أمواج الحياة

اولا و قبل اي حاجة الكاتبة موهوبة و أسلوب كتابتها خفيف و مقنع

اعتمدت على الواقعية و سرد أحداث بنشوفها كل يوم حوالينا و يمكن جوا بيوتنا و مع ذلك الأسلوب كان شيق و فضلت لأخر فصل عايزة أعرف اللي هيحصل أو بمعنى أصح فضلت عايزة أعرف (( ليه )) إيه اللي وصل الإنسان دا للشخصية دي

استخدمت تيمة الأصدقاء أو الشلة و الحتة دي بتكون قريبة أوي للقلب خصوصا لجيلنا إحنا

سواء البنات أو حتى الولاد وده ظهر في علاقة الصداقة والجيره اللى ربطت عمرو و أدهم

في كل بيت بينتي ان الولاد مراية لأهلهم

و مش إنهم بيكونوا شبههم في التفكير لأ ممكن تقولى إن الأهل لهم دور كبير في تشكيل شخصيات الأولاد .

لو هتكلم عن شخصية شخصية....

هبدأ مع(( ايناس )) : مثال حي للحلو اللي حظه قليل في الدنيا

"فاكرين المثل اللى بيقول الحلوة بختها قليل".... الأجمل و الأشطر و الأفضل خلقا لكن الأقل حظا وكمان كانت قصتها مثال تاني "داين تدان"

لكن يبقى السؤال ياتري لو كانت إيناس على علم بالماضي كانت اختلفت في التربية؟

(( ياسر )) على قد ما حبيت شخصيته في الاول على قد ما كرهته بعد كدا ...أو تقدري تقولى هو مثال للشخص الغبي في الحياة.

لان ياسر هو الوحيد في القصة دي اللي ما قدرتش اوجد له اى عذر .... زي ما كان هناك أمثلة سيئة في حياته زي مامته و عامر كان في الأمثلة الجيدة زي والده لكن تظل الأم هي المدرسة اللى بيخرج منها الأبناء واعتقد إنك قدرتي تأكدي على النقطة ده في كل القصص تقريبا(إيناس اللى رباها وعلمها كانت الأم...واللى ساعدتها في النهوض من مشكلتها هي الأم..

ياسر سبب فساده كانت أم غير صالحة ).

((ام دارين )).....

. دي مثال حي للأم الحافظة و مقتنعة بحفظها و غالبا بتخرب على بنتها ...

وهنا كان المصحح في قصة دارين كانت (ناريمان...والدة سيف)

ياه لتلك المفارقة هنا كان مثال حي لدور النساء والأمهات خصوصا في بناء المجتمع وبناء الأسر(شابوه لك حقيقي).

((دارين&سيف ))

كابل رائع ودمه خفيف....وفيه درس لكل بنت بلاش تمشي وراء حد حتى لو والدتك....خلى حياتك الزوجية خاصة بك

خلى عندك فكر ووسع أفق علشان تعيشي سعيدة.

اوعي تعتبري حماتك عدوه....جايز تكون هي جيشك القوي في الحياة.

(( منى و وليد ))

هنا محتاجه حد يضرب نار ويجمع هنا عندي.

اكتر شخصيتين حسيتهم في كل بيت

الزوجة اللي طول الوقت بتوجد أعذار لجوزها و بتحاول تمشي المركب

و الزوج اللي تحسيه محمود ياسين في رائعة اين عقلي

الزوج اللى جواه تناقض رهيب....بحبها بس لازم اعذبها.

الراجل اللى ملوش كتالوج يتفهم منه....

بس بعد شوية فهمت حته رائعة...انت كنت عايزة توصلي إن النوع ده من الرجاله محتاج ست تحتوي..

والاحتواء هنا كان انها أولا تعرف أسباب طباعة الغريبة ده ايه هل لها أسباب قديمة وساعتها تقدر تحتويه بطريقة المعاملة الصحيحة(كتير هيقولك طب انا بتجوز علشان اشتغل دكتورة نفسية).

هجاوب بدالك واقولك(الحب الحقيقي يخلي الإنسان يفضل يسعي لإنقاذ الحياة الزوجية...ولخلق حياة سعيدة...الحياة تستدعي المحاولة ).

