نبدأ المراجعة على طول مع الغلاف كان تحفة جدا وكلمة الغلاف تدل على جريمة مخلوطة بعلم النفس وقبل البداية كده خمنت إن الراوي هيكون كذاب أو غير موثوق فيه وكده انا اشتريت واتحمست وقلت سيدي يا سيدي واضح أن في تقدم ملحوظ وكبير في البدايات.
وفعلا بمجرد ما فتحت الرواية على المشهد عبقري عنوانه عندنا جثة وعايزين نتخلص منها.
والجميل اوي والعبقري اني قدرت اكتب المشهد الأول بالكامل.
«تزوجت منذ خمسة عشر عاماً، ولم أرَ زوجي منذ ليلة الزفاف!
ولكن تلك قصة أخري، مايهم الآن هو هذه الجثة الممددة عند قدمي.. ماذا أفعل بها؟
أأضعها في حوض الاستحمام وأصب عليها أحماضًا تذيبها، ثم أصنع من بقاياها حساءًا لذيذًا أرمم به عظامي؟! هكذا أكون ظفرت بقطعة منه بين أحشائي كما تمنيت دوما.. ولكن من أين لي بتلك الأحماض الآن؟!»
بذمتك مش عبقرية في التكثيف وفعلا استفتاح مثير ومشوق جدا.
ونبدأ نغرق في الإجابة عن الأسئلة المنطقية.
مين هي القاتلة دي؟ وليه قتلته؟ طب مات إزاي؟ هتنجح في إخفاء جرمتها؟
شغل عقلك بقى وركز في كل كلمة بتتقال.
ركز جامد عشان السر في التفاصيل يا بطل.
وبعد شوية حلوين كده من التركيز واللعب في العقل نبدأ التحقيق والبحث عن اللغز والدوافع والمفاجأة.
هل فعلا في جثة عشان يكون في جريمة؟
عنوان الرواية يوحي بوجود ٣ جثث هل ده معناه ٣ جرايم؟؟
كل حاجة موجودة بس خد نفس كبير كده وادخل بعقلك وخيالك وعيش.
اللغة كانت حلوة وخفيفة ومناسبة جدا للقارئ البسيط والوصف كان مباشر واضح مع شوية صور وتشبيهات حلوة جدا.
الحوار كان فصحى دسم شوية لكن مقبول جدا ومناسب لجو الأمراض النفسية بدون مصطلحات طبيه مكلكعة.
الحبكة عظيمة جدا تستحق التقدير والاحترام.
ونيجي للشخصيات في الرواية كانوا كتير شوية لكن مش زيادة عن اللزوم وكل شخصية اخدت حقها وزيادة في التقديم والتعريف.
طبعا نجية هي جوكر الرواية ومحور القصة واختلافها، حالتها المرضية تستحق التامل فعلا والعلاقة ما بين الاختين كانت جميلة اوي وحقيقية كده وعجبتني خالص.
أسرة نجية كانت لغز الحدوتة وهو لغز مثير جدا للخيال وهنا نيجي للسلبيات وهي مش كتير ومقبولة في سياق العمل زي مثلا الصدف الكتير وعدم وجود دور حقيقي للشرطة أو المباحث في الأحداث بشكل عام ومسار التحقيق كله مع شخصية فضولية جدا.
ومش دي السلبية الوحيدة فللأسف أنا مش قادر اتقبل سبب وجود الظابط عاصم في الرواية ولا متقبل الخط الدرامي بتاعه خالص، بصراحة كان وجوده مقحم واوفر وحمل على الرواية ومزعج جدا وبعيد عن الحقيقة أو الواقعية.
الخلاصة هنا أن الرواية دي جبارة جدا ومثير للاهتمام وعجبتني وبرشحها للجميع وبكده فاضلي ثلاثة روايات للكاتبة هما "رضا" و"دماء على السجادة الحمراء" و"جريمة في ليلة ممطرة" دول أن شاء الله حقرأهم قبل المعرض القادم بس دعواتكم بقى.
#أحمدمجدي