مراجعات رواية جرائم الغراب السبع

الرواية دي اقل ما يقال عنها هو الجنان🫨

تبتدا احداث الرواية بعامل توصيل لأحد المطاعم بيخبط علي باب فيلا في ساعة متاخرة، لكنه مش بيلاقي حد بيفتح !

بعد شوية بيلاحظ ان في شيء مش مريح وحس بالخوف لما سمع صوت صريخ مكتوم جاي من جوا الفيلا دي.. فرجع تاني للدراجة عشان يمشي من المكان دا لكن..... 🫣

بعد كدا بنشوف شاب يدعي مازن داخل مصحي نفسية، وشه ملفوف بشاش طبي، وبيحاول يفتكر هو جه هنا ازاي وحصله ايه؟

وبيخوض رحلة علاجه دكتور مصطفى الي من الواضح انه غير متزن نفسيا😮

اه والله طبيب نفسي عنده مرض او يمكن امراااض نفسية😬

مين هو مازن؟ وهل دكتور مصطفي هيعرف يساعد؟ ايه الي حصل في ليلة رأس السنة وما هو سر الغرفة السرية الي موجودة في فيلا بالتجمع ؟

وأحذر من الغراب يا صديقي 😉

⚠️تصلح الرواية لمن هم ١٨+ لوجود مشاهد عنيفة وتلميحات جنسية والكثير من الجنون⚠️

لغة العمل عربية فصحي سلسة كعادة الكاتب بيعرف يكتب لغة تكون مش معقدة وفي ذات الوقت مش ركيكة.. وكذلك الحوار كان بالفصحي دا غير انه كان قوي جداا ومربوط بأحداث العمل مش رغي بدون سبب

وصف المكان كان مجسم ووافي لتحفيز خيالك علي رسم صورة المشهد

يمكن وصف ملامح الشخصيات كان قليل عن المعتاد في العمل دا

وبما اني ذكرت الشخصيات فتعالوا نتكلم عنهم..

شخصيات العمل مش كتيرة بس مش قليلة برده

انت عندك شخصيتين رئيسيتين الي هما مازن والطبيب مصطفي، ومع حكي مازن للأحداث بنبدأ نقدم شخصيات تانية تقريبا كلهم اساسيين برده مش ثانويين، وجانب الشخصيات دا بالذات مش عايز اتكلم عنه كتير لانه في حرق، بس...

اضمن لك انك هتقرأ عمل متعمق لدرجة الرعب في اعماق النفس البشرية وتطبيق لنظريات علم النفس.. هتخليك فعلا تخاف من الإنسان وعلي قدرة عقله في الي ممكن يعمله

طبعا دا غير بناء خلفية تاريخية وتبريرات ممتازة للافعال وافتكر كلامي كويس 😉

العمل كان ممتاز في تصميم مشاهد الهلوسة والتخيلات وصنع عوالم خاصة يمكن فكرتني باجواء الفيل الازرق وانا بقراها كان عندي نفس شعور الجنون دا

بالإضافة لمشاهد دموية.. واخوك يموت في الرعب المعوي، وإدخال انواع اخري من الفوبيا زي الزواحف مثلا..!

عايز اقولك ان إحتمالية فقدانك لعقلك في كشف اسرار العمل دا كبيرة😂

انت عندك بدل المفاجأة تلاتة وكل واحدة اقوي من التانية

وصعب جدااا تتوقع، لو توقعت هتتوقع واحدة بالكتير

نفسي اتكلم علي حاجات كتير بس فعلا خايف احرق، ركز في مشاهد المصحي (لو انت قارئ قديم لأعمال خالد امين هتفرح اووي) ✨البهجة✨

✨الباخرة✨

ركز في التفاصيل 🫨🫨

الخلاصة..

