مراجعات رواية ذات مرة في الطريق المظلم

الرواية : #ذات_مرة_فى_الطريق_المظلم

الكاتب : #خالد_أمين

عدد الصفحات : ٤٠٢

دار النشر : #دار_دون_للنشر_والتوزيع

❞ ألم يحذركم أجدادكم من عدم الوقوف لعابر سبيل❝

😬😬😬😬

تخيل معايا كده

طريق سفر 🧳

ولسه قدامك كتير علشان توصل قريتك

الدنيا ليل 🌙

مؤشر 🧭 البنزين ⛽️ بينور 💡

مراتك 👩‍🦰 معاك فى العربية

هتعمل ايه 🙄

فكر 🤔

فكر تانى 🧐

مفيش قدامك غير انك توقف ✋🏻 عربية🚘 تانية يمكن تساعدك 👨‍🔧

🤙🏻 طريق الساحل طريق الساحل 🗣

وقفت عربية سودا شيك ، نزل منهم شخص انيق

و لطيف ☺️ هوووب اتخدعتم فيه 🤦🏼‍♀️

ليه بس احنا لسه مشوفناش منه حاجة …

بس قلب 💙 المدام اتوغوش 😬

حاولت تبين قلقها بس ما باليد حيلة

الليل ليل 🌙 ولازم نأيل 🥱😴

ركبتوا العربية الشيك .. وابتدت رحلتكم مع " آدم"

❞ ثوانٍ معدودة تصدمك كقطار غاضب لتغير من مجرى كل شيء ❝

قالولنا زمان ولسه بيقولولنا …

‎ اوعوا حد غريب يكلمكم يابنات"

‎اوعوا حد يسقيكم حاجة وتشربوها يا بنات ..

‎لو راجل قرب منكم صوتوا

‎لموا عليه الناس يا بنات

‎".. مش دا اللي كنت بتقولوا يا خويا

😄

تركب مع حد غريب بليل فى طريق سفر ليه يا "حاتم" لا وكمان معاك المدام ..

طيب ايه المشكلة ما خلاص بقى الناس لبعضيها 🤗

هو مين آدم ده ⁉️

واحد متعرفش تصنفه طول الرواية متبقاش عارف

انت انسان 🧍🏼بجد زينا

تصرفاته غريبة على البشر

يبقى عفريت 👻

لا مظنش برضه اصله مش بيظهر ويختفى كده ومبيعملش حركات عفروتية

🤡

طيب يمكن ملبوس 👹

تؤ تؤ … شكله decent هو بس كلامه غريب

يمكن مجنون 🤪

🤷🏼‍♀️ علمى علمك 😈

عمل ايه طيب …

حرق 🔥" منى " قدام " حاتم " 😬😬

وعلى لسانه جملة واحدة " هاخد بهجتك "

ينيلك 🤦🏼‍♀️

ديه البداية بس …مع آدم

ياترى هتاخد بهجة مين كمان ❓❓

ممدوح و سها ،

سراج ،

آيتن

عامر ……

ويبدأ " حاتم " يدور على الحقيقة ورا اللى حصل

❞ أسئلة كثيرة بلا أجوبة.. من هو آدم؟ لماذا يعترف ممدوح بجريمة لم يرتكبها؟ لماذا ينتحر الخفير؟ من هي سها عبد الغفار حقًا؟ لماذا يدمر آدم حياة حاتم دون أي دافع واضح؟ أسئلة كثيرة بلا أجوبة ❝

بس مش دايما الحقيقة بتريح ولا ايه ‼️

فى حاجات بتتدارى عنا رحمة بينا لان معرفتها هيبقى عواقبها مؤلمة علينا … للمعرفة ثمن باهظ

قد 💪🏻 ثمنها ❗️

والله حتى لو مش قدها هتفضل تدعبس برضه انك تعرف للاسف طبع فينا الفضول

بنبقى فاكرين هنرتاح وبعد ما نوصل نقول " ياريت اللى جرى ما كان "

بس اللى دفع " حاتم " للمعرفة مش فضول

ده " حب"

