طيب خلينا نبدأ المراجعة النهاردة مع شعور وإحساس اول ما خلصت قراءة يتلخص في كلمتين.
في حاجة غلط.
فعلا في حاجة مش مظبوطة في الرواية.
أنا قرأت للكاتبة نهى داود رواية جريمة العقار ٤٧ ورواية جثتين والثالثة عند قدمي واستمعت لثلاثة روايات صوتيا للكاتبة مع أوديوهات ومش صدفة وتصادف اني اكمل قراءة للكاتبة ومع ذلك حسيت إن رواية رضا فيها حاجة غلط انا حسيت لوهلة أو للحظات كتير أن الرواية دي مكتوبة قبل مشهد سينما مثلا أو بعد رواية جريمة في الفندق.
أسلوب الكاتبة مش هو نفسه في الروايات اللي قرأتها قبل شهر واحد، يمكن ده شعور ملهوش دليل وانطباع شخصي لكن كان لازم ألفت النظر ليه في المراجعة.
أما عن الرواية فهي حقيقي ممتعة وخفيفة وخلصت في جلسة واحدة أو يوم واحد بس وده دليل على جودتها بشكل عام.
الغلاف حلو ومثير وإسم الرواية جذاب ومميز.
المقدمة حلوة ومشهد البداية تقليدي مش كاتشي أو مثير الإنتباه لكنه جيد على المستوى الفني.
البداية اجتماعية بسيطة مفيش حوادث وقضايا ولا جريمة لدرجة أني شكيت في إن الكاتبة قررت تغير من نفسها في الرواية دي وهندخل في غموض نفسي شوية بعيد عن الجرائم.
طبعا كان في اهتمام من الكاتبة بالأكل والمطاعم ووصف الطعام وبصراحة كان جذاب جدا.
تعالوا نتكلم عن السرد والوصف باللغة العربية الفصحى البسيطة المباشرة من غير تطعيمات بلاغية أو تشبيهات مثيرة للخيال زي الروايات الأخيرة للكاتبة.
أما الحوار فكان بالعامية المصرية وكان كمان منير نسبيا عن المتوقع وكان كتير اوي في النهاية ومليان خطب مباشرة.
ونيجي للشخصيات وهي مش كتير خالص وسهل تتبعها لكن الكاتبة كانت متعمدة إرباك الكاتب وبصراحة نجحت في ده شوية حلوين لكن عن نفسي كنت شبه متأكد من الفاعل والقاتل.
أما عن السلبيات هنا فهي مش كتير خالص لكن أولها اني كنت بقارن بين الرواية دي والروايات السابقة.
وتاني سلبية هي توزيع مشاهد الفلاش باك في الرواية كان ممكن استغلالها بشكل أفضل من وجهة نظري.
وأخيرا شخصية نجاة حسيت انها مصطنعة جدا ومتكلفة اوي بلا داعي كانت محتاجة تفاصيل اكثر أو تركيز اكتر انا كنت كارهها طوال الرواية وشايفها عاملة نفسها وأصي على أصحابها وعلى أخوها والعدالة والعالم كله وحتى لو متفق معاها في المنطق فأنا مش متفق معاها في الأسلوب وسياسة فرض الرأي والتدخل في شؤون الناس بالفجاجة دي.
رواية رضا جيدة يا جماعة لكنها مش افضل روايات الكاتبة العظيمة وبالتأكيد برشحها وبقوة لكل عشاق أدب الجريمة خصوصا اليافعين واللي عايز يجرب القراءة في النوع ده من الأدب.
#أحمدمجدي