عمل مجنون، مزيج من الرعب والجريمة وشوية اجواء ميتافيزيقيا

انصح بشدددة♥️♥️

🌚 جرائم الغراب السبع 🌚

رواية للكاتب : خالد امين

عدد الصفحات : ٣٠٣ صفحة

دار النشر : دار دون للنشر والتوزيع

تصنيف الرواية : رعب نفسي / جريمة / غموض / خيال / اثارة و تشويق

🌚 نبذة عن الرواية :

❞ لقد وجدوا اسرة ليلة رأس السنة ، رب الاسرة جثة هامدة ، و زوجته الراحلة بالقرب منه ، لقد تم التمثيل بجثثهم و هناك جثة عامل التوصيل عاثر الحظ ، و ناج من المذبحة شاب فاقد الوعى ❝

تبدأ أحداث الرواية بتوجه يوسف عامل التوصيل لأحد المطاعم لڤيلا في التجمع الخامس لتوصيل طلبهم ليفتح باب الڤيلا و يري يوسف ثلاث جثث يحاول العودة الى دراجته مذعورا و لكن لا مجال للهرب و أصبح جثة هو الآخر

❞ اشعر وكأن شياطين جهنم كلها ستزورني ❝

يستيقظ مازن ليجد نفسه في مستشفى ووجهه مغطى بالضمادات لا يتذكر شيئا على الإطلاق مما حدث في تلك الليلة المرعبة . لا يتذكر سوى ان اخته رنا مفقودة و انه الضحية الناجية من مجزرة بشعة لعائلته ليلة رأس السنة ، الليلة التي زارته بها شياطين جهنم اجمعين

يجلس بجانبه الطبيب النفسي د / مصطفى سيساعده ذلك الأخير في استعادة ذاكرته و تذكر ما حدث له و لعائلته و للبحث عن أخته المفقودة دكتور مصطفي دكتور بارع و مجنون في نفس الوقت يمتلك طرق غريبة و عجيبة لاكتشاف أسرار العقل البشري

❞ لكل قصر غرفه المظلمة ❝

كانت ڤيلا مازن يحتوي على غرفة مغلقة مظلمة كان والده ينهاه دائما هو و أخته عن الاقتراب لتلك الغرفة

كانت تلك الغرفة غامضة مرعبة يصدر منها كل حين و حين اصوات مرعبة و حركات مريبة

_ تري ماذا حدث لعائلة مازن ؟؟ واين اختفت اخته رنا ؟؟ و من الذي فعل بهم تلك المجزرة البشعة ؟؟؟

_ ما سر ذلك الطبيب النفسي المعالج ؟؟ و ما هي الطرق المجنونة التي تساعده في اكتشاف العقل البشري وهل سيستطيع استعادة ذاكرة مازن ام لا ؟؟؟

_ ما المفاجأت التي تنتظر د. مصطفى و كان يخفيها الناجي الوحيد من ذلك اليوم وتلك الليلة و التي سيكتشفها أثناء جلساته النفسية معه

_ ما سر تلك الغرفة الغامضة ؟؟ و ما سر تلك الأصوات التي تصدر منها ؟؟؟

❞ كل ليلة وضحاها ، يحلق أحد الغربان … كل ليلة و ضحاها يسقط احد الغربان كل ليلة من الليالي السبع ، و قريبا ستحلق كل الغربان سويا … ❝

انتم الان على موعد مع الغراب فبين صفحات الرواية ستكونون في ضيافة الغراب لاكتشاف الأسرار حتى تصلوا

الى الحقيقة الكاملة وراء ما حدث في تلك الليلة المرعبة

🌚 السرد والأحداث :

السرد كان بطريقة سلسة و ممتعة للغاية

تتكون الرواية من ٩ فصول مليئة بالاثارة و التشويق فمن أول صفحة في الرواية يدخلك الكاتب في التشويق و الاثارة و كل فصل من الفصول يحتوي على مفاجأة صادمة و جديدة للقارئ

الأحداث كانت سريعة و مشوقة غامضة مليئة بالإثارة لن تستطيع التقاط أنفاسك وأنت تقرأ الرواية و لا مجال لتوقع الأحداث فالاحداث غير متوقعة وصادمة

التنقل بين الأحداث كان رائع جدا جدا و ممتع و مشوق

🌚 الشخصيات :

تم رسم الشخصيات بطريقة رائعة جدا و مبدعة مع مراعاة و تحديد وقت ظهور كل شخصية و دورها ليخدم الأحداث

