كتاب اذاعة الاغانى ل عمر طاهر هوة سيرة ذاتية بطعم الونس
عمر طاهر كالعادة بياخدنا معاه فى قعدة دردشة
اتنين صحاب فرقتهم السنين
واتقابلو صدفة فى قطر
والكلام كله كان عن الاغانى
ابو رقية افتكر اتسلطن مع سيرة المغنى
وافتكر الايام الحلوة واللحظات الصعبة
وفتح حقيبة الذكريات وبدأ يحكى
حكى عن اغانى ارتبطت معاه بذكريات
فيها الحلو...فيها الموجع
وفيها الكوميدى لدرجة الضحك م القلب
بدأ الرحلة مع اغنية نجاة على(فاكراك ومش هنساك)
الى ارتبط معاه ب عمة صديقه
وفنجان القهوة الى يطير الصداع ويظبط الدماغ
وحكاياتها الغريبة والبردعة الى مصممة تسيبها ف البيت
واوضة الخزين السحرية
بدايته مع عدوية
وإعادته للساحة الغنائية مرّة أخرى عبر أغنية مسلسل "عيلة الأستاذ امين"
،وبيكمل معانا ويحكى لنا قصة عمه وجاره القبطي والقلق والعربية بتاعته،
بنسمع حكايته مع سيمرة سعيد فى (قال جانى بعد يومين)
والاغنية الى كلها شجن
ارتبطت مع ابو رقية بموقف كوميدى لما الاسانسير عطل
والبواب كان خلاص هيلفق له قضيه من غيظه
وقصة(باحبك)
الى بيحكى لنا فيها حكاية ام صديقه الى ارتبط بيها جدا
وموقفها لما صممت تهاديه ب كرافت قبل فرح ابنها
ونزوله ليها(الست كانت قعيدة) ولحظة م لبسته الكرافته وايديها بترتعش
لحظة تملس القلب
واتنقلت لنا بعذوبة رقيقة جدا
واغنية حلوة يابلدى
الى كانت بوابة عبور ل قلب واحد اسبانى
لما ابو رقية سافر البرزايل ونزل ترانزيت ف مدريد
والجيتار الى اشتراه صدفة
وكان سبب انه يتعرف على واحد من امن المطار
ويغنى الاغنية الوحيدة الى كان حافظها
بعزف مبتدى ل فرد الامن
وليلة لاتنسى
الكتاب فيه حوالى 12 اغنية
12 حكاية من دفتر الذكريات
اغانى ارتبطت بحياة عمر طاهر
ونقلها لنا فى كتاب سيرة ذاتية
بطعم مختلف للغاية
طعم الذكريات
الكتاب نزل له تراك ب الاغانى الموجودة ع الساوند كلاود
انا مش هنشره😁
الكتاب اتصنف ك افضل كتاب فى 2015
وبالنسبة لى من افضل ما قرأت عموما
كتاب بطعم الذكريات الحلوة
يخيلك تفكر ف سيرتك الشخصية الغنائية