مراجعات رواية بدرية وأم حنان والأفيوناتا : سلسلة بدرية وأم حنان 3

بصراحة أزعجتني الأسماء العلمية المفبركة ..قليلا...أو كثيرا🙃

الفكرة تطرق أذهاننا منذ الأزل ....تناولها الكتاب بشكل جديد..

شخصية ابتهال تشدك بصمتها المعبر😐

الجزء ده توهني شوية، بس توهان محبب للقلب؛ حلوة فكرة صياغة الخيال العلمي بطريقة كوميدية، في طريقي للعدد الرابع♥️

#أحمدمجدي

معانا النهاردة مراجعة كومبو للأربع أعداد الأولى اللي صدرت عن شركة سلاح التلميذ.

تعالوا نبدأ مع الأنطباع الأخير.

أول ما وصلت لنهاية العدد الرابع في السلسلة واللي كان بعنوان البسلة لقيتني بغني وادندن وانا متخيل بدرية وأم حنان مع بعض راجعين من السوق بيغنوا سوا.

"حلوين اوي وطعمين أوي الله أكبر علينا ولا قبلنا ولا بعدينا

أنا وحبيبي احنا الاثنين زي الورد على الياسمين"

فعلا السلسلة دي مختلفة ومميزة وفيها حاجة حلوة من ريحة أهالينا وذكرياتنا وفترة التسعينات والثمانينات.

ومش شايف نمط السلسلة دي غير في أنها مكتوبة عشان تكون مسلسل تلفزيوني ست كوم على نهج "راجل وست ستات - تامر وشوية" في قالب اجتماعي قصير، بس محتاج منتج مغامر ومنتج شاطر.

وبشكل خاص أنا مش قادر اتصور غير الممثلة إنتصار في دور بدرية والممثلة سماء إبراهيم في دور أم حنان.

ويلا بينا ندخل على الانطباع الأول.

يمكن الأنطباع الأول اللي اخدته من العدد الأول إن السلسلة تصنيفها رعب كوميدي لكن مع الأعداد اللي بعد كده احنا محافظين على الكوميديا ومكملين مع الدراما الاجتماعية بشكل اكتر مع شوية تشويق وإثارة وغموض.

وتعالوا نتكلم عن العمل وفكرته.

الغلاف قلت سابقا قبل كده انه مقبول وغامض شوية مفيش أي عامل جذب غير أسم العمل وتصنيفه.

والغلاف هنا هو أقرب إلى لوجو خاص بالسلسلة وهتكون إضافة حلوة لو كل عدد اتعمل له غلاف خاص.

أما عن نمط السلسلة فهي إجتماعي وغموض كوميدي ودي الحالة اللي بتعبر عن الحالة أو الفكرة العامة اللي في السلسلة.

والفكرة بكل بساطة قائمة على اثنين غلابة نقدر نقول طيبين بسذاجة وساعات أغبياء كمان والعالم بتاعهم لا يتجاوز حدود أول الشارع.

اثنين هما النقيض تماما عن أي صورة حديثة للمرأة الاندبندنت سترونج.

ومعانا كم من المغامرات والأحداث اللي بتحصل قبل ثورة التكنولوجيا والعولمة في فترة التلفزيون في أوائل التسعينات تقريبا قبل غزو الانترنت والتكنولوجيا ونتعرف على نمط الحياة في الحارة الشعبية أو المناطق العشوائية وانا أكاد أقسم أن بدرية وأم حنان شخصيات حقيقية واقعية موجودة في حياة وذكريات المؤلفتين.

السلسلة أو الأحداث في السلسلة مصدرها تورط الشخصيات بتاعتنا مع غرائب وعجائب أقوى وأعجب بكتير من قدرة أي واحدة منهم على الفهم والشخصيات اصلا مش مهتمة إنها تفهم.

احنا معانا ردود أفعال مدهشة تعتمد على فكرة الصدمة الحضارية والفكرية.

بدرية وأم حنان عن طريق الصدفة غالبا والغباء احيانا بيدخلوا في مغامرات وتجارب غريبة عجيبة ما بين جملة بتسمعها في التليفون تقلب حياتها أو زائر غامض وغريب في الليل عنده أهداف خاصة وما بين عالم حشرات مجنون أو مخبول يخليهم فار تجارب أو ست غريبة بياعة بسلة مسحورة.

العمل هنا من تأليف كاتبتين هما نسمة جمال ومي غريب وخروج العمل بالتماسك ده والجودة دي يعبر عن مدى التفاهم بين الكاتبين وان كل واحدة منهم كانت ماسكة لجام شخصيتها بدقة عالية.

وتعالوا نتكلم عن اللغة في العمل.

السرد والوصف كان باللغة العربية الفصحى البسيطة والحوار باللهجة المصرية العامية شديدة السطحية والمناسبة بشكل رائع مع أحداث العمل.

كان ملحوظ شوية إن في تكرار في بعض العبارات سردا في وصف طريقة المشي أو الهيئة والشكل في كل عدد، أما الحوار فهو كتير شوية لكنه كان مذهل وبجد كان فاكهة العمل لكن يا ريت شوية اهتمام بتنسيق الحوار عشان ممكن نقول في السلبيات أني ساعات بتوه ما بين الشخصيات ومين قال ايه.

وتعالوا نتكلم عن شخصيات العمل.