اعجبت بشخصية د.مصطفي جدا و طرقه المستخدمة في تحليل الأحداث و أحببت شخصية مازن

🌚 رائي الشخصي :

🔮 رواية رائعة جدا جدا استمتعت جدا بقرائتها، يمكن إنهائها في جلسة واحدة انهيتها في جلسة واحدة من شدة التشويق و الإثارة والمفاجآت اللي في الرواية وتضرب أي توقعات بعرض الحائط

🔮 رواية تشدك و تستحوذ على القارئ من أول صفحة يأخذنا الكاتب مع أحداث ليلة رأس السنة المرعبة تم التشويق و الاثارة مع طرق علاج د.مصطفى حتي نصل الي الصدمة مع اكتشاف سر كل من مازن و د مصطفي

🔮 الرواية حقيقي تحفة فنية بمعنى الكلمة من حيث وصف الكاتب للمشاهد والأحداث و الحبكة الجيدة و طريقة رسم الشخصيات و أسلوب السرد

كل دا غير الجزء النفسي في الرواية والتحليل النفسي والأمراض النفسية حقيقي اكثر من رائعة واستفدت منها كثير

🔮 عجبني جدا ال plot twists الموجودة في الرواية و النهاية كانت صادمة وغير متوقعة

🔮 عجبني جدا ال cross over الموجود في الرواية فالكاتب كما عودنا استخدم شخصيتين من رواياته السابقة

هما ناردين و صلاح

🔮 جرائم الغراب السبع هي لقائي الرابع مع أعمال الكاتب خالد امين و ان شاء الله اكمل قراءة أعماله السابقة و في انتظار الروايات القادمة بإذن الله

🔮 ارشح الرواية لمحبي روايات الغموض و التشويق و الجريمة و اتمني ان تتحول الى فيلم لانها حقيقي تحفة فنية رائعة

اتمني للكاتب Khalid Amin التوفيق دائما

و دايما يا رب من نجاح لنجاح

🌚 اقتباسات من الرواية :

🔮 الشيء الأسوأ من اهانة احدهم لك هو اعتبارهم بأنك غير موجود

🔮 أن اللاوعي رجل يحيا من اجل التفاصيل ولا ينسى شيئا

و هو يحاول دوما اخبارنا بشئ

فقدان الذاكرة هي صراع قوي بين الوعي و اللاوعي الاول يريدك ان تنسي و ان يحجب عنك صدمة مؤلمة و لكن لاوعيك يقاتل من أجل ارشادك للحقيقة و لن يهدأ له بال حتي يريك اياها

🔮 يا لنظرة عيني من يفهمك حقا ،بهما دفأ براكين التاريخ كله

نظرة واحدة صامتة ممن يفهمك ، بكل كنوز العالم

ماهذا الجنون ؟!

جرائم الغراب السبع للكاتب خالد امين

رواية صعب تصنيفها ( جريمة ، رعب ، غموض ، اجتماعية ، نفسية ، علمية ) قل ما تشاء ..

التقييم ⭐⭐⭐⭐⭐

صعب أعطى رواية هذا التقييم لكن أنا حر ، أعجبتنى وأشبعت عقلى بوجبة دسمة متبوعة بشاى بالنعناع ..

١- هذه أول تجربة مع الكاتب ولن تكون الأخيرة بإذن الله .

٢-شجعنى على قرائتها مراجعات القراء المحترمين كذلك غموض الإسم وتاريخ الكاتب المميز. وأنا أحب روايات الجريمة والغموض .

٣- الحبكة :

جاءت قوية ومقنعة ، أستطاع الكاتب شد إنتباهى وإثارة فضولى من أول صفحات الرواية حتى منتهاها. ستندهش من المفاجآت والصدمات .

٤- الشخصيات :

مرسومة بشكل جيد ومترابطة ، نجح المؤلف فى إيصال مشاعر ومشاكل أبطال الرواية بشكل جيد جداً .

٥- اللغة :

فصحى ، قوية وكانت بعيدة عن المصطلحات المعقدة والركيكة كذلك ، كما جاء الحوار ممتعاً.

