الجزء الثالث والأخير من الثلاثية بنفس جودة الجزء الثاني من الأول لحد مثلا أخر ٢٠ صحفة..

عجبني الجزء اللي اتكلم فيه عن آصف بن برخيا وعن عهد سيدنا سليمان وقدرته في تسخير الجن بالتحديد.. والنظريات اللي سمعتها عن آصف بن برخيا.. والعهود اللي تمت بين الجان وبين سيدنا سليمان وازاي أفسدوها.. عجبتني جزئية شرح التاريخ والإسرائيليات والنظريات عن الحاجات اللي مانعرفش عنها كتير..

الجزء ده كمان كان فيه توظيف للنظريات العلمية ومزجها مع أحداث الرواية.. كان فيه ذكر لنظرية النسبية.. وذكر لعلوم زي الهندسة الكهربية والفيزيا وكان موظفها في شخصية "طه" ابن "عباد"..

واتكلم عن الفرق بين فيزياء عالمنا وعالمهم "افتراضيا يعني".. وسرعتهم وقوتهم و إزاي ان الانسان ربما يكون متفوق في حاجات عن الجن..

Ps:

الشخصية الوحيدة اللي عجبتني كانت شخصية "حامد" التافهة عشان كان بيضحكني في وسط المعمعة بتاعت الأحداث 😂

-كان فيه ذكر لشخصيات جديدة من الماضي وذكر لتاريخها وشخصيات جديدة في الحاضر كانت كتير وكانت مسببة لي تشتت رغم إنها كانت حلوة..

وكان فيه تنقلات كتيرة بين الحاضر والماضي والمستقبل كمان 🙄 في عالمنا وعالمهم والتنقلات ماكانتش سلسلة أوي مقارنة بالجزء الثاني. يمكن لأن الأحداث هنا أكتر!

ولكن صراحة الرواية كانت محافظة على التشويق لآخر لحظة وكان موجود في كل المشاهد ماعدا النهاية.

الحاجة اللي ماعجبتنيش هي النهاية.. يعني الجزء كله بيمهد لمعركة خظيؤة وهاتأثر على عالم الجن ويمكن أذاها يطول البشر.. وخلاص الأبطال عمالين يكتشفوا ف حاجات ووصلوا لطريقة ما وكان فيه تحالف بين العالمين وفجأة لقيت الرواية خلصت 🙄

طب فين المعركة اللي مستنياها طيب! 🙄😂

حرفيا كانت ف أربع صفحات حسيتها متكروتة جدا جدا ع المجهود المبذول وعلي فرهدة الشخصيات جن وإنس طول الرواية 🙄

ممكن تقييم السلسة كلها يكون ⭐⭐⭐

تشويق وتحالفات وأساطير وحاجات غيبية.. كل دول كانوا طاغيين على عنصر الرعب او ع الأقل بالنسبة لي.