بدرية وأم حنان والبسلة: سلسلة بدرية وأم حنان 4

الكتاب الرابع والاخير - حتى الان فى السلسلة الجديدة - يناقش قضية تجارة الأعضاء بشكل ساخر لكن في رأيي الشخصي هو اضعفهم.

اشعر ان الفكرة لم تأخذ حقها فى الكتابة بشكل او بأخر او ربما محاولة تقديمها بشكل ساخر ادى الى حدوث مشكلة تتمثل فى ان المحتوى ظهر بشكل غير ساخر - جرعة الضحك فى الكتاب الاخير تكاد تكون قليلة - ولم اتفاعل كثيراً مع المواقف التى تبدو ساخرة لكنها كانت عادية جداً.

الكتب الثلاثة الأولى كانت السخرية والضحك اسياد الموقف وكنت اتفاعل كثيراً مع الاحداث باستمتاع والتى خرجت بشكل يجمع بين المضمون والضحك.

-------------------------

نظرة عامة على السلسلة الجديدة:

- السلسلة يحسب لها انها اعادت احياء الأدب الساخر الى الساحة الأدبية بعد ان كان فى عداد الأموات.

- السلسلة من تأليف كاتبتين ويحسب لهن انك لا تشعر بأي اختلاف فى اسلوب الكتابة رغم اني لا افضل الكتابة المشتركة.

- تدور احداث السلسلة فى فترة زمنية قديمة نوعاً ونجحت الكاتبتين فى نقل هذه الفترة بطريقة جيدة من خلال مفردات تلك الفترة.

- اهم ما يميز السلسلة الحوار الساخر جداً والمثير للضحك فى معظم الاحوال.

- الشخصيات من وحي البيئة الشعبية المصرية وتم تقديمها بشكل جيد جداً.

- اتمنى استمرار هذه السلسلة مستقبلاً فالمجال مفتوح لتقديم موضوعات تناقش قضايا المجتمع المصري بشكل ساخر.

- وجود نمط ادبي جديد على الساحة هو اضافة بدون شك ويعطي طعم مختلف وفرصة للقارىء للخروج عن السائد والمعاد والمكرر لدرجة الملل.

#أحمدمجدي

معانا النهاردة مراجعة كومبو للأربع أعداد الأولى اللي صدرت عن شركة سلاح التلميذ.

تعالوا نبدأ مع الأنطباع الأخير.

أول ما وصلت لنهاية العدد الرابع في السلسلة واللي كان بعنوان البسلة لقيتني بغني وادندن وانا متخيل بدرية وأم حنان مع بعض راجعين من السوق بيغنوا سوا.

"حلوين اوي وطعمين أوي الله أكبر علينا ولا قبلنا ولا بعدينا

أنا وحبيبي احنا الاثنين زي الورد على الياسمين"

فعلا السلسلة دي مختلفة ومميزة وفيها حاجة حلوة من ريحة أهالينا وذكرياتنا وفترة التسعينات والثمانينات.

ومش شايف نمط السلسلة دي غير في أنها مكتوبة عشان تكون مسلسل تلفزيوني ست كوم على نهج "راجل وست ستات - تامر وشوية" في قالب اجتماعي قصير، بس محتاج منتج مغامر ومنتج شاطر.

وبشكل خاص أنا مش قادر اتصور غير الممثلة إنتصار في دور بدرية والممثلة سماء إبراهيم في دور أم حنان.

ويلا بينا ندخل على الانطباع الأول.

يمكن الأنطباع الأول اللي اخدته من العدد الأول إن السلسلة تصنيفها رعب كوميدي لكن مع الأعداد اللي بعد كده احنا محافظين على الكوميديا ومكملين مع الدراما الاجتماعية بشكل اكتر مع شوية تشويق وإثارة وغموض.

وتعالوا نتكلم عن العمل وفكرته.

الغلاف قلت سابقا قبل كده انه مقبول وغامض شوية مفيش أي عامل جذب غير أسم العمل وتصنيفه.

والغلاف هنا هو أقرب إلى لوجو خاص بالسلسلة وهتكون إضافة حلوة لو كل عدد اتعمل له غلاف خاص.

أما عن نمط السلسلة فهي إجتماعي وغموض كوميدي ودي الحالة اللي بتعبر عن الحالة أو الفكرة العامة اللي في السلسلة.

والفكرة بكل بساطة قائمة على اثنين غلابة نقدر نقول طيبين بسذاجة وساعات أغبياء كمان والعالم بتاعهم لا يتجاوز حدود أول الشارع.

اثنين هما النقيض تماما عن أي صورة حديثة للمرأة الاندبندنت سترونج.

ومعانا كم من المغامرات والأحداث اللي بتحصل قبل ثورة التكنولوجيا والعولمة في فترة التلفزيون في أوائل التسعينات تقريبا قبل غزو الانترنت والتكنولوجيا ونتعرف على نمط الحياة في الحارة الشعبية أو المناطق العشوائية وانا أكاد أقسم أن بدرية وأم حنان شخصيات حقيقية واقعية موجودة في حياة وذكريات المؤلفتين.

السلسلة أو الأحداث في السلسلة مصدرها تورط الشخصيات بتاعتنا مع غرائب وعجائب أقوى وأعجب بكتير من قدرة أي واحدة منهم على الفهم والشخصيات اصلا مش مهتمة إنها تفهم.

