اقتباسات من كتاب على سفر

رغم الحنين للحقيقة ..

‫ والبحث وسط الزبالة ..

‫ عن المعاني البريئة

كُنَّا من حبة دقايق كتلة واحدة في الطريق

‫ بقينا ليه متفرَّقين في كل شيء؟!

نشبه مشاهد تايهة جوَّه الفيلم

‫ هربانة من سينما الكبار .. محشورة في الكارتون

‫ ما بقيتش عارف تُهمتي

‫ قسوة ووجع؟

‫ ولا انهزام قدَّام مشاعر مُجهِدة؟

نمشي على حبل الأمل علشان نطول ضحكة

‫ والضحكة تيجي مرة .. وألف مرة لأ

‫ والنكتة تبدأ بالمآسي المضحكة

‫ وتخلص بكلمة حق

ولا دايم غير وجه المولى .. والباقي مفيش

متفرَّقين بين السؤال والأجوبة

‫ والسيريالية المفرطة في التجربة

‫ وتخوُّفاتنا من اللي كان

‫ ملناش مكان!

‫ لكن أكيد بين القصص لينا طريق

‫ الوقت مش سامح لنا نحِس بأمان

‫ لكن ما بيننا فيه أكيد كام شيء بريء

التعبانين م الاشتياق

‫ ومن الأمل

‫ ومن الحنين

‫ الصابرين ليهم سنين

‫ رغم الملل والتجربة

‫ واللي بيستنوا السعادة

‫ في الليالي المرعبة

‫ ليه كلُّهم ..

‫ لمعة عينيهم في الفرح

‫ تشبه ملامح حزننا؟

‫ والابتسامة فوق وشوشهم تشبه لأعراض الألم؟

‫ ليه كل أبناء الهدوء .. بينهم شبَه؟

اللي يحب مقابلتك .. واعدُه

‫ واللي يحاول يخسرك .. ساعدُه

‫ واللي تلاقيه في الشِّدة بيباعد ..

‫ زوِّد كمان بُعدين على بُعده

‫ وافتح عينيك في الحضن لو بارد

‫ الحرص مش تخوين .. وبيساعد

‫ ما إنت اللي حضنك من زمان مسروق ..

‫ من ناس بتغدر قبل ما تواعد

دايمًا بغرَّق زرعتي بالحُب ..

‫ فتتقلب ضدِّي

‫ والحُب يتحوِّل دموع مغرَّقة خدِّي

‫ وأرجع وما أتعلِّمش،

‫ وأكرَّر الغلطة ..

‫ وأخسر الفرق اللي بين الصح والمضمون

‫ والحق والباطل ..

‫ والبيِّنة والشك!

‫ وأرجع أمارس تاني الفلسفة والعَك!

الناس بقت متأكدة!

‫ ملعون أبو المتأكدين

ما بقيتش أخاف من وحدتي .. وبقيت بخاف م النَّفْس

‫ ما بقيتش خايف م الفراق

‫ بالعكس

‫ بقيت بخاف أكتر .. من الصُّحبة

‫ ومن وهم إني مش وحدي

‫ وجنبي الناس .. ومش شايف

‫ وبين الناس كمان ما أتشافش

‫ وأخاف حتى أقول «خايف»

‫ عشان لازم أكون ما بخافش

بين الكلام اللي اتكتم واللي بيتقال بالصياح

‫ يطلع ويخلص ١٠٠ صباح

‫ والوقت والأيام تمُر

‫ بكرة الشيطان يطلع له كام مليون مُريد

‫ هيأوِّلوا أغلب بنود المَظلمة .. تصبح تُهَم

‫ ويحاكموا بيها صاحب الحلم العنيد ..