اقتباسات صلاح جاهين

يا باب يا مقفول... إمتى الدخول

صبرت ياما واللي يصبر ينول

دقيت سنين... والرد يرجع لي : مين ؟

لو كنت عارف مين أنا كنت أقول

عجبي !

بره القزاز كان غيم و امطار و برق ..

ما يهمنيش - انا قلت - و لا عندى فرق ..

غيرت رأيى بعد ساعة زمان ..

و كنت ف الشارع و ف الجزمة خرق ..

و عجبى

إخطفني ياللي تحبني ع الحصان

الدنيا قالت يوم في ماضي الزمان

إخطفني ياللي تحبني ع الـــــفرس

الدنيا قالت .. قام خطفها الشيطان

عجبي !!

دي مذكرات و كتبتها من ســـــــــنين

في نوتة زرقا لون بحور الحنيــــــــــــن

عترت فيها .. رميتها في المهمـــــــلات

وقلت أما صحيح كلام مخبولين!

عجبي !!

كرباج سعاده وقلبي منه انجلد

رمح كأنه حصان و لف البلد

و رجع لي نص الليل و سألني .. ليه

خجلان تقول انك سعيد يا ولد

عجبي !!!

إنشد يا قلبي غنوتك للجمــــــــــــــــــال

و ارقص في صدري من اليمين للشمال

ما هوش بعيد تفضل لبكره سعيــــــــــد

ده كل يوم فيه الف الف احتمـــــــــــــال

عجبي !!

إقلع غماك يا تور وارفض تلف

إكسر تروس الساقية و اشتم وتف

قال : بس خطوة كمان .. وخطوة كمان

يا اوصل نهاية السكة يا البير تجف

عجبي !!!

الدنيا أوده كـــــــــــبيره للانتظار

فيها ابن أدم زيه زي الحـــــــمار

الهم واحد .. و الملل مشــــــترك

و مفيش حمار بيحاول الانتـــــحار

عجبي !!

- الدنيا من غير الربيع ميّته

ورقة شجر ضعفانه ومفتفته

- لأ يا جدع غلطان تأمّل وشوف

زهر الشتا طالع في عز الشتا

عجبي !!

نقطة مرارة كمان علي مشروبـــــــــــي

دوبها يا ساقي حسب مطلوبـــــــــــــــي

طعم الحياة .. مش برضه فيها و فيها ؟

ليالي وردي و نهارات خروبــــــــــــي ؟

عجبي!!

أنا مش تبع مخلوق يا سيدنا البيه

أنا حُر في إللي يقول ضميري عليه

وإن كنت تُحكم جوا ملكوتك

الشارع الواسع فاتح لي إيديه

دخل الشتا وقفل البيبان ع البـــيوت

وجعل شعاع الشمس خيط عنكبوت

وحاجات كتير بتموت في ليل الشــتا

لكن حاجات أكتر بترفض تمــــــوت

عجبي !!

خوض معركتها زي جدك ما خــــاض

صالب و قالب شفتك بامتـــــــــــعاض

هي كده...ما تنولش منها الأمـــــــل

غير بعض صد ورد ووجاع مخاض

عجبي !!!!

الأرض شوك أيوه لكن هايش

و الحمرة مش يعني الطريق حايش

دي دمنا السيال .. وبشرة خيـــــــر

ان انتي عايشة و ان أنا عايــش

عجبي !!!

تسلم يا غصن الخوخ يا عود الحطـــــــــب

بييجي الربيع .. تطلـــــــــــع زهورك عجب

و انا ليه بيمضـــــــــــي ربيع وييجي ربيع

و لسه برضك قلــــــــــــــــــبي حتة خشب

قالوا السياسة مهلكة بشكل عـــــــــام

و بحورها يا بني خشنة مش ريش نعام

غوص فيها تلقي الغرقانين كلهــــــــــم

شايلين غنايم .. و الخفيف اللي عــــام

تسلم يا غصن الخوخ ياعود الحطب

بيجي الربيع تطلع زهورك عجب

وأنا ليه يمضي ربيع وييجي ربيع

ولسه برضك قلبي حته خشب

عجبي !!

أنا شاب لكن عمري ألف عام

وحيد لكن بين ضلوعي زحام

خايف ولكن خوفي مني أنا

أخرس ولكن قلبي مليان كلام

عجبي !!

لا تجبر الإنسان ولا تخيّره

يكفيه ما فيه من عقل بيحيّره

اللي النهارده بيطلبه ويشتهيه

هو اللي بكره ح يشتهي يغيّره

حدوته عن جعران و عن خنفســــــــــة

اتقابلوا حبوا بعض ساعة مســـــــــــــــا

و لا قال لهم حد اختشوا عيب حـــــرام

و لا حد قال دي علاقة متدنســــــــــــــة

عجبي !!!!