دي قراءة ثانية جديدة عبر تطبيق أبجد بمناسبة عيد ميلاد دار نشر كتوبيا العزيزة

قراءة جديدة على أبجد ✅

#نقاط_كتوبيا

#عيد_ميلاد_كتوبيا #مسابقة_تجميع_النقاط

يلا بينا نبدأ مراجعة كتاب حكايات الفشل للمهندس أيمن حويرة وده طبعا كان أول قراءة ليا بعد كتاب الشوكارا - كيف تصبح زهرة زرقاء - لنفس الكاتب والمهندس.

وطبعا غصب عني هنا كان في مقارنة بين الكتابين وزي ما كنت وضحت في مراجعة كتاب الشوكارا أنه مش كتاب تنمية بشرية أو تطوير ذات ولكنه طرح لفهم الطبائع والتصرفات البشرية ومحاولة لشرح فلسفة الحياة والتفاهم معها وعرض مفاهيم جديدة عن التخطي والتجاوز والتفادي بشكل محترم وحيادي تماما.

في كتاب حكايات الفشل نتعرف على مفاهيم كتيرة وجديدة عن الفشل والنجاح.

كنت متوقع من عنوان الكتاب اني هقرأ مجموعة من القصص والحكايات عن الفشل لكن محصلش.

الكتاب بيتكلم هنا عن الفشل وتعريفه وأهميته والفشل في النجاح، والنجاح في الفشل، والفشل في الفشل، وإتقان الفشل، وكتير جدا من التعريفات والمفاهيم وشوية شوية هتلاقي نفسك قادر تستشعر أهمية الكتاب وتعرف اد ايه الفشل مهم وجميل وبسيط ومظلوم واحنا اللي فاهمينه غلط.

المشكلة بقى كانت بالنسبة ليا في الحكايات.

أين الحكايات؟؟

جميع الأمثلة الموجودة في الكتاب كانت بعيدة عني وعن شخصيتي خصوصا وانا شخص مليش في الكورة خالص ومشوفتش ولا أعرف غير فيلم واحد بس من الأفلام المذكورة في الكتاب.

بجد حسيت وكأن الكاتب قاصد يلفت النظر للأفلام دي

وخاصة فيلم العالمي اللي انا مشوفتوش واللي كان في فقرة هامة ورئيسية معتمدة على أن تكون شفت الفيلم وعارف القصة بتاعته ودي حاجة فصلتني ودايقتني.

والمقصود هنا اني مقدرتش أحب الأمثلة والقصص والحكايات في الكتاب إلا اليسير منها.

وعشان كده لازم اعترف أني حبيت كتاب الشوكارا أكتر من كتاب حكايات الفشل لكن انا كمان حبيت المفاهيم والفكرة في حكايات الفشل وطبعا عجبتني الكتير من الاقتباسات الملهمة.

وأخيرا لازم نقول إن الكتاب صغير الحجم وقصير المحتوى وكان بالنسبة لي سيكون أفضل كثيرا لو كان هناك الكثير من القصص والحكايات.

بشكل عام الكتاب حلو جدا وفيه كم من الأفكار والمفاهيم الجيدة القوية عن النجاح والفشل ولا يمكن إنكار فوائد الكتاب واللغة المستخدمة الراقية وبالطبع أرشحه بقوة للكثير من الشباب والرجال خاصة للنظر في المواضيع الحيوية والحياة.

#أحمدمجدي