#مسابقة_الجريمة_ليست_كاملة_مع_أبجد
من اول ما عرفت أن العربي ترجمت الجزء الثاني من "أسرار قاتلة" وهو "الرجل الذي يراقب النساء"، وأنا كنت مستنية أروح المعرض بفارغ الصبر عشان أجيبه. و بعد ما بقي في مكتبتي، بقيت حاسة لا هأجل متعة تحقيقات سباستيان بيرجمان قدام شوية عشان خايفة أقراها فيبقي خلاص خلصت، وأكيد الجزء الثالث لسه بدري. لكن في الآخر، فضولي غلبني وبدأت في الرواية، ورغم أنها طويلة، خلصتها في يومين من كثر تشويق وإثارة الأحداث.
بتدور الأحداث عن قاتل متسلسل بيقتل السيدات داخل بيوتهم بطريقة وحشية، وبعد البحث والتحقيق تم اكتشاف أن القاتل في الجرائم دي قاتل مقلد (copycat) لقاتل كان قبض عليه سباستيان بيرجمان في أوائل عمله مع الشرطة، وكان كاتب عنه جزء كبير في كتابه عن القتلة المتسلسلين.
طبعًا ينضم سباستيان للتحقيق مع الفريق بقيادة توركل ووجود فانجا ايزادورا وبيلي اللي بنعرف عنهم أكثر في الجزء ده، وكالمعتاد بردو لازال هارالدسون طموح لدرجة مدمرة لنفسه والتحقيق.
الجزء ده ممتاز ومركز أكثر كمان من الجزء الأول، والترجمة ممتازة والحبكة مشوقة، وبيبقى صعب أوي تسيب الكتاب لحد ما تخلصه. وبقى في ارتباط بيني وبين فريق التحقيق، خاصة أن قفلة الجزء الثاني محتاجة الجزء الثالث عشان توضح إيه اللي هيحصل في حياة سباستيان. عشان كده بناشد "Al Arabi Publishing and Distributing" العربي للنشر والتوزيع أن يترجموا الـ 5 أجزاء الباقية بسرعة. والحقيقة الترجمة كانت ممتازة سوا فى اسرار قاتلة او الرجل الذي يراقب النساء للمترجمة هند حسني .والغلاف والرسوم الداخلية جميلة ومميزة
التقييم 4 نجوم