٦- السرد :

كان جيداً ، جاء على لسان الكاتب بلغة جيدة خالية من الأخطاء النحوية فى حد علمى .

٧-رأيى الشخصى :

رواية ممتعة ، لن تندم على قرائتها . الكاتب متمكن خاض الكتابة عن تجربة جديدة ، التلاعب بالنفس البشرية وطمس الهوية وكلام كثير عن الوعى والاوعى ، كل هذا مخلوط بجرائم وغموض ورعب . أنصح بها جداً...

٨-اقتباس :

" ربما يومًا سوف يتهمونني بالجنون، ولسوف يتساءلون لماذا لم أقتلهم فحسب؟ لماذا الانتظار لعامين حتى تنجح التجربة ويفقدوا هويتهم ''.

٩-نبذة مختصرة :

جريمة قتل فى ليلة رأس السنة وغرفة مغلقة لا يعلم أحد عنها شئ وطبيب نفسى حاصل على جائزة نوبل يتابع حالة مازن الناجى الوحيد من المذبحة ، ترى من القاتل وماسر الغرفة وماذا وراء ذلك الطبيب ؟! استعد للمفاجآت .

١٠-أشياء لم تعجبنى :

بعض الأخطاء الإملائية ، لكن غير مؤثرة .

#أحمدمجدي

خلونا نبدأ مراجعتنا هنا مع الأنطباع الأخير.

أول ما وصلت للنهاية وخلصت الرواية لقيتني بقول في نفسي

"أنت جبت الدماغ دي منين يا جدع؟؟ دي دماغ ألماظات"

أقسم بالله أسيادنا راضيين عليك،

أيه ده؟ أيه الحلاوة دي؟ هو في كده يا جدعان؟ هو في ايه بقى؟؟"

أنا حرفيا مش قادر أستوعب الكاتب كتب الرواية دي إزاي..

دي مش رواية أصلا دي تحفة قسما برب العزة.

ويلا بينا نبدأ المراجعة مع الانطباع الأول

أكيد ممكن نعرف من شكل الغلاف والكلمة على الظهر والتعريف إن الرواية نفسية بوليسية اجتماعية مع شوية فلسفية ولو عايز تحط رعب مفيس مانع

أما عن الغلاف نفسه فهو صراع ما بين الأسود والأحمر الموجود بكثرة ودموية وبصراحة الغلاف تحفة فنية ويعتبر لوحة لوحدة واختيار الخط كان مميز.

والمقدمة كانت حلوة أوي والافتتاحية كانت متميزة بس خلوني أقول أنها كمان عبقرية.

مشهد البداية كان ماستر يا جماعة الكاتب بيدخل معانا الرواية من مبدأ شايف العصفورة؟

الكاتب حرفيا دخل علينا بشوية حلويات وفطير بالشيكولاتة على موتوسيكل دليفري وقال شايفين عامل الديليفري؟؟

الشاب الحليوة الطموح الرومانسي اللي عيد ميلاده النهاردة ده؟؟

شايفين الأمل على وشه رغم الظروف السودة اللي عايشين فيها دي؟؟

أهو الشاب ده هيموت كمان دقيقة موتة صعبة جدا مرعبة وغامضة وملناش دعوة بيه خالص وانسوه بقى.

حرفيا انا اشتريت يا عمنا وعايز من كده كتير.

ويلا بينا نتكلم عن العمل وفكرته.

بصو هو العمل وفكرته حاجة كده صراع ما بين المنطق واللامنطق والوعي واللاوعي، لو عايز تفهم الرواية يبقى لازم تكون شفت على الأقل فيلم "أنفصام أو Split" أو ثلاثية إيسترايل كاملة.

والله العظيم ده واحد من أصعب المراجعات اللي كتبتها في حياتي أنا بقالي يوم كامل برتب فيه أفكار.

أصل فكرة العمل معتمدة على خيال جامد صراحة وجاحد كمان تخيل معايا كده جريمة قتل بشعة وضحايا كتير وطبيب نفسي مصاب بالإنفصام أو خليني أقول متعدد الشخصيات الخيالية وتحقيق نفسي وتنويم مغناطيسي وما خُفي كان أعظم.

