مسكت الروايات ودخلت القوقعة بتاعتي ويلا بينا نبدأ المراجعة مع الغلاف الفخم المعبر عن عالم الجريمة والاقتباس على ظهر الغلاف المعبر عن إن الرواية تنتمي لأبعاد نفسية عن واحدة متزوجة بتشوف خيالات.
وعلى الفور نبدأ المشهد الأول في الرواية مع وجود جريمة في ليلة ثاني يوم العيد ده كل اللي نعرفه في المشهد الأول.
طيب مين الضحية؟
ومين المتهم طيب؟؟
طب أي حاجة!!
مفيش
وقفت هنا وقلت الله الله.
هي دي الافتتاحية الصح.
ويلا بينا نبدأ المشهد التاني فلاش باك ونرجع بالزمن يومين قبل الجريمة مع بطلة القصة وهي بنفسها الرواي هنا عشان نبدأ نتعرف على عالمها وأسرتها ومرضها النفسي وخيالاتها والسر الخاص الغامض الما ورائي ونستكمل الرواية في جو من الغموض والترقب والإثارة.
وتعالوا نتكلم عن اللغة في الرواية كانت عربية فصحى بسيطة وغير متكلفة في السرد والحوار مع لمحات ذكاء قوية في استخدام الوصف وبيان نمط وسلوك وشكل كل شخصية من خلال جمل حوارية حلوة مركزة.
المميز هنا اني في منتصف الأحداث حسيت فعلا بروح شخصية ممكن تكمل معانا في أعمال جاية وممكن تكون ركيزة زي ميسز ماربل من عالم أجاثا كريستي بشكل خاص أنها مصرية وعايشة في منشية البكري.
الحوار كان كثيف في بعض المواضع لكنه هادف وغير ممل أو مزعج ودي نقطة إيجابية بكل تأكيد.
أما عن الحبكة فكانت حلوة وبسيطة ويمكن كانت متوقعة بشكل ما ومش عارف ده ذكاء مني ولا حاجة تانية؟؟
عجبني جدا رسم الشخصيات بعناية فائقة والخلفية الاجتماعية لكل شخصية وخصوصا طنط سميرة.
اكتر شخصية عجبتني كانت نيللي طبعا بروحها وفضولها.
العمل خفيف سريع وخلص في جلسة واحدة في ساعتين تقريبا او اكتر شوية.
عندي بس تحفظ شوية على عدم توضيح تاريخ المرض عند صفاء لكن النهاية بشكل عام رواية جميلة جدا وذكية وفيها لمحات تربوية واجتماعية عجبتني جدا وطبعا برشحها وبقوة.
#أحمدمجدي