تبتدأ احداث القصة بزين.. شاب بيصحى في ليلة عيد ميلاده الاربعين مصاب بربكة وتوتر شديد.. واحنا مش فاهمين ليه!
حتى طريقة تعامله مع امه غريبة.. فيها عدم الاهتمام والجفاف، وكل الي هو عايزه انه ينجز مهامه قبل ١٢ ساعة !
ومن هنا بنبدأ نشوف خط سير احداث.. يتخلله فلاش باكات من ماضي زين.. ونفهم قصة عائلته وامه والباشا ولولا.. وغيرهم من الشخصيات!
⚠️ يصلح العمل لمن هم 16+ ⚠️
الرواية دي حلوة.. فعلا، لكن هي وعدت بشيء في ضهر الغلاف وشبه خلفت بيه!
ومع ذلك حلوة
طريقة الحكي وسرد الاحداث جميلة وفيها بصمة واضحة من الكاتبة، حبيت جدا اسلوب المونولوجات النفسية الي بتحصل مع البطل، وحبيت طريقة عرض مشاهد من الماضي لربط احداث الحاضر وفهمها..
اللغة كانت جيدة جدا، وسلسة وكذلك الحوار كان بالفصحى.. وللاسف كان زايد عن حده ومحتاج يقل او يتحول (بعض أجزاءه) لمشاهد سردية...
شخصيات العمل يعتبره كتير.. مش اوي، هو زين البطل دا أساسي وامه، لان كان ليها بناء تاريخي ممتاز و داخل في صلب الحبكة..
لكن الباشا وإبراهيم والعمة.. كلهم مهمين في خط سير الأحداث لكن مخدوش بناء كافي زي الأم
استثنيت منهم لولا (دا اسم شخصية) لأن تم بناء شخصيتها كويس لكنها مشابه للأم بنسبة كبيرة اووي
وطبعا البطل زين بناءه ودوافعه كانت ممتازة♥️
الشيء الي ذكرت ان الرواية وعدت بيه وخلفت هو كمية الإثارة والتشويق الي كانت ف الضهر.. العمل بكل تأكيد في درجات كويسة جداا من التشويق لكن كملة الضهر رفعت سقف التوقعات شويتين.. والاحداث كانت ابطئ من المتوقع.. فهم وحش الملل في بعض الأجزاء.. ودا فعلا بسبب كلمة الضهر، لكن احداث العمل ممتعة وحقيقي جميلة..
حبيت خط الرومانسية ♥️
ونيجي للنهاية.. انا عن نفسي كل الامور والخبايا وضحت لي في نقطة معينة.. بعدها عرفت العمل هيخلص علي ايه وحصل الي توقعته
ومعرفش هل الكاتبة تقصد دا ولا لا، لأن الموضوع سهل اوي!
مش عارف...!!
لكن النهاية بشكل مجمل لا جميلة وفيها عبرة عن الآمل.. وكمان تعتبر شبه مفتوحة او غير مقفولة بشكل كامل، بحيث القارئ يفكر ايه الي ممكن يحصل
رواية لذيذة وفيها جرعة تشويق عالية بس حاول متقراش كلمة الضهر 😅
التقييم: ⭐⭐⭐⭐