حسيت كام مرة انك وحدك

حواليك أصحابك وقرايبك

لكن وحدك

بتقلب أرقام تليفونك

وتدور على حد مكلمتوش من فترة

وبتسمع لفرانك سيناترا وأنغام ومنير

حسيت كام مرة انك شرير

وبإن الناس بتبص عليك

كام مرة تدور ع الساعة وهي أساساً في إيديك

كام مرة بتسرح ف الدنيا وانت مروح

وتشوف رجليك من غير تفكير

واخداك ع البيت

حسيت كام مرة انك بصيت

وبكيت

مالقتش صحاب

والناس أغراب

يومك “لايكات” وصور بـ”تاجات”

والموقف واخده ف كومنتات

حسيت كام مرة برفض حاجات

لكن كملت وقلت “اهو خير”