بقالي كتير جدا ما سحرنيش عمل بالشكل ده

رواية "تاج شمس" للكاتب هاني القط، ملحمة سردية بديعة، استمتعت بيها على مدار أسابيع، وبقول أسابيع لإني حبيت جدا الحالة الجميلة اللي عيشتها خلال قرائتها وحاولت "أتمزج" زي ما بنقول كدة واستمتع بكل تفاصيلها.

الرواية بتاخدك في رحلة لقرية ريفية متخيلة هي قرية "تاج شمس" وبتتعرف من خلالها عن أحوال أهلها وطبيعة حياتهم الريفية، وبتطرح تساؤلات كبرى حول الخذلان، ونظرتنا للمكان وعلاقته بقاطنيه وازاي التاريخ بيعيد نفسه بشكل غريب وكإننا بنتعمد تكرار نفس الأخطاء بنفس الطرق!

تقدر تقول إن الرواية تنتمي للواقعية السحرية، لإنها رغم استنادها لأحداث ومواقف واقعية وبنشوفها بشكل أو بآخر في حياتنا اليومية إلا إنها مليئة بالرمزيات والإسقاطات وبتعتمد في رسم شخصياتها ومكانها وزمانها على التخييل بشكل كبير.

العنصر الأهم واللي شايفه البطل الحقيقي هو الأسلوب السردي البديع للرواية، واللي يخليك مستمتع ومنغمس داخلها حتى ولو زاد عدد صفحاتها عن 380 صفحة، الكاتب قدر إن يتنقل بين الأحداث والشخوص والأزمنة بشكل سلس جدا، والأحداث والمواقف كانت بتتصاعد في تدفق سردي رائع.

الكاتب حاول يعيشنا الحياة الريفية بامتياز باعتماده على الموروث الشعبي من حكايات وأغاني شعبية وأمثال شعبية كان حاضر بقوة على لسان الأبطال على طول الرواية، ونقل بمهارة شديدة الروح المصرية للعمل حتى لو كان المكان غير محدد في الرواية.

وأنا بقرأ الرواية حسيت بميكس جميل بين أجواء خيري شلبي في "لحس العتب" وتعدد الشخوص وتشعب الحكايات زي "حديث الصباح والمساء" لنجيب محفوظ، طبعا مع اختلاف الأسلوب والأدوات وتفرد الكاتب في أسلوبه وسرده وأفكاره، لكن كان إحساس جميل ملازمني طول قراءتي للعمل.

رغم تعدد الشخوص والأحداث والحكايات إلا إنك مش هتحس بملل ولا بتشتت خلال قراءتك للرواية، بل هتلاقي نفسك بتلقائية شديدة بتحاول ترسم شجرة للعائلات الموجودة في الرواية وتلهث وراء معرفة مصير كل شخصية من شخوصها، ومحاولة فك رموز الرواية... يا ترى "جليلة" هي مصر ولا لا؟ يا ترى في إسقاطات على حقبة سياسية معينة ولا لا؟ يا ترى الأحداث دي في الماضي ولا الحاضر؟ تساؤلات كتير هتشغلك طوال قراءتك للرواية.

رواية "تاج شمس" واحدة من أجمل وأمتع الروايات اللي قرأتها من زمن طويل، وهتفضل واحدة من أهم ترشيحاتي لسنين جاية، وأتوقع إنها هتترشح وتنافس على جوائز أدبية كبرى💙💙