"عن رواية الفصل الأول من الجر.يمة ليارا رضوان"

❞المرَّة الأولى من كلّ شيء تصلح لأن تكون حُجَّة قوية للجزع والخوف❝

"أول مرة" هي الحجة المناسبة للإجابة على سؤال "أنت خايف ليه"، لكنها بعد كده بتبقى تلكيكة بلا معنى، لأن السؤال بيبقى ليه تكملة وبيتحول لـ "أنت خايف ليه.. هي يعني أول مرة!".

❞كان لديها الرغبة القوية في الانتـ.قام، تعرف أنَّ حرو.بًا يمكن أن تقام على تلك الدعامة وحدها!‏ ❝

عندي قناعة رهيبة بالجملة دي، خصوصًا الانتـ.قام الأنثوي، ومش عارفة ده يعد تحيز عنصـ.ري ولا لأ، بس ولا مرة قابلت اللي يزعزع القناعة دي.

‏❞نحنُ لا ننتظر دائمًا تبريرات ممن نحبّهم❝

من أقوى الدلائل على إن حد ما بيحبك إنك متبقاش مضطر تبررله طول الوقت، السبب ده تحديدًا يخليك تثق إنه فعلًا بيحبك بدون مصلحة، كفاية إنه مش بيجبرك على شعور سيء زي البحث عن حجة للتبرير.

‏❞حزنك يضع على عيون عقلك غشاوة تعيقه عن التفكير المرتب❝

الحزن وآه من الحزن واللي بيخلفه وراه من مشاعر قادرة تتحكم في العقل زي القلب تمام.

‏❞- كنتِ تفكرين؟‏

‫ ‏- أسوأ، كنتُ فارغة.. لأوَّل مرَّة منذ سنين أجرّب شعور الألم حدَّ الفراغ، حدّ عزوفي عن التفكير حتَّى❝

أول مرة أقابل حد قادر يوصف أقوى درجات الشعور بالألم ببساطة كده رغم صعوبته، وده بقى اللي بيسموه السهل الممتنع.

‏

❞نحنُ لا نحكم على مشاعر الأشخاص من وظيفتهم بل من تكوينهم الشخصي نفسه يا لينا❝

مش كل اللي بيتعاملوا مع جثـ.ث قلبهم ميت، ولا كل اللي بيتعاملوا مع الأدوات الموسيقية مرهفين الحس، ودي ثقافة محتاجين نخليها تنتشر.

**********************

‏الاقتباسات اللي فاتت علمت معايا جامد وكانت بالنسبالي هي الرسائل المستخلصة من الرواية وعشان كده ناقشتها،

الرواية التانية اللي أقرأها ليارا بعد ثنائية "هاتف وثلاث جثـث"، واللي لا تقل عنها في الإبداع في الفكرة والإتقان في الحبكة، لازم أعترف إن يارا تلاعبت بيا وخلتني زي ما أشك في الجاني أسحب شكي بعد لحظات، ودي حاجة مش سهلة بالنسبة لقارئة طالعت العديد من الأعمال البوليسية، يارا غير إتقانها للحبكة كانت لغتها سلسلة بشكل مش معقول، الأسلوب نفسه كان مخليني ألتهم الصفحات وأنا منبهرة بكل صفحة أكتر من اللي قبلها، ورغم إن كان عندي بلوك رهيب بقاله كام شهر إلا إني خلصت الرواية في يوم وليلة وأنا مسيطر عليا شعور "الرواية دي هتخلص امتى عايزة أعرف مين القا.تل، لأ يارب الرواية دي متخلصش عشان حلوة أوي ومش هلاقي زيها!"..

الحقيقة.. أنا كلي امتنان ليارا على إنها قدرت تمتعني بعمل زي ده رغم فقداني لمتعة القراءة نفسها الكام شهر اللي فاتوا، وبجد أنا كلي انتظار لعملها الجديد، كل الدعم♥️!

#خلاصتها_في_اقتباساتها.

#زينب_إسماعيل.