ستي قالتلي

نبذة عن الكتاب

المثل بيقول «أعز الوِلد وِلد الوِلد» وعشان كده جداتنا دايمًا ليهم أكبر تأثير في حياة كل واحد فينا، مش بس كانوا بياخدوا بالهم من أكلنا وكل ما جدتك تشوفك تأكلك عشان على كلامها «انت خاسس أوي ومابتاكلش كويس» لكن كمان هما خلوا حياتنا مختلفة بحواديتهم وحكاياتهم والأشهر أمثالهم. مع كل موقف أو حاجة عايزة توصلهالك تديك مثل شعبي … كلمتين بيلخصولك حكمة عظيمة بشكل عجيب، وطبعًا معظمنا معرِفش قيمة الأمثال دي أو معانيها غير لما كبر … ولأن في ثقافتنا المصرية والعربية في أماكن كتير بيتقال للجدة «سِتِّي»، فجمَّعت لكم في كتاب «سِتِّي قالتلي» أمثال كتيرة جدًّا مصرية وعربية بشَرْحَها البسيط والمواقف اللي مناسب تتقال فيها. أمثال موجودة في تراثنا الشعبي ومحفوظة في كتب وموسوعات الأمثال الشعبية على مرِّ التاريخ. ولأن سِتِّي قالت لي «مِن فات قديمه تاه» في الكتاب ده هنرجع نفتكر تراثنا ونفهمه بشكل بسيط وممتع … واِنت بَقَى سِتَّك قالت لك إيه؟