في الجواز بتحصل ازمات ومشاكل كبيره مش هانكر ، لكن المشكله الاكبر لو معندناش مهاره اداره الازمه ، لو معندناش شغف بالاستمراريه ، لو مافيش هدف يخليني أستقتل علي اننا نخرج من الازمه دي سالمين معافيين نفسيا ، وقادرين أكثر اننا نتحمل اي حاجه في سبيل اننا نحافظ علي بعض . طيب نتحمل عشان بعض ليه؟

هاقولك عشان دي حياتك انت ، ماتخليش حد يتبرع ويدخل حياتك عشان يديرها عنك، بلاش تفتح الباب ده، في مسئوليات بجد ماينفعش نستسلم قدامها أو نتمرد عليها، فيه مسئوليات بتحتاج تاخد منها شويه راحه ترتب فيها افكارك وترجع تلتزم بيها تاني، انت كزوج او كأب مسئول تدير الازمه وتطلب المساعده من مراتك وتحلو المشكله سوا، ماينفعش تلاقي مراتك واولادك في مركب مخرومه وتسيبهم وتمشي ، هي دي الازمه اللي ممكن تخسر فيها كل حاجه . وانت مش قد انك تخسر الحب والامان  ونعمه الاسره في حياتك