اقتباسات سالي العقاد

❞ القيادة السيئة عاملة زي لعنة الفراعنة اللي ملهاش أي فايدة ولا ليها أي حل، ❝

❞ في الشغل بقى، ممكن تلاقي موظف جايب آخر الدواسة في حاجة مش جايبة همها أساسًا وهو مكسل يشوف طريقة بدالها أو يطورها، بس بالنسباله اهي حاجة ابرك من ولا حاجة. ❝

المدير الفاشل، عامل زي الشيف اللي بيحرق الأكل، ويرمي التهمة على الفرن، ويقدم أكلة محروقة للزبون.

اللي ميعملش حساب لاحتمالات التطور، احتمالات التطور هتعمل من فخاده بطاطس محمرة.

إن 75 ٪ من الموظفين بيقولوا إن اوسخ حاجة في شغلهم هي مديرهم المباشر، (دا بجد بقى وفقًا لدراسة عملتها مؤسسة جالوب).

‫ تخيل 75%!!!

❞ إنت مشغل بوصلتك الأخلاقية الداخلية ولا بتقلي عليه بيض بالبلوبيف؟ ❝

مش المفروض أصلًا تفكر هتغير ولا لاء، المفروض كل اللي يشغلك هتغير إزاي. لأن كدا كدا التغيير جاي.

لما حد يشوط حيطة خرسانة، هيعرف إن الحيطة الخرسانة هتشوطه نفس الشوطة بس في هيئة وجع.

❞ سوء التواصل بيؤدي إلى ضعف الروح المعنوية للموظفين وبالتالي ضعف الإنتاجية. ❝

كنت اشتغلت قبل كدا مع مدير مبيحش أي حاجة تتغير لا تبوظ، أو مدير كبير مش عارف ياخد قرار بس مش عايز يبان مهزوز وعقله دايمًا مزنوق بين «اخد قرار ولا اخلي القرار هو اللي ياخدني» …

‫ دا بقى أسلم حاجة تلاقيه بيعملها، إنه يستخبى ورا ستارة كبيرة من بتوع المسرحيات دي، ستارة العمق والحكمة والفطنة والحنكة،

❞ سهل إنك تبقى مدير، بس صعب إنك تبقى مدير تخلي الناس عايزة تبقى معاك. ❝

قانون مورفي «أي شيء يمكنه أن يسير في الاتجاه الخاطئ، سوف يسير بالاتجاه الخاطئ».

لو لقيتها ماشية متلعبش في حاجة.

بلاش تعيش مغيب في اللا لا لاند، ودايمًا اعمل حساب أسوء سيناريو.

«هاشتاج فريق الأحلام»، «هاشتاج انتو قدها وقدود»، «عاش وحوش الشركة عاش». 

‫ حاجات كدا بقى من اللي بتموع وبتقلب البطن دي.

كان في موظف طيب وجدع وشاطر وغلبان، ميعرفش يقول لاء لحد في الشغل، فطبعًا مديره كان مشيله شغل الإبل لوحده بدون حد يساعده حتى أو يشيل شوية معاه، ولو طلب مساعدة، يقولوله اه طبعًا حاضر كمل إنت بس واحنا هنجيبلك حد معاك

إنت ممكن تخسر ناس شايلة الشغل وبحب واهتمام وشغف وشطارة وتركيز وطموح، عشان غباء التعامل معاهم. 

وفقًا لاستطلاع عملته جمعية علم النفس الأمريكية في2019، 59% من الموظفين الأمريكيين بيقولوا إنهم بيتعرضوا لقلة ذوق واحترام في الشغل مرة واحدة على الأقل شهريًا. (والله محترمين بتوع أمريكا دول، إحنا بنتهان يوميًّا على الأقل ستة وتسعين مرة).

في استطلاع عمله موقع **** في 2018، اعترف 76٪ من المشاركين بأن عندهم مدير توكسيك متكسك حياتهم.

بناءً على نتيجة استطلاع عملته مؤسسة غالوب في 2014، واحد من كل اثنين الموظفين سابوا شغلهم هاربانين من مديرهم.