الزمن ـ ديوان شعر بالعامية المصرية

بكيت

كأني كان بقالي عُمر مبكيتشي

الدم أوقات كتيرة.. كان بيبقى أكتر

لاكن بكيت النهارده

لأني لما شفت الدم.. ما بكيتشي!

..

وحشنا مُصطفى إبراهيم والله.. وقصايده اللي لسه فيها روح الثورة، وليها ذكريات تربطك بالماضي بالحاضر بالمستقبل بالدنيا والصُحاب واللمة والوحدة.. لكن،

لسه المانفيستو أفضل ما قدم مصطفى إبراهيم.

❞ ‫المتأكدين ..

‫هما اللي بيمشُّوا تروس الحياة

‫واحنا ..

‫لسه بندوَّر على المعنى ❝

مصطفي إبراهيم الي بيخلد مراحل حياة جيل الثورة بعد فترة مش قليلة من التوقف عن الكتابة بيشرح فيها من اول العنوان الفرق الزمني وتأثيرة والكلمة متعرفة ب ال عشان يحدد الزمن لكن عشان ديوان بالعامية المصرية فيفتح مليون سؤالين حوالين معني الزمن الي يقصده في انك تعيشه او يمر عليك لو يمرر عيشتك لو تمر من خلال تجاربك في سكككه زي ما بيقول عم سيد حجاب :ياتري اللي بيعيش الزمن إحنا ولا الزمن هو إللي بيعيشنا ؟

مصطفي إبراهيم بيخش في دايرة النضج وبيطلع من كل قصيدة في باب مختلف من اول الاحساس بالزمن والعمر والتجارب لحد ما توصل للحظات الشرود الي بتلاقي نفسك فيها زي ما كنت عاوز مش زي ما الزمن حكم وفي اوقات بتشوف نفسك لو الزمن رجع بيك والقصة بتكمل ان كل ترس في الساعة كان حاجة انت عملتها وصلتك للي انت فيه ،الفكرة انه بيونسك انك مش لوحدك الي كده واننا كجيل كتير فمتخافش حتي لو كنت لسه "بتناطح في طواحين الهوا لوحدك".

حرية الحركة في الزمن الي بيتحرك بيها مصطفي وكأنه مشغل فيلم ومقعدك جنبه تتفرج وتعدي وترجع مواقف وتجارب وناس راحت وناس اتنست وانت كنت هنا اهه وفكرت انه لسه بدري هو هنا بيقولك انه مش متأخر اوي ومش بدري او كأنه بيوقف الصورة ويرن جرس منبه يفكرك انه لو مركزتش ف الي فات عندك فرصة لسه في الجاي.

لحظاتك المريحة الي بتيجي في كوباية قهوة او شاي في بلكونة مع مزيكا ظريفة او في صحبة ونس طيب او لحظات صمت انت بتعيشها جوة دماغك مهما كان حواليك دوشة وزحمة بيبروزها بكل بساطة وهدوء وكأنه مبيخلاش منها وكأنها الحليات الي بتجمل الزمن وتهون رخامة الايام ببقول :

❞ كل اللعب في الدنيا بلعبها في دماغي

‫لحد اما تبقى كل حاجة جميلة

‫أو العالم بتقله يمر

‫عالم

‫ما فاضلش جوَّاه أي حاجة تثبتلي اني حر

‫غير الثواني القليلة

‫اللي بسيب جوَّاهم

‫خيط دماغي يكر ❝

الموت وارتباطه بالزمن بيشوفه من زاوية تانية ابعد ويمكن فيها ريحة النضج او تجارب فراق كتير بتنحت جوة نفسه وعقله قبل مشاعره طريقة تانية لشوف الايام وفراق الاحباب ويمكن تهون وجع البعد وتؤنس وحشة الفاقد والمفقود علي أمل بمعاد فبيقول :

❞ حبايبنا مش ف قبورهم

‫حبايبنا في مكان ما مستنِّينا نزورهم

‫جايز هنبدأ من جديد تاني

‫جايز يكونوا ابتدوا قبلنا

‫نحكيلهم ع اللي فاتهم هنا

‫ويحكولنا ع اللي فاتنا هناك

‫جايز يكون الموت ..