لأول مرة نشوف حسب ذاكرتي يعني شخصيات سلسلة في النمط الشعبي العشوائي ده.

شخصيات العمل فعلا عبارة عن شخصيات كارتونية وهي مناسبة للعمل والغرض منه وفكرة استعراض الطبيعة الشعبية وأكيد الجيل الجديد مش هيفهم كتير من الإيحاءات في العمل بسبب تصدر صورة المرأة المعاصرة الحديثة.

تصور وجود شخصيات العمل ده صعب جدا على الجيل اللي ميعرفش ونيس وسنمبل ولا شاف المال والبنون ولا عرف سي السيد والست أمينة.

ولسه طبعا على موقفي وهي إني أكاد أبكي من فرط الضحك كل ما أتخيل رد فعل أي واحدة من أنصار المرأة من بتوع الست مش ملزمة وهي بتقرأ بدرية وأم حنان.

وأخيرا تعالوا نتكلم عن الخلاصة.

سلسلة بدرية وأم حنان عمل خفيف جدا وسريع ومتحمس جدا لو في حد قدر يحول العدد ده لمسلسل ست كوم وده في رأيي المتواضع هيكون لفت نظر وتوعية للجيل الجديد بالجيل القديم.

الأفيوناتا والجزء الثالث من مغامرات بدرية وأم حنان

الجزء ده يمكن تقاسم أدوار البطولة مع بدرية وأم حنان شخصيات تانية زي ابتهال والعالم المتخصص في علم الحشرات ( شمندر ).

العلاقة بين بدرية وأم حنان هي هي، لا تشوبها شائبة، حبايب وبسطاء وبيعرفوا يتحملوا ضعفات بعض.

دمهم شربات كالعادة.

العدد الثالث مش مخيف بالقدر اللي ممكن يؤثر في امرأتين من حي شعبي، مخاوفهم تقتصر على الجن والعفاريت والأسحار والأعمال.

المرة دي الكاتبتين خرجوا عن نطاق مخاوفهم في محاولة منهم لمواكبة العصر ومخاوفه، فالعلم خطير بخطورة الأسحار يصيب بالأوبئة ويسيطر على العقول والتصرفات.

ظلت ابتهال طيلة حياتها تراقب والديها وأمامهما رقعة الشطرنج إلى أن أصبحت هي قطعة من ضمنها تتناقلها الأيدي

ومن خلال إعلان عن وظيفة شاغرة في مجلة ربما لا يقرأها إلاها، تقدمت ونالت المنصب وعملت لدى الدكتور شمندر في معمله.

وياله من يوم غائم ذاك الذي تيقن فيه من وجود حشرة على سطح الجبن الرومي فأسماها باسمه( شمندراسيا أفيوناتا )

للحشرة دورة حياة، للحشرة سُلطات على معيلها وكافلها.

راجل مالاخوليا( كما ترى السيدتان) لكن ربما لم يسقط ضميره في سبات قد يطول ليخرب حياة ابتهال، ومن ثم استيقظ ضمير ابتهال بعد شعورها بذنب تجاه الست بدرية.

لتنتهي مأساة بدرية في الحارة على مرأى ومسمع من حمدي وعم منعم وولده محمود والجارة أم منى بلسانها وحشريتها !

وليأخذن بالثأر مع العسكري

وتظل رضوى تؤمن المؤونة كل ثلاثة أيام تحت مراقبة شمندر طليقها.

النهاية: احتمال تقاطعوا الجبن الرومي حتى تنسوا أو تتناسوا الأفيوناتا دي خالص 🙆🤦

نستمر مع الخليط المميز من السخرية والمضمون الجيد الى حد ما الذي افتقده فى الكتاب الثاني.

فى الكتاب الثالث نغوص فى مغامرة كوميدية جداً حيث تواجه بدرية حالة ادمان فريدة من نوعها. عالِم مجنون يكتشف حشرة غريبة لها دور مهم فى السيطرة على ارادة الانسان من خلال الجبن الرومي !.

من العلامات المُشرقة فى الكتاب اختيار اسماء ساخرة جداً جداً ومميزة بدرجة كبيرة لأسماء الحشرات التى يكتشفها العالِم !.

الحوار كالعادة مفعم بسخرية لا نهاية لها مع اتقان واضح لاسترجاع مفردات الفترة الزمنية التى تدور فيها الاحداث.

اعتقد الكتاب الثالث فى مستوى الكتاب الاول من حيث وجود مضمون هادف ولو كان بشكل بسيط وغارق فى السخرية. هذه هي طبيعة الأدب الساخر بكل تأكيد.

الى اللقاء مع مراجعة الكتاب الرابع والأخير من السلسلة حتى الان ومعها تقييم للتجربة الجديدة بشكل عام.

لا مزيد من الجبن الرومي بعد اليوم

بل لا اعتقد انني سأقترب منها مرة أخري بعد ذلك العدد ومعاناة بدرية ومغامراتها مع الجبن الرومي والشمندراسيا افيوناتا

اعجبني واضحكني كثيرا مسميات الحشرات

سلسلة تجذب القاريء لها بجدارة 👌💖

الجزء الثالث من أضعف اجزاء السلسلة و أن اعجبني النهاية و ما حدث في معمل شمندر

كرهتوني ف الجبنة الرومي الله يسامحكم

كرهت الجبنة التركي