تحميل الكتاب
السياسة بدون أوهام
نبذة عن الكتاب
"مرت اكتر من تلاتاشر سنة على ثورة 2011 واهداف الثورة ماتححقتش. بالعكس مصر والدنيا كلها دخلت في ممر مظلم بيهدد بحروب إقليمية وبدأت بالفعل حرب عالمية بالوكالة في أوكرانيا ما بين الدول الغربية المتكتلة وترأسها الولايات المتحدة الامريكية من جانب والاتحاد الروسي من جانب اخر. والحرب دي ممكن قوي توصل لحرب مباشرة وبعدين حرب نووية. وبدأت حرب إقليمية بين محور المقاومة ضد المشروع الصهيوني الغربي في فلسطين والشرق الأوسط من جانب ودولة إسرائيل الترسانة والقاعدة العسكرية العنصرية والفاشية المزروعة للدفاع عن مصالح الغرب وسط العالم العربي من ناحية تانية.... الدول الغربية المتكتلة رافضة قبول انتهاء فترة الهيمنة المطلقة على العالم واللياستمرت حوالي عشرين سنة بعد انهيار الاتحاد السوفيتي في سنة 1991...ومصرة على عدم الاعتراف بالاتحاد الروسي والصين كقطبين ظهرو من جديد لاقتسام السلطة في الساحة العالمية. وفيه شبح حرب ساخنة اخري ضد الصين حول تايوان والهيمنة في اسيا بيلوح بقوة. وماننساش عنصرية ونفاق واجرام الدول الغربية المتكتلة كحصيلة قرون من السياسة الاستعمارية اغتصبت ونهبت خلالها شعوب الجنوب، وده طبعا بينعكس في تأييدها الاعمى لإسرائيل والمذابح اللي بترتكبها في فلسطين ولبنان. طبعا جت في السكة سنة 2019 جائحة كوفيد واللي خلقت جـــــــــــــو من العدمية في نفسية البشر... كل البلاوي دي بتأكد اننا كجنس بشري وكحيوانات اجتماعية فشلنا فشل ذريع في تنظيم حياتنا الاجتماعية في داخل كل بلد وكمان على المستوى العالمي (المجتمع الدولي). مش بس بالاستعمار وبتجارة السلاح والموت...خد عندك كمان المذابح والحروب والعنصرية وعودة الفاشية بقوة في الولايات المتحدة وعدد من الدول الأوروبية واسرائيل...وطبعا بعد كارثة وكابوس الاتحاد السوفيتي وكوبا والنظام الشمولي في الصين وانهيار وافلاس اغلب الأحزاب اليسارية مع فشل تحقيق معادلة تحقيق احلام الاشتراكية والعدالة الاجتماعية مع البقاء على الديمقراطية وحماية حرية الفرد. وكنت سنة 2011 نشرت كتيب "حقيقة السياسة بعيدا عن الهراء" لخصت فيه فكر المفكر السياسي الأمريكي جيمس برنهام...لكن انا هنا بأكتب فكري انا...وبأستخدم فصول كتاب برنهام كاطار لبحث الموضوعات المختلفة اللي بيناقشها برنهاموغيرها من الموضوعات المهمة...ورجعت للاعمال الاصلية بتاعة مكيافيلي وموسكا وسوريل وميكلز وباريتو.... وزودت عليهم كارل ماركس وبرنهام نفسه وميرشهايمر وفاروفاكس ونعوم تشومسكي وكلهم مكيافيليين في مفهومي...مع عرضي وتحليلي وملاحظاتي على ضؤ الاحداث المتواليه في القرن الواحد وعشرين. وفي تقديم فكر المكيافيليين مشيت في تسلسل زمني. علشان كده بدأت بمكيافيلي وبعدين بكارل ماركس وتحليله للقيمة المضافة وأسلوب تكديس الثروة في النظام الرأسمالي وتحليله لحركة التاريخ ونظرية المادية التاريخية وبعدين المكيافليين اللي برنهام أشار اليهم (مع مزيد من التعمق والشرح) ...وبعدين برنهام نفس وبعده ميرشهايمر وأخيرا فاروفاكس ونعوم تشومسكي. في النفق المظلم اللي احنا فيه اصبح من الضروري جدا اننا نبقا واعيين تماما بحدود السياسة والاعيب وخداع وكدب السياسيين في الغرب والشرق وفي كل مكان. ونحترس من تجار الحلول السهلة...اللي هيودونا كلنا في داهية...ارجو ان كتابي ده يزيد من وعي الشباب وهما الامل في المستقبل.... والمقصود ب "المجتمع" في الكتاب هو المجتمع داخل كل دولة وكمان المجتمع الدولي والعلاقات الدولية..."التصنيف
عن الطبعة
- نشر سنة 2024
- 216 صفحة
- [ردمك 13] 9789772213252
- دار الثقافة الجديدة
