مراجعات كتاب جاتوه وبسلة

كتاب جميل جدا جدااااا

دمه خفيف و عميق و لذيذ و مؤثر

بيجمع مواضيع كتيرة بيمر بها جيل الثمانينات و بتحكيها الكاتبة بطريقة ممتعة

موفقة دائما ❤️

كتاب رائع و ممتع. اسلوب سلس و تجد نفسك مبتسم تلقائياً و انت تقرأ.

* تصادف وجودي في القطار اثناء قراءة الكتاب واذا بي تنتابني حالة من الضحك المكتوم احيانا وبصوت احيانا اخرى (تقريبا اتفضحت وسط رفقة السفر ) ... انا كنت متخيل اني هاقرأ حاجات زي اللي بشوفها في جروبات ذكريات من زمن فات وشويه نوستالجيا والكلام ده وخلاص ... لا الموضوع مختلف..

* الكتاب عباره عن مجموعه من المواقف والاحداث اللي احنا بالفعل كجيل الثمانينات عشناها ومرينا بيها بس المختلف هو التاتش الخاص بالكاتبه المميزه اللي بتوقع ان هيكون لها شان كبير لو هي كملت بنفس المستوى الرائع ده..

القدرة الرائعة والموهبة الفطرية علي ملاحظة ادق التفاصيل اللي ممكن تكون بتمر علينا ومش بناخد بالنا منها زي تفصيلة "جاتوه وبسلة" اللي هي عنوان الكتاب وزي ما قالت الكاتبة انها كانت رد من احد أبطال مسرحية " ألابندا" علي سؤال اكلتوا ايه في الفرح؟ ..يعني احنا ممكن نكون سمعهناها وضحكنا عليها وخلاص عدت ..لكن انها تكون في موضع انها تكون عنوان لكتاب دي حاجة مرعبة 😄 .

طب خلينا نقول مجازا اننا اخدنا بالنا وبنهتم بكل التفاصيل اللي بتمر بينا لكن صعب جدا ان يكون حد عنده القدرة إنه يحول كل ده لكلمات وجمل بها من السخرية و "الكوميديا السوداء" ان جاز التعبير مخلوط بمكتبة هائلة من " قفشات الافلام والمسلسلات" اللي بتخليك رغما عنك في حالة من " فشخ الضب" طوال مسيرة القراءة.😅

* من الحاجات اللي شفتها ومش عارف إذا كانت السلبيات ولا من الإيجابيات وده حسب مرجعية كل واحد من القراء الا وهو خطابها الموجه للنساء في اغلب المواضيع وتحاملها كثيرا علي الرجالة وده بقي وضع عادي شايفينه من كل النساء مش الكاتبة بس فمش مشكلة يعني تعدي ..بس لو نقدر فيما بعد ان الخطاب يبقي لكلا الجنسين هتكسبي كتير والله احنا كمان فينا اللي مكفينا وعاوزينها تمشي بسلام 😅

* شايف في احترافية عالية في تقسيم المواضيع لفصول وارتباط كل فقرة بعنوان الفصل بطريقة تدل علي تدقيق وانه تم بتؤدة وتريث مش باستعجال ودي حاجة لازم نذكرها ونشكر الكاتبة عليه ..فشابوه 👏.

* مش متأكد اذا كانت الكاتبة طبيبة او متخصصة في مجال علم النفس ولا لا ..لأن شفت تحليل لشخصيات وانماط لسلوكيات لحد دارس ومش كده وبس لا ده تم سرده بنفس اللاين الكوميدي المبهج اللي يخليك تتأكد انك قدام شخصية مش "حد هلاس" لا ..ده حد دارس جوه وبره 😅

* الاسكتشز عجبتني جدا جميلة ومعمولة بحب ..بحب اوجه شكري للي صممها ونفذها.

* كنت مستني اشوف موضوعات تانية متأكد انه لدى الكاتبة منها الكثير لتقوله هي بس لو تقلب في الرف اللي فوق كده هتطلع زُبد جايز نشوفه في الاجزاء التالية.

* وفي الاخير بحب اشكر الكاتبة جدا علي الحالة الجميلة اللي كنت فيها خلال رحلة السفر وبتمنالها التوفيق في اللي جاي وانها تكتسب مزيدا من الخبرة والحنكة الأدبية ولا تحرمنا من ذلك 🤗