الميزة في الفكرة إنها مجنونة مش تقليدية وكأننا في نمط رواية غير طبيعية بالمرة،

وفي وسط ده كله أنت كقارئ مش فاهم حاجة بس مبسوط وعمال تكمل قراءة وفجأة تلاقي نفسك فهمت حاجة والكاتب لما يعرف إنك فهتم يقوم يقلب عليك الترابيزة وينسف كل أفكارك في كلمة واحدة.

ولو جينا للكلام تعالوا نتكلم عن اللغة في العمل

الرواية بالكامل باللغة العربية الفصحى وبسيطة في المصطلحات وغير متكلفة ولكنها بلاغية وشاعرية وفي رأيي هي صالحة لكل القراء بداية من 15 سنة عشان الأطفال مش هتفهم حاجة وهيجيلها صداع نصفي من أول فصلين.

عن نفسي كان في مزيكا في الكلام والتعبيرات والوصف والسرد والحوار.

نت مبسوط جدا جدا في القراءة لولا مشكلة المراجعة اللغوية، للأسف كان عندنا كام خطأ إملائي أو لغوي في الرواية بس مش ملحوظ على مستوى العمل كله.

بعض المصطلحات تقف معاها وتقول يا سلام عليك يا سيدي زي مثلا

❞ العرائس هي جمهور مسرح البشر، ❝

❞ كل هؤلاء الذين قضوا دهورًا محبوسين داخل أسوار مملكة اللاوعي الأعظم.. ‫ لقد انفتحت البوابة.. وخرجوا مهلِّلين.. ‫

الحزن.. كثرة التفكير.. جلد الذات.. الصدمة.. الألم.. الغضب.. وقاد مسيرتهم سيدهم الأوحد.. الجنون.. ❝

وللأسف كان في مشكلة تانية ظاهرة بشكل أقوى وهي تنسيق الحوار، كان لازم يتم تسيق الحوار في العمل بشكل أحسن من كده، ولو اتكلمنا عن الحوار فلازم نقول:

أه ثم أه ثم أه من الحوار، كل جملة حوار محطوطة صح ومعبرة جدا جدا عن كل شخصية وتكاد من فرط الجمال أسمع صوت الشخصية وهي بتتحدث.

ولو جينا عند الشخصيات في العمل فلازم نقول أنها استثناءية

حرفيا الشخصيات في الرواية كتييييير جدا بس قليلة جدا عشان كل شخصية حاملة جواها شخصيات تانية خالص وأفكار تانية خالص خاص.

من وجهة نظري إن شخصيات العمل ده كله ممكن يتعمل عنها دراسة مفصلة.

ي كل شخصية منهم عايزة رواية لوحدها أصلا.

ومع كتر الشخصيات إلا إن كل شخصية محطوطة لسبب وغاية وهدف ومش هتفهم حاجة غير في النهاية.

وأخيرا تعالوا نتكلم عن النهاية والخلاصة.

الرواية دي فعلا استثنائية ومش طبيعية ودخلت قلبي واتربعت وبقى ليها مكانة زي بالظبط رواية "حبة بازلاء تنبت في كفي" وبكل تأكيد أنا الكسبان من قراءة العمل ده وتجربة الاستمتاع بالعمل ده معتقدش انها هتقف عند مرحلة القراءة الأولى، في يوم ما لازم أرجع وأقرأ العمل ده تاني وإن شاء الله هجيب نسخة ورقية منه وهيكون عليها توقيع الكاتب.

"عالم البشر مخيف حقا"

رواية رعب نفسي جيدة للغاية 👌 تبدأ القصة بمقتل عامل توصيل بطريقة بشعة أثناء توصيله طلبيه لبيت غريب لا يدرك ما بداخله.. في الأول أفكترت ان الرواية حوالين اكتشاف القاتل ولكن مع الوقت لقيت انها حوالين اكتشاف أسرار العيلة اللي عاشت في البيت الغريب.. واللي نجا منه شخص واحد بس هو "مازن" وكان فاقد جزء من ذاكرته.. وكان بيساعده الشخصية التانية هي شخصية الدكتور النفسي غريب الأطوار د. مصطفى.

