مراجعات رواية أسفار عبد الرب

من أفضل و أعظم الكتاب ❤️

🟧اسم العمل:أسفار عبد الرب

🟧اسم الكاتب: عبدالرحمن أبو المكارم

🟧عدد الصفحات: 87 أبجد

🟧صدرت عن دار روافد للنشر.

🟧التقييم:⭐⭐⭐

رواية لا يصلح لها إلا ريفيو بالعامية، أنا لحد دلوقتي مستغربة جدًا من حاجات كتير وأتمنى الكاتب يرد لو هيشوف البوست.

رواية لغتها سلسة وبسيطة استخدم الكاتب الفصحى في السرد والعامية في الحوار، أنا شايفة إن العامية خدمت الرواية جدًا يعني ومناسبة ليها أكتر.

الرواية من أول اسمها لحد الغلاف وهي شدتني إني اقراها دونًا عن غيرها، رواية مشوقة قصيرة تخلص في قعدة أو اتنين.

أسلوب الكاتب مميز أوي ويشدك لقراءة العمل للنهاية، دي أكتر حاجة حبيتها عمومًا.

ممكن موصلتش رسالة الكاتب كويس ليا بس هوضح اللي وصلي ومحتاجة لو حد قرأ يفيدني برضو، هو لعب على قضية الأديان والمعارضة والاختلافات اللي بتنشأ لو حد طلع ناقش موضوع في الدين زي ما "عبد الرب" اتكلم على فكرة جواز مسلمة من مسيحي ولكن الأبناء يختاروا اللي عايزين يتبعونه براحتهم، والضمير وفكرة اللي هو بيظهر ويناشد الناس بالقيم وفي الأخر مثلًا يلاقوه في شقة مشبوهة أو ما شابه إن ممكن حد بيظهر قد إيه هو ملاك وياما تحت السواهي دواهي زي ما بيقولوا.. وكمان لما ذكر إن أسباب كتير ومختلفة أدت إن بنات وأولاد مراهقين كتير يروحوا للأماكن دي وإن غالبًا بيبقى نقص حاجات كتير من ناحية الأهل وما شابه.

مفهمتش بقى إيه فكرة استخدام تشبيهات كتير بالمسيح أو العدرا اللي شبهها بصديقته اللي دافعت عنه، تخيل كاتب بيقول عينها زي عين المسيح!! أنا شوفت أغلب التشبيهات دي استهزاء مش أكتر، وكترها كان مضايقني لأبعد الحدود، كمان مش فاهمة ليه المسيح بالأخص؟ غير إن في تقويلات كتير ذكرت كأن المسيح بيقولها ودة شيء محصلش وغريب وفظيع بجد فليه يعني؟

واستخدام الكاتب لبعض الآيات كان غريب غريب يعني!

محتاجة حقيقي تفسير وتوضيح وجهة النظر دي؟

#شغف_القراءة

#معرض_قبل_المعرض

#فنجان_قهوة_وكتاب

#رحلة_شغف_قراءات_المعرض_مع_أبجد_وفنجان_كتاب