درس الميت الأخير

اتمنى يارب الرواية تعجبكم وموضوعها الجديد يحظى برضاكم ويستحق الوقت اللي تقعدوه بتقروها .. واتمنى اي حد قراها وحابب يتناقش معايا يشرفني علطول ❤️🫡

.. وصفه للمشاهد جميل و دقيق،، كأني مع البطل في نفس المكان ، بمر بنفس المشاعر من خوف وقلق و توتر .. في انتظار الكتاب القادم

كتب جميل مشكلته الوحيدة سرعته لسا بخش في الاجواء كان خلص خلاص

تحفة بصراحة

رواية صغيرة بس مليانة مشاعر مختلفة ببراعة، خلصتها في قعدة واحدة كنت متحمسة اعرف ايه هيحصل والمشاكل المختلفة الخاصة بكل شخصة والغوص داخلها كان سلس وعشت معاهم مشاكلهم وكنت حابة اعرف عنهم اكتر

الفكرة جديدة وبتسقط الضوء على جانب موجود حوالينا كتير محدش مديله اهتمام والstructure بتاع الرواية عجبني جدا مش منتشر

والاهم، اللغة كانت سلسلة وقوية في نفس الوقت، لمستني كتير وحسيت بالحرفية

الرواية : #درس_الميت_الأخير

الكاتب: #محمد_هشام_دلاش

دار النشر : #المصري_للنشر_والتوزيع

📌 أيُّهما أهون: أن تكون مريضًا فحسب؟! أم مريضًا وجائعًا؟!

هو مش كل واحد عنده علم أو موهبة بيستغلها 🤷‍♀️

يعنى الطبيب بيستغل علمه فى معالجة المرضى

المهندس، المدرس، و، و، و …..

ده انت لو بتعرف تشتغل حاجة يدوية كهواية برضه هتستغلها وتعملك مشروع يدخلك عائد مادى فى الاسبوع أو حتى لو بالشهور..

اومال ماسكين فى دكرور ليه 🤔

مين دكرور وشغلته ايه

ده متعهد توريد مرضى وحالات

يدرسوا عليها الطلبة بتوع طب

فى مراكز خاصة بعيد عن الجامعات والمستشفيات

بس ده استغلال للحالات وحاجة وفقر الناس

مش أحسن ما يشحتوا على الأبواب

ويمدوا ايدهم للى مايسواش

اهو على الأقل عنده حاجة يستغلها زيه زى أى إنسان

المرض كمان هنعمل منه شخص ويبقى ليه اوردرات

شوف ازاى

كل حاجة وليها سوقها وزبونها

حتى المرض بقى عرض وطلب

امال هتخرج دكاترة ازاى

لو ماشوفوش حالات مرضية بحق وحقيقى يدرسوها ويكتشفوا العلاج

طيب لو المريض اتعالج هيطلع كده معاش

غالبا الحالات ميؤس منها العلاج بس كله طبعا بأمر الله

ولو ربنا كتب على الحالة الشفاء مش هنعترض وهنراضيه بقرشين ونشوف غيره قوام

مجموعة من الطلاب، فرش شخصياتهم محمد دلاش فى أول الصفحات، وشاركنا حكاياتهم وأسلوب حياتهم والأهم شخصياتهم وعرفنا بهم فى فصول ومكناش فاهمين الاول ايه اللى هيجمعهم فى السطور

لكن بعد كام شخصية بانت الحدوتة اللى جاية

جمعتهم الدراسة على " عم صابر " شخصيات مختلفة المهزوز والمتوتر، والفضولى الصامت الغامض، واللى عايشة فى الأحلام والدراسة مش فى الدماغ وبتـ flirt على زميلها وعمالة ترسم فى حياة لقدام والدكتور نفسه اللى بيخاف يعالج مرضى واكتفى بالتدريس من برا برا

بس اللى تخاف منه ايه … هيطلعلك أكيد

اشرح بقى يا دكتور الحالة وقولنا فيها ايه بس خلى بالك أحسن يفلسع بين ايديك 🤷‍♀️

الرواية فى بدايتها زى ما قولت عرض لشخصيات الأبطال، كانت فيه منها أجزاء فيها وصف كان عندى عليهم شوية استفهامات ليه ليه 🤦🏼‍♀️ كانت هتقفلنى منها لكن اتعودت أكمل لآخر الصفحات وما حكمش من فقرة ضايقتنى وخلاص

ومبسوطة أنى كملت وماندمتش الفكرة عجبتنى وحبيتها، وطريقة سرد الكاتب خليتنى اتأثر بالفكرة، ازاى ممكن المرض يبقى مهنة مجبر عليها

أكيد مش بمزاجك عامل فيها مريض بس الحاجة والفقر ممكن يذلوا الواحد قد ايه

يترمى على سرير ويسيب الناس تقلب فيه هتحس بوجع كل شخص رقد على السرير

هتقولى ما عادى ايه المشكلة ما هو علشان تطلع دكاترة شاطرين لازم يدرسوا على حالات حقيقية مش تمثيل

عارفة اكيد

بس لما تقرى الرواية هتعرف المقصود ايه وقولى وقتها هتزعل عليهم ولا ايه 🤷‍♀️

أول تجربة ليا مع الكاتب وحبيت أسلوبه وفكرته وأتاثرت بها.

📌إن الصحة هي صمت الأعضاء، بينما المرض هو ثورتهم.. ومن الجيد أن أعضائي عندما ثارت وصرخت سمحت لغيري بأن يستفيد منها.

#مكتبة_دنيا

#قراءات_٢٠٢٥