الجزء المرعب بالنسبة لي هو الجنون والعبث بلا سبب .. فيه ناس ممكن تأذي وتقتل بأبشع الطرق بدون سبب.. المستوى اللي ممكن توصله النفس البشرية من الجنون والتفنن في إيذاء الغير كان اكتر حاجة خوفتني وأنا بقرأ..

الجزء الأول من الرواية بنحاول نكتشف أحداث الليلة الغامضة في البيت الغريب عشان يجي blot twist في نص الرواية بالظبط يخليني أتفاجأ 😅 ومعرفش ماتقعتهوش ازاي.. بس الكاتب كان راسم الشخصيات والمعلومات بطريقة تشد وتلخبط في نفس الوقت.. وكنت بتوقع و أخمن مين القاتل المجنون لحد ما وصلت لجملة..

❞ فقط تذكَّروا أن الحقيقة دومًا بسيطة بعيدًا عن كل المشتِّتات ❝

قولت بس أبطل تخمينات بقى واقرأ وانا ساكتة 😂

الأجزاء اللي في معظم الرواية فيها تحليل نفسي وده من أكتر الأجزاء اللي عجبتني وكان فيه عرض لأمراض نفسية زي تعدد الشخصيات وشلل النوم وغيره..

وأجزاء كانت معنية بالخرافات المتعلقة بالأمراض النفسية دي.. ودي حاجة كانت لطيفة بردو..

فيه شوية مشاهد في النص كدة كانت أوفر بالنسبة لي صراحة وحسيت باشمئزاز شويتين.. وال blot twist اللي في النهاية بردو عجبتني وماتوقعتش الليفل ده من الغرائبية.. هيا غرائب فعلا..

جنون.. وغموض.. وتشويق.. وأمراض نفسية.. وجرائم.. وانتقام من نوع آخر.. عبث.. تحليلات نفسية وخرافات.. كل ده موجود هنا 👌

أخيرا أحب أُبدي إعجابي بتصميم الغلاف الألوان والصورة والكتابة كانوا عامل جذب بالنسبة لي.

#ريفيو

اسم الرواية: جرائم الغراب السبع

اسم الكاتب: خالد أمين

دار النشر: دوّن للنشر والتوزيع

عدد الصفحات: ٤٠٨ علي أبجد

النوع: اثارة /رعب نفسي

التقييم:⭐️⭐️⭐️⭐️

تقييمي:

رواية حرفياً ممتازه من جميع النواحي ، الجانب النفسي قي حتة تانيه واد ايه البشر جواهم بلاوي !!

ف الاول القارئ بيكون مشدود جداً بتسارع الاحداث وجريمة قتل وتفاصيل كتير غريبه…

واحده واحده تلاقي انت نفسك داخل علي حالة من الفصام😅 مش عارف مين الطبيعي من المريض النفسي!!

الكاتب اثبت لنا ان تعدد شخصيات الرواية مش من عوامل نجاحها ولا حاجة ، الكاتب استخدم يعتبر شخصيتين محور الرواية كلها في عدد الصفح الكتير دي متخيل؟

من اول صفحة لآخر صفحة قِدِر يشد القارئ بنفس اللهفه.

رواية اشجع علي قرائتها بشده👏🏻👏🏻👏🏻

💛اقتباس من العمل:

📌•• لاحظت عبير انه برغم كل شئ فإن ايديهم ترتعش، وتشابكت أصابعهم كأنهم يستمدون القوة من بعض، انضمت هي اليهم بِحيِرة، في حين ربَّت تشابلن علي كتف كاليجورا مضيفاً : هيا بنا؛

وقف كاليجورا وقد رسم تعبيراً حزيناً علي شفتيه الملطختين بالطلاء الاحمر-مُهرّج حزين- وسار معهم الي الركن الايمن من المسرح ؛ مروّا جوار اسماعيل يس فنظروا اليه في صمت متسائلين ان كان سيأتي او لا، نظر اليهم "ابوضحكة جنان" وغطّي وجهه بيديه بطريقة مضحكه وهو يقول بصوت مضحك 'يادلعدي '، 'يا عيني'

