اقتباسات من كتاب مثلا : ديوان بالعامية المصرية

قولتلها مش نافع ..

‫ وحضنتها ومشيت

‫ ف القاهرة الحواديت

‫ ف القاهرة التوابيت ماشية على رجلين

‫ الغربة وضع العين على أرض مش عارفاك

‫ والغربة دفن الروح مع واحدة مش فاهماك

ريحتنا بيوت فارقناها

‫ هدومنا ناس قلعناها

‫ وسمّيعه

‫ بنعرف نكرم العالم ونقراهم

‫ مبنملش من الحكايات

‫ الليل غامق وانا مخي خلاص مبقاش دفتر

‫ بخسر اكتر

‫ كله مزايد

‫ لخبطنا الناقص ف الزايد

‫ وكفاية هموم يعني بزايد

‫ ملاين قاعدين ور شبابكهم

‫ حزن شابكهم

‫ ناشرين نظراتنا ف مشابكهم

‫ بتنقط دمع علي السكان

فيه تلاتة ماتوا ف جسمي ، ماعرفهمش

‫ يمكن عارفهم بس مش فاكر

‫ أو كنت فاكر إني باعرفهم

‫ ماتوا ف مكان بالقرب م القولون

‫ فصاحبت بنت - سبازمو دايجستين -

‫ عاشت معايا مسكّنه للألم

‫ واول مامشيّت صحيوا ناس تانيين

‫ لا باحب اعيّط جماعه

‫ ولا احب اعور خدْ

‫ قلبي ابن وسخة بجد

‫ عمال ينزل كراسي لناس مايعرفهاش

‫ قلبي اللي خلّف ( أمل ) من واحده ماحضنهاش

اتأملوا الحكايات

‫ في الدنيا ياما حاجات أكبر من الرؤية

‫ فبنمشي مانشوفهاش

بالتالي ياحضرات

‫ لا تُهملوا الخطوات أو تمشوا مش شايفين

‫ هتدوسوا على علاقات وبواقي بني ادمين

ياصافية وناعمه وكإنك

‫ مناقشة مابين جيتار وكمان

‫ أنا ناي احتواه الحزن من سنوات

‫ ف ضهري حفنة من تواريخ ورسم بنات

‫ وقلبي منتهي الحكايات