حب اتقتل قدامه وهو متقيد مش عارف يحميه

حقه يتجنن ويثور ويفضل يلف ويدور

يدور على اللى اخد بهجته 🥺

❞ الحقيقة مؤلمة قليلًا فحسب.. بها نكزة 📌لا بأس بها كحقنة 💉في مؤخرة 🐒شخص يهاب الحقن.. 😁😁❝

رواية ولا كأنها فيلم 🎞 اجنبى

من اول صفحة 📄 فيها وانا بتخيل الشخصيات والأحداث والمشاهد كنت شايفاها قدامى

تشويق موجود … قصة حلوة

٤٠٢ صفحة صحيح بس guess what 😄

خلصتها فى ١٢٠٠٠ steps وانا بلف التراك يعنى على يومين كده 😉 شايفاك ياللى بتحسب 😂

وعلى الرغم ان النهاية صدمتنى لانها بعيدة عن توقعاتى 🤦🏼‍♀️ إلا انها تحسب للكاتب شطارة منه اخدنى بفكرى فى اتجاهات تانية تماما عن السيناريو اللى هو حطه 👏🏻👏🏻👏🏻

اول مرة اقرا للكاتب ✍️ وعن چد 😀 استمتعت بالرواية واكيد اكيد هقراه باقى اعماله 💙

قاريت الرواية عن طريق أبليكشن #أبجد

#مكتبة_دنيا

#قراءات_٢٠٢١

🔪اسم العمل : ذات مرة في الطريق المظلم

🔪اسم الكاتب : خالد أمين

بصوا بقى يا جماعة دي مش اول مره اقرأ للكاتب الرائع خالد أمين ومش هتكون الأخيرة إن شاء الله.

والصراحة أنا بشكر معرض مكتبة الإسكندرية اللي خلاني أتعرف على الكاتب ومن الآخر كده الكاتب خالد أمين ده أكتشاف يا كوتش.

أنا بدأت قراءة مع "جرائم الغراب السبعة" و"إنهم يأتون ليلا" و"زائر منتصف الليل" ودلوقتي مع رواية "ذات مرة في الطريق المظلم"

أصلا من الحاجات اللي لازم تعرفها كده؛ إن الكاتب عامل عالم روائي خاص بيه وإن كل أعماله مميزة بطابع رعب نفسي دموي ومعوي كمان.

كل رواية أو كل عمل هنا مستقل ومحقق لذاته ومرعب وقاتم لوحده لكن هتلاقي إن كل عمل كمان سايب خط درامي أو اتنين مفتوح على باقي الأعمال.

وكنت عارف إن رواية ذات مرة في الطريق المظلم هو عمل طويل نسبيا وفيه هنتعرف على شخصية الرجل الذي عض التراب وشخصية آدم.

وزي العادة خلينا نبدأ مع الانطباع الأخيرة

بعد ما خلصت القراءة لقيت حكيم عمال يغني جنب وداني ويقول:

"قلبي يا هو، حب يا هو، والأحباب جرحوه … هما اتهنوا فرحوا وغنوا وأنا غنيت ظلموه …

سابني وباعني وياما لاوعني وليه موقفش جنبي؟ … كنت بقيدله شمعي، وبيحلاله دمعي، ده الإخلاص في طبعي واتعودت عليه … واللي مأثر فيا إنه محسش بيا، بعد العشرة ديه باعني وهونت عليه"

وانا مش عارف ليه حكيم داخل في كل انطباعاتي الأخيرة في الفترة دي بس اللي قرأ الرواية هيعرف ايه الحكاية وليه الأغنية دي بالذات.

ويلا بينا ندخل على الانطباع الأول والبداية والافتتاحية..

غلاف قاتم وعنوان جذاب "ذات مرة في الطريق المظلم" ومعانا كلمة تحت كده بتقول "لنتوغل بعيدا عن الشاطئ" وكمان كلمة الظهر اللي بتقول "الآن يبدأ الجنون.. الآن يبدأ العبث.. والآن نستضيف الكابوس .."

انا عن نفسي كنت شاري ومتحمس جدا للقراءة وقلت أكيد الرواية دي هتخلص في جلسة واحدة يعني وفعلا معرفتش أنام غير لما أخلصها.

وعلى طول ندخل على أول صفحات وتبدأ الرواية بداية مرتبكة شوية مع زوجين على الطريق راجعين من رحلة.

