❞ سأخبرك ثلاث حقائق عن نفسي:

‫ أولاها أنني أُدعى «نوح».

‫ والثانية أنني أصبحت ضابطًا في المباحث الجنائية تأثرًا بالمحقق كونان.

‫ أما الثالثة، حسنًا، فسأُعلمك بها في الوقت المناسب.❝

المحقق نوح الألفي وحقائقه 👌😀

فكرة انه أصبح محقق تأثرا بالمحقق كونان دي حببتني في الشخصية من أول سطرين تقريبا 😀

أما عن الحقيقة الثالثة عن بطلنا فهي كانت بالنسبة لي the cherry on top.

اعتقد لو ماكانتش الكاتبة أضافت البعد الماورائي لشخصية المحقق وطبيعة التحقيقات ماكنتش هاستمتع بيها كدة.. ف حقيقي اختيار موفق.

٣ قضايا كانوا بيمتازوا برتم سريع للتحقيقات وأفكار متناسقة وأسلوب انسيابي ولكن كان تعليقي الوحيد اني كنت بكتشف القاتل قبل نهاية القصة وفي قضية ست الحسن القضية الأخيرة انا تقريبا عرفتها من اول صفحة.. ماكانتش غامضة او متشعبة كفاية بالنسبة لي..وكان عزائي الوحيد قفلة القصة الأخيرة اللي بتمهد للجزء الثاني.

أعجبت بشخصية قظز الضابط اللي ماكانش عايز يبقى ضابط.. أعجبت بصداقة قظز ونوح.. والأسماء المختارة في الرواية عامة بردو عجبتني..

كان فيه جزء فكاهي كدة بيظهر مع سير التحقيقات كان لطيف اوي وكان بيضحكني جدا 😂

الجزء ده خلاني أحس اني بتفرج على مسلسل مفضل ليا مثلا.. كتابة وأسلوب مريحين للأعصاب ولا يسببوا الملل على الإطلاق.

أعتقد ان الكاتبة هاتبقى من كاتباتي المفضلات بما ان دي تاني رواية اقرأها ليها وتعجبني. ✨