من الناس الصادقة التلقائية اللي قادره دايما تغير مودك للأحسن و قادرة تكتب حاجات تخليك تراجع نفسك و تعيد حساباتك في وسط كل العك اللي احنا فيه ده.