بصراحة الافتتاحية كانت مش مرعبة مش مثيرة مفيش مشهد قاسي أو لغز قوي وده كان غريب، فين اللغز؟؟ فين الرعب؟؟ فين المصيبة؟؟ أين الخازوق؟؟

اينعم احنا بنتعرف على الزوجين لكن مفيش حاجة تلفت النظر هنا خالص أو هكذا خطط الكاتب.

وفجأة - آن آن آن - يدخل الشرير على الخط ويرتفع الترقب والغموض ونبدأ نسأل ونستغرب ويرتفع الحماس والترقب وفي لحظة كده ممكن تفتكر انك دخلت في أجواء فيلم "Wrong turn" وأخيرا تحصل الكارثة أو الجريمة ونشوف ليه البطل أو صاحبنا عض حرفيا في التراب.

وهوب هوب هوب تمر خمس سنين والرواية تدخل بينا في عالم غموض وتحقيقات وجرائم وصفحة ورا صفحة وشلوط ورا شلوط تلاقي نفسك تندفع للأمام ناحية النهاية.

وهنا ممكن نتكلم عن النهاية.

عندنا تويست حلو في نهاية الرواية يمكن بالنسبة ليا كان متوقع شوية بسبب كلمة أو تلميح في نص الرواية لكن انا برده اتفاجئت.

طبعا النهاية نقدر نعتبرها نهاية قوس الشخصية الرئيسية بتاعتنا واللي لازم تفتح الباب والشباك على أفكار كتير.

القارئ اللي زيي كده ممكن يلاحظ تشابه كبير جدا أو خليني أقول تشابهات ما بين العالم في نهاية الرواية وبين عالم سلاحف النينجا المتحولين أو عالم مدينة جوثام.

عشان كده بكل أريحية ممكن أقول إن نهاية الرواية هنا هي التمهيد الحقيقي لعالم روائي متميز وعد عندك الميزات.

عندنا عالم مغاير هو مشابه للعالم بتاعنا بس مش هو بشكل صريح وأي تشابه ما بينه وبين العالم الواقعي بتاعنا هو من منطلق الفن والإبداع.

عندنا أبطال أو شخصيات ليهم دوافع قوية وتركيبة نفسية وجسمانية وخلفية تخلي منهم أبطال خارقين أو شخصيات ذات صفات ملحمية.

عندنا شر مطلق مبرر وله قوة محسوسة وملموسة ويمكن إسقاطها على حاجات كتير جدا واقعية حوالين مننا زي ما ظهرت في رواية إنهم يأتون ليلا إسقاطا على الاكتئاب مثلا.

عندنا خيال رائع وكاتب واعي ومثقف قادر على فتح روايات على بعضها واختلاق شخصيات جديدة ذات أبعاد نفسية متميزة وطرح أفكار حقيقي مؤثرة.

وهنا لازم نستعرض الفكرة والغرض والهدف

بمجرد ما دخلت في أجواء الرواية والفكرة المسيطة على دماغي هي فكرة قوة الغضب والانتقام والتأثير النفسي للظلم الساقط على الروح.

إزاي إنسان بسيط ممكن يتحول إلى قوة كاسحة،

عندنا جزء مؤثر في الرواية ممكن نعتبره رومانسي وشاعري وممكن نلاقي فيه شوية مداعبة للمشاعر، وعندنا قدر كبير من الرواية وتحديدا في النص التاني بيتكلم عن الحقيقة وفلسفة معرفة الحقيقة والفرق ما بين الجنون والوعي بالحياة المجنونة.

عندنا أفكار كتير في الرواية مستترة شوية لكنها واضحة جدا وصاخبة وعندك لحظات ملحمية تحس معاها انك ممكن تنفجر من الغضب.

وتعالوا هنا نتكلم عن اللغة في الرواية.

طبعا العمل بالكامل بالعربية الفصحى وعندنا وصف بطبيعة الحال عبقري أو خلوني أقول مليان تشبيهات راقية جدا ومفيش تكثيف للحوار لكن عندنا شوية حوارات تلف الدماغ بجد وتخليك مش قادر تمسك نفسك وتسرح بخيالك وممكن تستخرج شوية اقتباسات كده لوز اللوز زي مثلا.

