مراجعات رواية سنوات اليوم الواحد

أكتر رواية كنت متحمسة لها وعدت حدود تخيلاتي بمراحل.

رواية عميقة جدًا وبتناقش مواضيع في غاية الأهمية بشكل مختلف ومميز، بطل الرواية حسن إللي شبه شباب كتير فاكرين إنهم الصح دايمًا رغم إتفاق عدد كبير من إللي حواليهم إنهم غلط، ورغم كل الذنوب والكبائر إللي بيعملوها طالما مش شرك بالله يبقى هما في السليم!

وواخدين أفكارهم من كتب لناس مش مؤمنين أصلًا وحافظين آيتين يريحوا بيهم ضميرهم.

قد إيه الإنسان بيكون خلاصه في أيده بس بيروح برجله لهلاكه.

عجبتني جدًا فكرة ظهور المسيح الدجال وماحدش يكون مستعد، على الرغم إنه ممكن يحصل في ثانية عادي جدًا.

يعني الإنسان لازم يعمل حساب ده في أي وقت.

النهاية واقعية جدًا وفكرتها ممتازة.

الخلاصة إن رواية سنوات اليوم الواحد اتعمل فيها جهد وإبداع كبير، ممتعة جدًا جدًا وحاجة عظمة.

ولأن دي مش أول رواية أقرأها له فإنه يتحول في الفكر بالشكل ده مايطلعش إلا من فنان كبير، هتفضل من كُتابي المفضلين وكل مرة بانبهر أكتر من إللي قبلها بجد براڤو ومستنية العمل القادم بإذن الله متحمسة له من دلوقت.

رواية بديعة، بتبين قد ايه الكاتب يقدر يتلون ويكتب أفضل ما عنده في معظم أنواع الأدب، فالكاتب أكتر من رواية في أدب الرعب بمختلف أنواعه، من رعب نفسي لدموي لقوطي، ومر على التاريخ في روايته الأولى سخسنهاوزن، وروايته أقبل هذه الهبة، وروايته قبل الأخير الخروج إلى الزاوية، واللي كان باين فيها قد ايه الكاتب يقدر يطرق أبواب الأدب والفلسفة، لكن روايته الأخير سنوات اليوم الواحد مزيج فلسفي ممتع ومبسط، بلغة قوية وسرد موسيقي، البطل مراية لبقية البشر، وللألوان رمزيات بليغة، والنهاية كما يفترض أن تكون، أرشح رواية سنوات اليوم الواحد بشدة.❤️

فلسفة تمسك الانسان بقناعاته دي بجد غريبة بالنسبالي لأنك بتبقى مش عارف هتوديه لفين، هتعلي منه ولا تقلل منه، رواية بتدمج الواقع مع الفلسفة والطابع الديني بشكل رائع، تبان صغيرة وبسيطة وهتخلص بسرعة وفيه هيفتكرها مختصرة ولكن هي بالنسبالي كانت عميقة جدا وشاملة ..