" لطالما حلم البشر بفرض سيطرتهم على الكائنات الأضعف، صنعوا أحواضاً للأسماك، وحدائق للحيوان.. لو قرأت روايات الرعب، شاهدت أفلامه، ستُلاحظ أمراً واحداً يتكرر على الدوام، ستُلاحظ أن الخير دائما ما ينتصر في النهاية، وهذا أمر غريب غير قابل للتصديق! في دنيانا هذه لم يُعد الخير موجوداً من الأساس كي ينتصر، مهما كان الإنسان خيراً لابد من إثم يلوث نقاء روحه، ستُلاحظ كذلك أن البشر دائما ما ينتصرون على الجان والشياطين التي لابد وأن تنهزم في النهاية من أجل أن تُرضي الجمهور المتعطش لانتصار الخير لكن اسمحا لي أن أسألكما سؤلا واحداً: هل يستطيع الإنسان أن يسيطر على الأنواع المختلفة من الشياطين دون الاستعانة بأي مساعدات خارجية؟! "
اسم الكاتب: محمد عصمت Mohammed Esmat
اسم العمل: وُهاب الشروق
نوع العمل: رعب عن دار نون
عدد الصفحات: ٣١١
الغلاف:
احب أقول في البداية أن تصميم الغلاف، وألوانه حلويين جدا، العناصر الموجودة فيه استغربتها وقت قراءة الفصول الأولى لكن مع انغماسي في القصة أدركت أد ايه هي مترابطة بصلب القصة، والحبكة الأساسية..
ملخص القصة:
أحداث الرواية بتدور في عالم قدرت فيه الشياطين تمنع شروق الشمس؛ عشان تقدر تتجول براحتها، وتنشر شرورها لكن مجموعة من صيادين الشياطين المتمرسين قدروا يوقفوا الشياطين دي عند حدها.. ويأسسوا إدارة
(وُهاب الشروق) اللي بيكون دورها قتل، وحبس الشياطين دي، ووهب الأرض شروق جديد.. بنشوف الرواية من منظور صياد الشياطين (هادي) اللي بيبدأ يواجه سلسلة من المشاكل المتتالية في الإدارة، وبيحاول يحلها قبل ما توصل لتدمير الإدارة كلياً، وكمان بيحاول يوصل للحقيقة اللي بتغير رؤيته تماما لكل حاجة..
الحبكة والسرد:
لغة الرواية عربية فصحى سلسلة بتخلينا نخوض الأحداث بسرعة وبسهولة، وفي النفس الوقت مطعمة بالعبارات الرنانة، والاقتباسات شديدة الواقعية..
فكرة العالم جديدة ومختلفة، ومسار الأحداث من البداية ولحد الوصول لذروة العقدة وحلها تصاعدي جدا.. خلاني مش قادرة اقف في نهاية أي فصل لأنه كان محمس بشكل كبير جدا للفصل اللي بعده..
طريقة عرض الفلاش باك الخاص بالشخصيات كان قوي بشكل ملحوظ، وفي محله تماما لأنه بيجاوب على تساؤلات بتخطر في بالنا تحديداً وقت ظهور الفلاش باك.. التفاصيل الصغيرة اللي بتظهر على مدار الأحداث، وبتترابط كلها في النهاية للكشف عن الحبكة الأساسية للعمل تم عرضها بشكل ممتاز، واحترافي..
عرض أنواع مختلفة من الشياطين اللي منبعها أساطير من أرض الواقع، ووصف سماتها بتأكد المجهود المبذول في البحث، والتقصي عشان العمل يطلع بالصورة وبالمعلومات دي، مشاهد الرعب كانت مكتوبة بشكل ممتاز، وإضافة العنصر النفسي ليها، وربط بعضها بالأشياء المادية -اللي سببت نوع من التروما بعد كدا لبعض الأبطال على مدار حياتهم- كان عظيم جدا.
الشخصيات:
رمادية بشكل مبهر، لازم أشيد جدا بجوانبهم النفسية وتأثرهم بخبرات الماضي المحفورة لسه في ذهنهم، ومأثرة على ردود أفعالهم، وتصرفاتهم بشكل عام، بناء الشخصيات الواقعي خلاني مش عارفة احدد موقفي من بعضهم..
وإذا كانت افعالهم صح أو لا رغم تفهمي لداوفعهم، وتعلقي بيهم.. ودي نقطة للاشادة برده أن هنا مفيش شخصية سطحية لا كل الشخصيات ثلاثية الأبعاد ليها عيوب ومميزات.
الملخص:
عمل رعب ممتاز، أحداثه متصاعدة جدا، وصفحاته بتجبرك على إنهائها في جلسة قراءة واحدة..
السرد، التفاصيل، ومشاهد الرعب رائعة وموترة فعلا..
ثري بمعلومات عن أنواع شياطين، ومخلوقات خوارقية مقتبسة من أساطير من واقعنا بتضيف لنا وبتثري معرفتنا.. حبكة بتفاصيل مترابطة للغاية، وشخصيات رمادية بنفضل متوترين لهم على مدار الأحداث، وخايفين نفقدهم في أي لحظة في عالم بفكرة جديدة، ومختلفة..
ومنتظرة اشوف روايات، وقصص تانية كتير بتدور في نفس العالم، مُرشح بقوة لأي حد بيحب الرعب، الأحداث المتصاعدة برتم حماسي جدا، والشخصيات المبنية بحرفية شديدة..
#وُهاب_الشروق