احنا معانا ردود أفعال مدهشة تعتمد على فكرة الصدمة الحضارية والفكرية.

بدرية وأم حنان عن طريق الصدفة غالبا والغباء احيانا بيدخلوا في مغامرات وتجارب غريبة عجيبة ما بين جملة بتسمعها في التليفون تقلب حياتها أو زائر غامض وغريب في الليل عنده أهداف خاصة وما بين عالم حشرات مجنون أو مخبول يخليهم فار تجارب أو ست غريبة بياعة بسلة مسحورة.

العمل هنا من تأليف كاتبتين هما نسمة جمال ومي غريب وخروج العمل بالتماسك ده والجودة دي يعبر عن مدى التفاهم بين الكاتبين وان كل واحدة منهم كانت ماسكة لجام شخصيتها بدقة عالية.

وتعالوا نتكلم عن اللغة في العمل.

السرد والوصف كان باللغة العربية الفصحى البسيطة والحوار باللهجة المصرية العامية شديدة السطحية والمناسبة بشكل رائع مع أحداث العمل.

كان ملحوظ شوية إن في تكرار في بعض العبارات سردا في وصف طريقة المشي أو الهيئة والشكل في كل عدد، أما الحوار فهو كتير شوية لكنه كان مذهل وبجد كان فاكهة العمل لكن يا ريت شوية اهتمام بتنسيق الحوار عشان ممكن نقول في السلبيات أني ساعات بتوه ما بين الشخصيات ومين قال ايه.

وتعالوا نتكلم عن شخصيات العمل.

لأول مرة نشوف حسب ذاكرتي يعني شخصيات سلسلة في النمط الشعبي العشوائي ده.

شخصيات العمل فعلا عبارة عن شخصيات كارتونية وهي مناسبة للعمل والغرض منه وفكرة استعراض الطبيعة الشعبية وأكيد الجيل الجديد مش هيفهم كتير من الإيحاءات في العمل بسبب تصدر صورة المرأة المعاصرة الحديثة.

تصور وجود شخصيات العمل ده صعب جدا على الجيل اللي ميعرفش ونيس وسنمبل ولا شاف المال والبنون ولا عرف سي السيد والست أمينة.

ولسه طبعا على موقفي وهي إني أكاد أبكي من فرط الضحك كل ما أتخيل رد فعل أي واحدة من أنصار المرأة من بتوع الست مش ملزمة وهي بتقرأ بدرية وأم حنان.

وأخيرا تعالوا نتكلم عن الخلاصة.

سلسلة بدرية وأم حنان عمل خفيف جدا وسريع ومتحمس جدا لو في حد قدر يحول العدد ده لمسلسل ست كوم وده في رأيي المتواضع هيكون لفت نظر وتوعية للجيل الجديد بالجيل القديم.

البسلة، العدد الرابع من مغامرات بدرية وأم حنان

بقوا عشرة عُمر خلاص 😅

انفردوا بمساحة كبيرة من الأحداث في خفوت لوجود كلا من أبو وليد وحمدي في خلفية الأحداث.

وتقاسم معهما البطولة بطاطا والست أمه وأبو النجا.

في البدء تمنيت لو كانت بسلة أم بطاطا متاحة وفي الإمكان، حد يقول للسعد والهناء لأ ؟!

وأهو نعيش لنا يومين حلوين على رأي أم حنان وبدرية، بس ده بسلة إيه دي اللي تبقى دبلانة وتدب الحياة فيها من مسكة أم بطاطا ليها؟!

ولا أنهي بسلة مسحورة دي اللي تعدل المايل وتبدل الحال !!

مخاوف جديدة تظهر في أفق السيدتان اللتان كانتا تتهاديان في طريقهما للسوق ويا ليتهما ما مرتا من ذاك الزقاق الضيق حين نست الست بدرية أكياس الخضار في صيدلية الدكتور ميلاد ورجعتا لاسترجاعها.

ولا أقول لكم !! هو بخت بطاطا الغلبان، كان ربنا رايد له النجاة وتتفك أمه من قيودها.

نوع أدبى مختلف ساخر جدا، ضحك مش طبيعي لكن مع الضحك فى معانى إنسانية كبيرة وجانب نفسي عميق ومؤثر جدا بتتجر ليه من غير ماتاخد بالك ، كل دا من خلال ٢ستات فى منتهى البساطة واللطف بتضحك و تتألم معاهم، سعيدة جداً بالكاتبيتن و تجربتهم الجديدة علينا وفرحت إن دار نشر كبيرة تحمست و نشرتهم و أبجد عرفنا بيهم شئ ممتاز و أتمنى يتكرر،منتظرة أعداد تانية لإن بدرية وأم حنان هيوحشونى قوى♥️

أنهيت لتوي العدد الأخير من هذه السلسلة العظيمة، شكرًا على هذا الكم من الضحك والمرح♥️

تطور كبير في الشخصيات و الاحداث العدد ممتع جدا

و كان عندى حق اني مبحبش البسلة

فين الجزء الجديد اتأخر أووووووي

😭

شكرا علس السلسلة حلوة جدااا

والبسلة كماااان كرهتها 😂