-تجربة قراءة اولي للكاتب ستيفين كينج و كنت فاكر انها هتتطلع رعب و لكن المفاجاه انها طلعت جريمة .
- فتاة مراهقة بتختفي في ظروف غامضة مع ترك ملاحظة في دراجتها بعد تحقيق الشرطة بينتهي الامر الي لا شي و في ظل ضغط العمل و ضغط وجود اصابات فيروس كورونا في امريكا ... بتاخد ام المراهقة بنصيحة محققة الشرطة و تستاجر المحققة الخاصة هولي و بندا معاها رحلة التحقيق و تتبع الخيوط و بنكتشف معاها مفاجات اغرب من الخيال .
-المحققة الخاصة هولي غيبني واحدة من الشخصيات استمتعت بقراءة العمل و التحقيق معاها .
- بالرغم من اني كنت متوقع اني العمل يكون مايل للرعب لكن واضح اني عالم الجرائم ورايا ورايا لكن العمل اكبر من كونه عمل بيتناول عمل محققة خاصة بتحقق في جرائم اختفاء او فقدان كلب.. العمل فكرني بكل ذكريات الكورونا و الماسكات و الكحول و فريق مع اللقاح و فريق ضد .. بس كده لا العمل بيكلم عن فريق مع ترامب ولا فريق لا و الفوضي اللي حصلت بعد خسارته و المفارقة اني كنت بقرا العمل و ترامب رجع لحكم امريكا مرة تانيه ...بس كده لا ده برده بيكلم عن مشاكل السود مع الشرطة الأمريكية و خوفهم من اي توقيف من اي شرطي.
- رغم اني هولي هو الجزء الثالث من السلسة دي الا اني كنت فاهم بشكل معقول جدا تاريخ الشخصيات .
-النقطة السلبية في العمل الترجمة للاسف أجزاء حلوة و اجزاء ولا تفهم منين بيودي علي فين .
-نيجي بقي لحاجة لفتت نظري في اخر العمل اللي مش عاوز احرق احداثه و هي كلمة كاتبها ستيفن كينج في اخر العمل عن الفريق الخاص اللي بيشتغل معاه من محرر لناس بتقرا للناشر لمسئول حقوق الترجمة لمسئول بيع حقوق الأعمال لتحوليها لدراما فريق متكامل مش سايب حاجه و ده عشان يطلع عمل متكامل بحبكه سليمة حتي هو كاتب اني في حد لفت نظرة لغلطة عدت عليه .. السوال ليه ده مش موجود عندنا في العالم العربي ؟؟