((ياسمين&خالد))

قبل اي حاجة "خالد" ده مثال الراجل اللى اتربي على آداب الإسلام وده نتاج أسرة محترمة تراعي الأخلاق والقيم.....حاجة كده وانت بتقرائى مواقفه عايزة تدخلى جوه الرواية تقوليله"الله عليك يا راجل ...سلمت من ربتك يا ابني"

إزاى قدر يحتوي طاقة الغضب والخوف اللى داخل ياسمين....إزاى يقدر يبدل لها نظرتها في الرجال.....

إزاى أقدر يخليها تقبل انها تسامح والدها في يوم.

((ياسمين )) ممكن نقول مثال للبنت اللى ادبحت بدم بارد....ده خلتني أبكي بجد لما عرفت قصتها.

((كوثر&عبدالله&خديجة))

كوثر : الست المغلوبه على أمرها مش لضعف منها ولكن لقوانين الدولة في الزمن ده من إمكانية طلب الزوجة في بيت الطاعة اذا طلبت الطلاق .(زمن ظلم وقع على كثير من النساء في مجتمعتنا العربية ))

كوثر اتظلمت واتحرمت من حقها في الحياة....

عبدالله: تصوير حقيقي لرجل يحمل صفات الحقارة اللى سببها جشع الأم وطمعها وظلمها.

خديجة: مش هقول عنها غير حسبي الله ونعم الوكيل فيها وفي اللى يمثلها...

((سها&أدهم ))

سها: كتير من البنات لما يقع عينها على الشاب بتحاول توقعه بكل الطرق لتحظى به في النهاية....جميلة،شقية، دئوبه على تحقيق حلمها....قدرت تحتوى أدهم بذكائها.

أدهم: مثال لشباب كتير بيعاونوا من نفس السبب لكن لم يصادفوا صديق زي عمرو أو حبيبه زي سها تدعمه...وجيران قدرت تحتويه وتراعيه زي والد ووالدته(سها &عمرو).

((رهف))

ده الشخصية المثالية في الرواية...اللى اتربت على عنصر أساسي ومهم لنجاح أى شخص الانشغال بما يخص أسرتي فقط دون مقارنتي بالآخرين(زمان لما كنا نروح للوالد او الوالده ونقوله عايزين نشتري لبس جديد كمثال ....بيقبل اذا الظروف متاحه أو للاحتياجنا الحقيقي بس اذا قلنا (اشمعنا فلان)كان بيرفض يشتري...مهم قوي اننا نهتم بشئونا الخاصة دون متابعة الآخرين...

اسرة سوية ومترابطة بتحترم وتقدس الحياة الزوجية وده اللى حصل في حياتها بعد زواجها من عمرو اللى نشأ بنفس الطريقة في منزله....

وده يؤكد على ان أهم حاجة لازم نهتم بها في شريك الحياة انه يكون خارج من نفس الخلفية الاجتماعية في الحياة.

أخيرا ده أول ريفيو لرواية أعمله....حقيقي ضحكت وبكيت وزعلت وفرحت ....وحزنت وأعلنت الحداد مع اصعب مشهد وفاة حصل....

الرواية بالنسبة لى من جانب الاحداث والتشويق ملامسة المشاعر والأحاسيس وزرع القيم والأخلاق تستحق 10/10 بجداره....

ارشحها لك أعضاء الجروب للقراءة......

رواية أمواج الحياة

قصة الفتيات الست والصداقة ذكرتني بمسلسل حكايات بنات

مع الاخذ في الاعتبار أن في هذه الرواية وضحت الكاتبة ان هناك قصص كثيرة ومواقف بنعيشها وتشوفها وأوقات كثيرة نتعجب منها الا انها ظهرت لنا الجانب الخفي وراء كل قصة.

لو تحدثنا عن كل زوجين

ياسر وايناس

إيناس وحيدة ابويها لكن رغم طيبتها ورقتها إلا أنها تجعل العقل هو الحاكم الآمر في النهاية دون أن تخدع أو تزيف الواقع ،قصة إيناس هى الوجهة الآخر لقصة والدتها لكن مع اختلاف رد الفعل كان القرار مختلف

ياسر رغم امتلاكه كل شئ الا أن الأنا كانت هى اساس كل قراراته فكان هذا مصيره الطبيعي.