"وكأن الجنون والألم قد وجدا مكانهما بين ضلوعه، وقررا أن يتزاوجا لينجبا هذا الرضيع الصاخب الذي سرعان ما يتحول لعملاق ثائر.. الغضب.."

ولازم هنا نتكلم عن شخصيات العمل

الرواية قاتمة جدا جدا وكل شخصيات العمل مرسومة بعناية شديدة حتى ضابط التحقيق في القسم، وعندنا شخصية "أيتن" لازم نشوفها تاني في عمل قادم للكاتب.

أما عن البطل والشرير فخد بالك أنت قدام بات مان وجوكر بشكل جديد تماما.

عندك شخصية مبررة وعقلانية تتحرك بفعل الغضب وشخصية هي العبث والجنون في ذاته.

وأخيرا خلونا نتكلم عن الخلاصة

النهاية كانت مرضية جدا بالنسبة ليا وفتحنا نافذة أو سرداب في العالم بتاعنا الروائي الجديد.

عندي طبعا شوية أسئلة ومحتاج نقاش مع الكاتب حولها لكني متحمس لرواية ليلة ظهور القرين واللي هبدأ فيها مباشرة الآن.

الرواية حلوة أوي قابضة جدا نقدر بسهولة نشوف الأجواء بتاعتها وكأنها فيلم من أفلام كريستوفر نولان أو زاك سنايدر.

اعتقد إن عالم الكاتب خالد أمين الروائي إن شاء الله هيكون هو عالم "جوثام الشرق"

#أحمدمجدي

🏖️ ذات مرة في الطريق المظلم 🏖️

رواية للكاتب : خالد امين

عدد الصفحات : ورقي ٤٠٢ صفحة

أبجد ٤٥٩ صفحة

دار النشر: دار دون للنشر والتوزيع

نوع القراءة : الكتروني تطبيق ابجد

تصنيف الرواية: جريمة / بوليسية / غموض و تشويق

🏖️ نبذة عن الرواية :

" لنتوغل بعيدًا عن الشاطئ"

تبدأ الرواية بمشهد ذهاب حاتم الصيدلي في احدي الشركات العالمية للادوية و زوجته مني الرسامة الرومانسية الي رحلة إلى إحدى الشواطئ في الساحل الشمالي بعد زواج استمر لمدة خمس سنوات دون إنجاب الأطفال و اثناء ذهابهم في طريق السفر تعطلت بهم السيارة ليقررا طلب المساعدة من اول شخص يسير في هذا الطريق

" ألم يحذركم اجدادكم من عدم الوقوف لعابر سبيل "

توقف لهم ادم بسيارته لمساعدتهم و من هنا تنقلب حياة مني و حاتم رأسا على عقب

يقتل ادم مني أمام حاتم و يحرق جثتها تم ياخدها معه في سيارته و يترك حاتم فاقدا للوعي و يرحل

" الآن يبدأ الجنون

الآن يبدأ العبث

و الان نستضيف الكابوس "

لتبدأ رحلة حاتم في البحث عن قاتل زوجته و لكن لم يكن يعلم أن آدم ذكي للغاية دائما كان يسبق حاتم بخطوة و كلما يجد حاتم خيط للامساك بآدم يقطع عليه الاخير ذلك الطريق

من هو ادم ؟؟ و لماذا اختار حاتم و مني لفعل كل ذلك معهم ؟؟ و هل خطط ادم لجريمته هذه من قبل أم محض صدفة ؟؟

يواجه حاتم العديد من الصعوبات و يتعرض للكثير من الآلام و يكتشف العديد من الأسرار والمفاجآت التي لم تكن في الحسبان

تري هل سيصل حاتم لآدم في النهاية و الانتقام منه أم لا ؟؟

🏖️ السرد والأحداث :

السرد كان بطريقة سلسة و ممتعة للغاية فاسلوب الكاتب في السرد ووصفه للمشاهد و الاماكن تجعل القارئ كأنه يشاهد فيلما و يرى أبطاله أمام عينه و يشاركهم الأحداث

الاحداث سريعة و مشوقة استطاع الكاتب أن يستحوذ علي القاري و جعله دائما في حالة تشويق من أول صفحة في الرواية حتي اخر صفحة