-لن ياتي هيا بنا……

رواية أقل ما يقال عندها أنها دسمة .. بالأفكار والأحداث والمفاجآت .. أحببت ذكاء الكاتب وكيفية رسمه للشخصيات بعناية وسلاسة لا يتيه معها القارئ رغم كثرتها في بعض المواقع .. تسارع الأحداث الرتيب في البداية كان مبرراً ومحبباًّ بحيث استطعنا التركيز على القصة إلى أن حدثت أول مفاجأة قلبت بنا موازين اللعبة فأضاءت بذلك قرون الاستشعار في أدمغتنا ورفعت انتباهنا وتركيزنا إلى أعلى نقاطه .. وهنا تسارعت وتيرة الأحداث لتتماشى مع الحالة الجديدة التي خلقها الكاتب دواخلنا .. وبهذا احترم ذكاء القارئ واحترم زيادة اهتمامه فقدم بذلك ما يكفي وجبة دسمة تشفي فضوله وتجيب أسئلته ..

هكذا تكون هذه الرواية أول قراءاتي للكاتب وقطعاً ليست الأخيرة .. كانت تجربة فريدة لا يشوبها سوى ملاحظة بسيطة عن أسلوب الوصف المعتمد في بعض الأماكن والذي اعتمد على "الشخصنة" .. في الحقيقة لم أجده موفقاً بل كان الأمر مزعجاً وأنا أرى القلق والغضب مثلا يتعاركان بالأطراف .. غير هذا كان العمل مميزاً ..

في ليلة رأس السنة المليئة بالسحر والاحتفال، تحدث جريمة غامضة تهز أسس السكون، حيث يُباد أفراد عائلة بأكملها في بيتهم، ما عدا شخص واحد ينجو بأعجوبة، لكنه يجد نفسه محاصرًا في متاهة من النسيان والغموض. "مازن"، الناجي الغامض، يعود للحياة في ممرات المستشفى دون ذاكرة، يتيه بين ذكريات مفقودة وألغاز مشوّقة.

يبدأ سرد الرواية بكشف لغز الجريمة المروعة بمساعدة أبحاث الطبيب النفسي، لكن سرعان ما تتفاعل الأحداث بشكل لا يمكن توقعه، وتتحوّل هذه القضية الى شبكة من الاسرار المدفونة في أعماق العائلة والطبيب نفسه، مما يزيد من تعقيد الألغاز ويعمق الغموض بشكل مثير.

بين ماضٍ غامض وحاضر مربك، تتجلى العلاقات المعقدة والشخصيات المخفية، لتضفي على القصة طابعًا فريدًا من التشويق والإثارة. كلّ لحظة في هذه الرحلة الغامضة مليئة بالمفاجآت والمعارك الداخلية التي تحافظ على نبض القصة وتثير فضول القارئ للكشف عن حقيقة "جرائم الغراب السبع".

رواية مجنونة جنان رسمي 😂

تحفة فنية لا غبار عليها.

ديما كنت بسمع جملة بتتقال عن فيلم او رواية " انها بتغوص فى أغوار النفس البشرية" بس دي أول مرة أحس إن فعلا فى رواية بتتعمق فى النفس البشرية بالشكل ده.

الفكرة والسرد والحبكة والشخصيات وكل تفصيلة فى الرواية تستاهل ١٠/١٠ ونجمة وممتاز كمان.

أول مرة اقرأ للكاتب خالد أمين ومش حتكون أخر مرة أكيد🌹

مش دي نوعية الرعب اللي انا متعودة اقرأها ف روايات الكاتب الرواية خيبت ظني بكل المقاييس السرد ممل و لقطات المسرح مخليه مفيش رعب معرفتش اندمج معاها خالص

من الرويات القليلة اللى مهما حاولت تتوقع هيحصل ايه مش هتعرف ... و هتفضل تتنح كل مرة.

رواية عالمية بأيد مصرية ..

رواية طويلة نوعا ما

جميلة و مختلفة

الروايه جميله وتستحق القراءه

هو لما بشترك كل الكتب بتفتح؟