ما كنتش متوقعة تعجبني بالشكل ده! كنت متوقعة انها رواية بوليسية وجريمة ويمكن ساخرة أيضا..
لكن تحية تقدير واحترام لقلم الكاتبة لعرضها القضايا المهمة دي في روايتها.
هاحاول قدر الإمكان المراجعة مايكونش فيها حرق للأحداث.
❞ كان الأستاذ في الجامعة يقول لنا إن الأسرة لهي نموذج مصغر للمجتمع، إن استقرت الأسر، استقر المجتمع كله ❝
انا شايفة ان الرواية بتبدأ من الاقتباس ده.. الكاتبة قررت تعكس قضايا مهمة وتعتبر شائكة في مجتمعنا علي أفراد أسرة "منتصر شهاب الدين"
الأب"منتصر" كان صوت المجتمع المتخلف الخانع اللي بيفضل السكوت علي الاقتصاص من الجاني "خصوصا لو كانت الجريمة تمس الشرف في عُرفهم يعني". اكتر شخصية مستفزة وعصبتني فوق الوصف.
بتول.. بالنسبة لي كانت صوت المقاومة ورفض الظلم بكل أشكاله رغم معاناتها منه إلا إنها قررت تحاربه بشكل صح وشجاع حتي لو كانت هيا لسه مش قادرة تتعافي من تعرضها للظلم ده.
شخصية مريم الشخصية الحالمة اللي طموحاتها بسيطة وساذجة بش مشروعة كل اللي كانت بتدور عليه حياة سعيدة ولكن اتصدمت بالواقع.. او ع الاقل كانت حظها الجزء الوحش منه.
الشخصية المفضلة بالنسبة لي هي شخصية "عيسى"✨.. رغم إني متحيزة جدا لقضايا المرأة اللي البعض بيهزأ منها بس الكاتبة هنا سلطت الضوء علي الرجل من بداية حياته "الرجل بيتعرض للظلم زي المرأة بالظبط" يمكن دي الحاجة الوحيدة اللي الحياة مش بتفرق فيها بين الجنسين..
الرجل في مجتمعنا "عيسى" بيتربي من صغره انه ماينفعش يبكي عشان هوا رجل! ف يكبر شخص مش بيعرف يعبر عن مشاعره وبيستهزأ بمشاعر الاخرين.
يكبر في سن المراهقة " انت لازم تنشف كدة" ويتحط في تابهوهات مالهاش اي تلاتين لازمة "ماتطولش شعرك" "البس عدل" "اتكلم بطريقة معينة".. لو حصل وواجهته أي مشكلة ويا سلام بقي لو مشكلة نفسية مش هايتقابل كل ده في الغالب من الأهل والصحاب والمجتمع الا بكلام زي "ضعيف".. "كئيب".. "منطوي" وغيرها كتير وحاشا لو حب يلجأ للعلاج النفسي.. كيف تجرؤ؟عايز تبقى إنسان سوي وتحاول تعالج جروحك ؟🙄
ف شخص زي ده بيكبر بيبقي مسخ لأنه مالقاش الدعم من أقرب الناس ليه حتى وللأسف الواقع دليل علي ده.
لكن هنا الكاتبة هنا حبت تدينا بصيص أمل 🤞 الحمدلله 😂 في شخصية "الجدة نصرة البطلة" الشخص القريب الداعم الحقانى.. كانت هنا داعم أكتر من الأب والأم.. ساعدت أحفادها ووقفت جنبهم عشان مايتحولوش ل مسخ.
الرواية أسلوبها هايخدعك في الأول سير الأحداث بيبدأ بطيء وهادي نوعا ما.. لكن بعد ٥٠ صفحة تقريبا الأحداث بتبدأ تتصاعد في حدتها تدريجيا والقضايا اللي الكاتبة بتناقشها بتوضح واحدة واحدة.
الرواية جميلة وفيها توعية أتمنى إنها تنتشر في مجتمعنا. مليئة بالاقتباسات الجميلة لحد أخر صفحة.
إذا وصلت إلي هنا عزيزي المتابع ف عذرا على هذة المراجعة العفوية الطويلة لشخص ليس لديه مهارات كتابة مراجعة رائعة،و شكرًا. 😁