🏖️ اللغة :

استخدم الكاتب اللغة العربية الفصحى البسيطة في السرد و كذلك في الحوار

🏖️ الشخصيات :

بطريقة رائعة و مبدعة تم رسم الشخصيات و دورها المحدد و سماتها مع مراعاة الكاتب توقيت ظهور كل شخصية لتخدم خط سير أحداث الرواية

اعجبت بالعديد من الشخصيات و كرهت بعض الشخصيات و اولهم ادم

🏖️ رائي الشخصي :

🎨 رواية جريمة بوليسية و تشويق رائعة جدا استمتعت بقرائتها جدا يمكن إنهائها في جلسة واحدة انهيتها في جلسة واحدة لشدة التشويق و سرعة الأحداث

🎨 عجبني جدا جدا التويست الموجود في الرواية كان صادم جدا و غير متوقع

🎨 اسلوب السرد كان رائع و مبدع حسيت اني أشاهد أحد أفلام الإثارة و التشويق

و الحبكة قوية جدا و النهاية رائعة

🎨 الرواية هي ثالث قراءاتي للكاتب خالد امين و ان شاء الله اكمل باقي الأعمال و الروايات

اتمني للكاتب Khalid Amin التوفيق دائما

و دايما من نجاح لنجاح

و في انتظار الروايات القادمة باذن الله

🏖️ اقتباسات من الرواية :

🎨 ❞ ستدركين أن الجنون هو وسيلتنا الوحيدة كي ننتصر على تلك الحياة العجيبة. ❝

🎨 ❞ كيف يتطلق المتزوجون؟ كل تلك العشرة تذهب هباء؟! كل تلك التفاصيل والذكريات المشتركة، يتظاهرون بأن كل هذا لم يحدث حقًا، لن يستطع فهم كيف يفعلون هذا أبدًا.. ❝

🎨 ❞ علينا أن نواجه هذا الهراء، ربما الجنون هو الوسيلة الوحيدة التي نواجه بها هذا الهراء.. ألا تعتقد هذا؟ لو احتفظنا بعقلنا.. بهويتنا وبعاطفتنا في مواجهة كل هذا العبث سنهلك.. لو لم نجنّ إذن فنحن لسنا طبيعيين، ألا تتفق معي؟ ❝

🎨 ❞ الألم الجسدي شيء سيئ.. مثله مثل النفسي.. لا تستهن بهما، فهما دومًا يتنافسان في الحصول عليك.. ❝

🎨 ❞ تفكر بالانتقام كثيرًا وتعدّ له وتتدرب من أجله، ثم تأتي لحظة المواجهة فينتابك الخوف، الخوف من أن تفشل، ❝

🏖️ رابط الرواية علي تطبيق ابجد :

‏اقرأ الكتاب على @abjjad عبر الرابط:‏****

انتهيت من قراءة الرواية ومن قبلها قرأت تلات روايات للكاتب

كان اولهم ( وقريبا سيحل الظلام )

ومن بعدها ( زائر منتصف الليل )

واخيرا ( انهم ياتون ليلا )

ومع انى احب قراءة الاصدارات بترتيب صدورها الا انى انجزبت بآخر اصدار للكاتب وكان ده بداية تعرفى بكتاباته واللى اكتشفت ان بين شخصياتها ترابط حتى لو اختلفت احداث كل رواية عن التانيه

ومع اكتشاف كل ترابط بكون مستمتعه جدا ورغم انى بقرأ لون به لمحه من الرعب الا انى بكون ديما مبتسمه وفى انتظار معرفة المزيد

يمكن عشان بدأت بآخر رواية ( وقريبا سيحل الظلام ) فكنت متوقعه نهاية الرواية دى ومع انى فى اغلب الاحيان مش بحب حرق النهايات الا انى كنت مستمتعه المرة دى بمعرفتى مقدما للنهايه

فاضلى رواية واحده ( ليلة ظهور القرين ) وابقى كملت السلسلة لحد اخر إصدار واكيييد هكون فى انتظار اصدار 2024 للكاتب

بالتوفيق ديما 🌷

مراجعة بقلم ( ولاء ااقوصى )

قصة غير واقعية بالمرة

انا