‫مش أكتر

‫من الشبَّاك ❝

ديوان جاي بعد شوقه من مصطفي ويمكن كنت سايبه لوقت يكون فيه الزمن بيلحق بس اهه حظه جه حلو قبل نهاية السنة ويمكن يكون الزمن هنا له دور ووقت في الحدث او في الصدفة ديوان ممتع وكل قصيدة هتقعد تتنهد فيها كذا مرة في اولها من الاسم ونصها من الكلمات الي هتخبط فيك وفي آخرها من كتر ما تحس انها خرجت إحساس مكنتش عارف يخرج إزاي او هل فعلا ممكن حد يبص من بير سلم روحك ويطلع بالهدوء ده بكشاف يكشف ولا يجرحش ويطيب ولا يوجعش؟!

❞ ‫يا ريتني اقدر اقول

‫يا ريتني اقدر اعبَّر

‫عن نفسي بشكل أكبر

‫أو حتى بشكل تاني

‫ما اكونش فيه أناني

‫وما اكونش فيه حزين

‫يا ريتني حد تاني

‫لكن ما اعرفش مين ❝

لحظات النضج الي بتخرج منها بعد كل تجربة او مرحلة عمر وتحس بالدرس الي خرجت بيها منها والي وصلك كرسالة بتحفظها وترددها في مواقف بعدها يمكن ملهاش نفس الشبة بس فيها نفس الشخص لكن بتغيير طفيف عن آخر خبطة والي بتحط إيدك عليها او ما بتختبر نفسك الاحساس هو هنا بيلخصها بتكثيف جميل جدا فإنه انشغالك بنفسك وراحتك في خلوك من الناس والدوشة الي ماتلزمكش هو راحة كبيرة وعظيمة وانك تدرك دورك او معني وجودك وتهتم بنفسك بعيد عن غيرك ده اهم ادوارك واقيمها وتقريبا هو صوت الحكمة الرخيم الي بيطبطب عليك ويقولك اهدي "الدنيا صعبة إلعب السهلة وبيطرح تساؤل وبيجاوب عليه فبيقول :

❞ يا هل ترى صوت الهزيمة ولَّا صوت العقل

‫اللي بيوشوش ف ودني بالراحة بدون أنفاس : مش شرط يعني نغيَّر الدنيا ..

‫كفاية حتة صُغيرة فينا ..

‫أو حتة صُغيرة ف الناس ❝

❞ أطيع القطيع الذي تتبعه

‫أطيع الأمان الذي تجمعه

‫مفيش لعب فردي في هذا الزمان

‫وكلُّه بيمشي وقطيعه معه

‫مفيش خوف بيشبه لخوف الغريب

‫مرايتي وأماني شبيهي الحبيب

‫دعونا نقاتل نقاتل نقاتل

‫نكاكي كفرخ الدجاج المناضل

‫لحد اما من بيننا يطلع مقاتل

‫لا يشبه ولا يشبهوه من معه ❝

⭐️⭐️⭐️⭐️

❞ هنفَّض هدومي من الماضي وامشي

‫وحزني هخبيه في دفتر هوامشي

‫محدش هيقدر يطبطب عليك

‫مفيش إيد هتسند إيديك غير إيديك

‫يا تستنى نفسك وتبحث ف ذاتك

‫يا تلحق تلم وتشوف اللي فاتك

‫لقدام هنمشي هتمشي وهمشي

‫ندور ويَّا عقرب ساعاتي وساعاتك ❝

⭐️⭐️⭐️⭐️

❞ بقول لنفسي كأنه عزِّل ولَّا ساب البيت

‫يا صاحبي ما تقولش انتهيت

‫يمكن تكون دلوقتي بس بدأت

‫مفيش حاجة ممكن تهزمك دلوقت

‫مفيش حاجة ممكن تئلمك ف الموت

‫مفيش بُكره ممكن يقلقك م الوقت

‫ولا حد ممكن يغلبك بالصوت … ❝

⭐️⭐️⭐️⭐️

❞ الحياة مش كلها انبهارات

‫ولا تجارب سُخنة بالبهارات

‫والليالي المدهشة حلوين

‫بس السنين المملة

‫هيَّ اللي بنت حضارات ❝

⭐️⭐️⭐️⭐️

❞ ما عادتش مستاهلة

‫الدنيا صعبة.. العب السهلة

‫إنتا اللي بس مكبَّر الموضوع

‫بلاش تكرر خيبتي وغبائي

‫بطَّل تِصدَّق وانتا هتلاقي .. ❝

ديوان بتقراه بصوت مصطفي أبراهيم وتعيش معاه بوجدانك الذاتي كأنك أنت اللي بتقول الكلام

السر كان هو الطريق والطريق كان هو الكلام

فكرني بالمانيفستو تستحق القراءة 🥺❤️