انا طبعا قريت.كل كتب عمر طاهر بس بما أن ده آخر كتاب قريته هكتب الريفيو عليه 🫣
كان خير رفيق على طريق مصر اسكندرية الصحراوي لما كنت بروح شغلى في وادى النطرون من مدينة النوبارية يعنى حوالى ٣٥ كيلو من اللذاذة والقمر والحكاوى 🤩
والحقيقة مش الكتاب ده بس لا كل كتب عمر سافرت معايا الطريق ده، والطريق الاطول لبيتنا وسهرت معايا في ليل الشتا الحزين وليل الصيف القصير، والكافيهات والخروجات والاكتئاب والفرحة ومشاعر كتير شاركتنى وطبطب عليا فيها كتب عمر طاهر 🥰
بحب الحكايات واللى بيحكى الحكايات كنت بحب احكى زمان بس خلاص تقريبا كبرت وفقدت الموهبة بس انا بحب عمر طاهر من زمان اوى 💜
وانا بقرأ كتبه بحسه قاعد جمبى بيحكى الحكاية بصوته، مش في الكتاب ده بس لكن كل كتب عمر طاهر طالع منها ونس وطالع ليها صوت ❤
ازاى حكاياته حلوة كده طول الوقت وانا بقرأ بسأل نفسي هو ازاى قدر يوصف مشاعري كده ازاى الضحكة بتبقي من الودن للودن لما يتكلم عن موقف حصل معايا حاجة تشبهله ازاى بكتشف معاه اغانى جديدة واصوات حلوة تخلينى ادور واغرق واتوه في بحر الحاجات الرايقة اللى بيلفت نظري ليها 💃🏻
عمر طاهر قادر ينقلك من حالة لحالة في ثوانى بحكاية حلوة عن الحب عن الأكل عن السياسة عن الناس البسيطة اللى تشبهلك قادر يدور ويدعبس جوا روحك ويطلع اجمل ذكريات 💜
في الواقع احنا بنحب عمر طاهر عشان بيحكى عننا بيتكلم عن زمان وذكرياته بيدور ويقولنا اصل الحكاية صنايعى بحق وحقيق ❤
عمر طاهر مرة عمل جوابات السعادة وانا عملت زيه وبقيت ماشية اوزعها على الناس بس عشان يضحكوا من غير ما يعرفوا مين كتب الكلام المبهج ده كفاية يومهم يكون خفيف بضحكة حلوة طالعة من القلب
شكرًا عمر طاهر من القلب والله ❤