من جديد مع عمر طاهر

وكتاب جديد برأيى المتواضع تنقصه كلمة...الونس

كتاب الونس والمواصلات

ورحلة جديدة مع كاتب شاب قدر وباقتدار انه يحول الكتاب من مجرد كتاب لقتل الوقت او للتسلية او حتى للمتعة

الى ونس

المتابع لعمر طاهر(زى حالاتى كدة) مع الوقت بيحس ف كتابته بنوع من الالفة

والمرة دى الألفة أكتر...والونس أكبر

كتاب أشبه بالدردشة

تاخده معاك ف سكة سفر...ترفع عينك للحظات كل شوية عشان تستمع او تفتح عيونك وانت بتقول (الله)

كتاب يشبه الطبطبة

يشبه قعدة بين 2 صحاب قدام ف جلسة ونس قدام كوباية شاى ف يوم برد

الكتاب عبارة عن مقالات فيها حواديت شخصية

ف بقى شبه السيرة الذاتية مش بس للكاتب...لا فيها منى ومنك

وكعادة ابو رقية لازم يلفت نظرنا لاغانى بنسمعها ومنعرفش تاريخها

زى ياغريب الدار و كل الناس بيقولو يارب

الحكاوى عن عامودى الفرح والحزن فى فترة الثمانينات

الحكاوى عن الاغانى

عن ثناء وسناء الى عرفت واحدة وعشقت الثانية بسببه

عن مواقف الحياة واللقطات العادية الى بتوصل للكاتب بمعنى تانى احلى وينقلها بشكل اروع

الونس الجميل فى كل صفحات الكتاب

الثقة الى بتحسها وانت واخد كتاب مقفول بغلافه ف سكة سفر طويلة وانت متاكد انك هتستمع

رغم انك ف العادة بتحتار بين كتب كتير

بس طالما عمر طاهر نزل كتاب يبقى ناخده وهنتبسط

انا الحقيقة من متابعى عمر طاهر

والكتاب دة خلانى من دراويشه

كتاب يخلص ف قعدة واحدة...قعدة صفا مع الدنيا

كتاب يطبطب على قلبك

ويرجعك لذكريات عشتها ويونسك بحواديت معشتهاش

شكرا عمر طاهر على جرعة الونس والمحبة الصافية

شكر اكبر انك دايما بتبهرنا ببساطتك

شكرا تانى على كتاب اتنشر ف وقته وجه ف وقته

من الكتاب:-

*يخاف الواحد ان يكبر لاسباب كثيرة فى مقدمتها شعوره انه لم يفعل مايريده بالظبط ولكن تورط فى اشياء كثيرة تشبهه..ينتظر اللحظة التى ستكون فيها السعادة خرافيه...ويود ان تأتيه مبكرا بحيث يكون متاحا له ان يفرح بها بجنون يليق بسن صغيرة

*التنفس دليل على حياة طبيعية عادية...لكن الحياة غير العادية متعلقة باللحظات التى لم تكن قادرا فيها على التنفس

واخيرا

عمر طاهر قادر جدا انه يسعدك