#سفريات2024

#صاحبات_السمو_الملكي

رحلة جديدة مع كتاب جديد عن الفترة الأكثر ثراءاً بالنسبة لي في تاريخ مصر وهي الفترة الملكية، اللي لأسباب كتير المعلومات اللي بتوصلنا عنها قليلة جداً ومن مصادر مش دايماً موثوقة، خاصةً عن الأميرات أو سيدات العائلة المالكة بحكم حياتهم المقفولة جداً والتعيتم الإعلامي عليهم

من أول م إعلان الكتاب نزل وأنا متحمسة، لأني أصلاً متابعة"إيمان الشرقاوي" وعارفة إنها دؤوبة ف البحث وأمينة جداً ف نقل المعلومة ومصدرها، وقد كان

على مدار حوالي 370 صفحة كانت حكاية الأميرات الخمس ، فوزية وفائقة وفائزة وفتحية وفوقية، اللي احتلت الأميرة فوزية لوحدها تقريباً نص الكتاب بحكم حياتها الثرية وتغيراتها الكتير وجمالها الأخاذ اللي كلنا مفتونين بيه لحد دلوقتي، مع باقي الكتاب لباقي الأميرات

الكاتبة إهتمت مع كل أميرة إنها توصف طباعها الشخصية و تعليمها اللي بيختلف من واحدة للتانية وإن كان بشكل بسيط، علاقة كل أميرة منهم ب أخوها الملك فاروق و أمها الملكة نازلي، التغييرات المهمة ف حياة كل واحدة سواء بالزواج او الحرمان من مخصصات ملكية لأي سبب

عجبني قوي التركيز على دور كل أميرة منهم ف الحياة العامة، المبرات اليل اتعملت من خلال كل واحدة فيهم وتأثير دة ع المجتمع بشكل كبير، لأن أغلب الناس فاكرة إن حياتهم كانت جوة القصور الملكية بس

عجبني كمان التركيز على نهاية حياة كل أميرة منهم و ظروف وفاتها ودفنها، رحمة الله عليهم جميعاً

الكتاب ثري، مصادر مهمة و كتير، الكاتبة م أغفلتش معلومة شاكة فيها إلا وكتبت تنويه إن المصدر كذا و كذا، كتاب متعوب عليه فعلاً...شابو للكاتبة من كل قلبي ع المجهود والمعلومات الكتير اللي اتكتبت بشكل سلس وجذاب ف حتى عشاق الكتب الروائية زي حالاتي مش هيحسوا بزهق أثناء القراءة...هايل جداَ

#الكتاب_رقم22

#كتب_تاريخ

#ترشيح_شخصي

22/1