دي قراءة ثانية جديدة عبر تطبيق أبجد بمناسبة عيد ميلاد دار نشر كتوبيا العزيزة
قراءة جديدة على أبجد ✅
بلاش تحكم على الكتاب من الغلاف والعنوان وكلمة الظهر وانا مش هنتكلم عن الغلاف الأزرق المميز لكن خلوني اتكلم عن كلمة الظهر واللي من وجهة نظري مش أحسن إختيار خالص وبجد في كلمات جذابة ومعبرة كتير بين الصفحات ممكن تكون أفضل وممكن تكون محمسه وموضحة لفكرة الكتاب.
الكتاب نفسه مش كتاب تنمية بشرية أو تطوير ذات ولكنه طرح لفكرة لفهم لطبيعة التصرفات البشرية ومحاولة لشرح فلسفة الحياة والتفاهم معها وعرض مفاهيم جديدة عن التخطي والتجاوز والتفادي بشكل محترم وأفضل وحيادي تماما.
يمكن مع الصفحات الأولى والمقدمات الكثيرة تستشعر كده بعدم الفهم وإن الكلام عميق من النوع اللي يصعب على أمثالي فهمه لكن صدقني الموضوع بسيط جدا والدنيا هتكون واضحة بعد ما تفهم القتال السلبي والقتال الإيجابي.
مع شوية تركيز وتعمق في الكتاب هتبدأ تفهم المقصود بالزهرة الزرقاء عند الكاتب طبعا وتفهم المراد من تتبع أفكار الكاتب ومفاهيمه حول الحياة والصراعات الإنسانية فيها
والميزة هنا أن الكتاب بكل مواضيعه وفصوله هتلاقيه بيتعرض للقارئ بشكل خاص.
كل قارئ يقدر يلاقي اسقاطات مناسبة ليه ولحياته وبعد شوية هيقدر يقول أنا كان الأفضل ليا اني معملش ده أو الأفضل لو كنت عملت ده.
بشكل خاص بالنسبة ليا عجبتني بعض الاقتباسات واللي تقدر منها تستخرج شعارات خاصة زي مثلا.
الانتصار في بعض المعارك .. خسارة كبيرة.
وأخيرا لازم نقول إن الكتاب صغير الحجم وقصير المحتوى وكان بالنسبة لي سيكون أفضل كثيرا لو كان هناك الكثير من الأمثلة أو لو تجمل الكتاب بالمزيد من الحكي المستفاض لتوضيح الفكرة.
بشكل عام بعد الانتهاء من القراءة كنت قد حصلت على فكرة قوية عن مقصود الكاتب وتمكنت من الحصول على قدر مش قليل من الإستفادة والمعرفة ويمكنني الإدعاء بالحصول على بعض الحكمة.
قبل النهاية كان لازم التنويه على واحدة من النقاط السلبية الأخيرة هنا في الكتاب وهي فيما يتعلق بالقوانين الدولية ونظرة الكاتب للموضوع ده تحديدا في ضوء ما نراه على أرض الواقع من حولنا من إبادة جماعية وعرقية.
في النهاية الكتاب مفيد ويحمل فكرة راقية مهذبة وأرشحه بقوة لمن يريد نظرة مختلفة لنفسه والحياة.
#أحمدمجدي