مراجعات رواية بني مفروم

التقييم ⭐⭐⭐⭐⭐

سرد سلس.. لغة جميلة.. تسلسل احداث ممتع.. بناء شخصيات فوق الممتاز... وغيره من الإيجابيات الكتيرة موجودة في العمل الرائع دا

العمل فكرته مفهاش اي جديد.. ومع ذلك عرف الكاتب يخليني اقرأ للأخر دون ملل، الفكرة ببساطة عن احد الخواجات الي له ملكية خاصة (قصر) في أحد القرى الريفية.. وقرر يكتسب قوت يومه من خلال انه يصنع مكن لفرم الأتبان ويبيع ويتاجر.. حتى عشان كدا اسم الكفر بنى مفروم..

وبنشوف حكايات مختلفة لشخصيات الكفر المهموم دا.. تعتبر رواية أجيال بتشوف فيها حياة شخصيات من صغرهم لأخر حياتهم.

⚠️ يصلح العمل لمن هم 18+ لوجود مشاهد عنيفة وجنسية، والتحذير مكتوب في الكتاب ذات نفسه ⚠️

سرد العمل زي ما ذكرت سلس، الجُمل مترتبة بإيقاع كويس وفي تركيبات لغوية وجُمل مركبة وتشبيهات غاية في الجمال..

لغة العمل عربية فصحي ممتازة وبتظهر تمكن الكاتب من لغته.. ودا باين في التلاعب والتشبيهات..

حوار العمل رااائع.. هو عامية مصرية ((ريفية)) جدااا، ودا دعم فكرة انك تتأثر وتعيش مع الشخصيات جداا

شخصيات العمل الي كانت كتيرة شوية.. مختلفة الطباع والشخصيات، كلهم بلا إستثناء تقريبا، تم بناء خلفية تاريخية ليهم، وعمل طبع معين لكل شخصية، وطبعا تصميم معين في طريقة الكلام والميول الشخصية، بحيث تبقي شخصيات من لحم ودم فعلا..

حتى الشخصيات الي خدت بناء صغير او لمحة بسيطة عن حياتهم كانت كافية لدورهم في العمل!!♥️👑

تسلسل الاحداث ممتاز، يخليك متزهقش من العمل.. يؤخذ بس على الكاتب انه استخدم اسلوب تقريري بحت في اول فصل واخر فصل

لكن باقي الفصول من جيدة جدا لممتازة في الوصف المكاني بالذات 👉👉

حبيت اوي العناوين الخاصة بكل فصل♥️

فصول النهاية كانت مثيرة وفيها جرعة تشويقية نادرا ما تظهر في اعمال اجتماعية في المقام الأول

معجبنيش ايه بقا؟؟

اقولك يا سيدي.. حشو المشاهد الجنسية دون مبرر ((في بعض الأحيان)) لأن كان في مشاهد لازم تتعرض لاسباب درامية مفهومة.. لكن الزيادة او المبالغة هي المشكلة

تاني حاجة، وصف ملامح الشخصيات كان مقتضب شوية، مش معدوم ولكنه كان قليل، والاحسن انه كان يزيد شوية فقط🤏

واجب برده اقول ان العمل في مشاهد من ناحية العنف كانت صعبة.. للي مش بيحب يقرأ في النوع دا..

في النهاية عمل ممتاز ارشحه لقارئ بيحب روايات الأجيال الاجتماعية

وبنسبة كبيرة داخل معايا في افضل ١٠ اعمال للعام 😉