منى& وليد

منى تشبه قطاع كبير جدا من البنات ،القلب هو المحرك الوحيد لها واللي بسببه وقعت في أخطاء.. نهايتها رغم قسوتها وبكائي عليها الا انها كانت النهاية الأفضل

وليد اذا لم تذكر الكاتبة الوجهة الآخر لوليد كنت شعرت بنقص شديد في العمل...مفيش انسان مولود مريض بهذا الشكل لكن الطفولة والنشأة هى سبب كل ما نواجه من أمراض في المجتمع.

دارين & سيف

دارين والحيرة من أم الزوج كان تصوير رائع لقطاع كبير من الأسر بيقع فيه الكثير..أحببت موقف ام الزوج جدا وتمنيت أن تكون كل الأمهات مثلها.

سيف زوج مصري راقي

ادهم& سها

تألمت على أدهم كثيرا ولولا أنني أعلم أشخاص تعاني من نفس الامر لاحتسبتها مبالغة من الكاتبة

سها نتاج تربية أسرة سوية رائعة

ياسمين & خالد

ياسمين نتيجة حياة قاسية عيشتها مع الكاتبة في وصف مشاعرها،بكيت بشدة مما حدث لها واوالدتها...

خالد هو العوض الموقف اللي بين خالد ووالد ياسمين في منزل الوالدة يجب أن احيي الكاتبة عنه،فهو مقابل لمشهد الأب مع الأم في البلد( وضحت الكاتبة هنا أن في الحياة نماذج كثيرة متناقضة بنعيش معها) واعتقد هو ده سبب اختيار العنوان ( أمواج الحياة )

بعد انقطاع فترة كبيرة عن قراءة الأعمال الطويلة نسبيا واعتمادي على الصوتي لضيق الوقت رجعت بقراءة أمواج الحياة للأستاذة چيهان سرور . ورغم أنها ٣٩٠ صفحة لكن أنهتها في جلستين لسرعة وتدفق الأحداث وسلاسة الحوار...

الرواية اجتماعية تدور حول صداقة من النوع النادر بين ستة فتيات طبيبات وما يتخلل حياة كل واحدة منهن من أمواج الحياة وتقلباتها.

وجدت من قصصهن ما هو واقعي ومنها ما هو ممزوج بمبالغة الخيال الجميل أو المأساوي ولكن دائمًا ما تحمل الحياة الحقيقية ما هو أقسى.

بدون حرق للأحداث أدهشتنى نهاية بعض العلاقات وأبكتني نهايات أخرى.

قرأت للكاتبة ميراث الحرمان وأمواج الحياة هو العمل الثاني الذي أقرأه والحقيقة أن طابع چيهان سرور على الاثنين فهي مهتمة بكل ما يصيب النفس الإنسانية من عقد وجروح .

الرواية تعتمد السرد بالفصحى والحوار بالعامية ويغلب عليها الحوار أكثر من السرد.

كل التوفيق وفي انتظار الأعمال قادمة 🌺

اسم العمل : امواج الحياة

الكاتب : جيهان سرور

دار النشر : فكرة

عدد الصفحات : ٤٠٠

بداية هى رواية اجتماعية السرد فيها كان بالفصحى و الحوار بالعامية .

الرواية خفيفة و جميلة و سلسه فى قراءتها ، اسمتعت بها جدا و خلصتها بسرعة لانى كنت حاسه انى بتفرج على مسلسل . اتعاطفت اوى مع ايناس و عجبنى موقفها من البداية لغاية النهاية ، اضايقت من منى و ضعفها و استسلامها و حبيت انها فاقت فى النهاية ، كرهت وليد و مقدرتش اتقبل مبراراته ، يمكن فى البداية كنت بتلخبط شويه لان الشخصيات كتيرة اوى فى الرواية بس مع الوقت حفظتهم و اتعودت عليهم .

حقيقى الرواية جميلة و بتناقش قضايا كتير تخص الزواج و الاسرة .

حبيت اوى الاقتباس ده من الرواية ( بنجرح اللى حوالينا عشان احنا اصلا مجروحون )

رواية ممتعة وتقدم قيم اجتماعية تكاد تكون اندثرت في ظل التكنولوجيا المحيطة بنا الآن