ميت على قائمة الإنتظار

كما ذُكر في نبذة الكتاب احداث العمل بتبدء بطفل صغير بيقع تحت عجلات الترام ولكنه بطريقة ما بيتحلق قبل موته، و دا الشيء الي خلاه يجرب يعني ايه احساس انك معرض لفقد حياتك و احساس انك بالفعل ( م.يت علي قائمة الانتظار).

للاسف انا كنت داخل العمل دا و فاكر أنه (رواية) ولكن معرفتش انه مجرد قصص قصيرة غير لما خلصته و دا كان سبب تعليقي بالسلب علي بعض النقاط من وجة نظري طبعا 👌

العمل مكون من ٦ قصص قصيرة كلهم بيتمحوروا حول الم.وت، و انا برده مخدش بالي من جملة ست روايات بداخل تابوت واحد الي علي الغلاف 😓

ندخل في اللغة و السرد وبعد كدا اوضح نقطة القصص القصيرة..

لغة العمل عربية فصحي متأرجحة جداا، شوية حلوة شوية ركيكة معرفش هل الكاتب كان قاصد دا ولا لا بس ساعات كان بيقحم كلمات عامية في السرد كانت بتكون مش حلوة بصراحة.. وصف الأماكن و الشخصيات كان ضعيف، في الاول كان جيد بعد كدا شبه أنعدم، الكاتب مركز علي فكرة التأرجح بين الحياة و الم.وت علي كل القصص و نسي يهتم بالتفاصيل دي 😓

نرجع لنقطة القصص القصيرة، طبعا دا خطأ مني انا مش من الكاتب اني كنت فاكر اني هقرأ رواية.. عشان كدا أتشديت في الاول لأنه اول قصة فعلا حلوة، بس بعد كدا لقيت احداث تانية غريبة ملهاش علاقة بالاول.. قلت حلو، الكاتب هيلعب في كذا خط و يربط في الاخر طلع لا.. مفيش ربط لأنهم ببساطة قصص، هما اه كلهم عن نفس الفكرة ولكن منفصلين مش متصلين!

و طبعا بقول تاني دا مش عيب، انا بس سقف توقعاتي وقع عشان مش دايما بفضل القصص القصيرة... قلت مفيش مشكلة أكمل قراءة

ولكن برده حتي القصص كانت فيها مشاكل

مبادئا هما شبه مكررين.. مش بس نفس الفكرة لا نفس الاحداث تقريبا بشخصيات و مواقف مختلفة و دا ولد ملل.. الـ٦ قصص شبه بعض..

دا غير ان تسلسلهم كان مربك و نهايتهم مش مرضية (إلا اول واحدة )

فلا عرفت أستمتع بيها كرواية ولا كمجموعة قصصية😊😓

واه.. تحذير للي حابب يقرأ العمل.. انه ١٨+ شويتين كدا.. بعض الألفاظ و التعبيرات و الدمو.ية كانت زايدة.. هي مش فجة بس برده لازم أقول

من الحاجات الي تُحتسب للعمل هي ان الكاتب قدر بشكل ما يخوفني كقارئ من فكرة الم.وت و ان اي انسان أخرته معروفة و العمل الصالح و هكذا.. كان نفسي بس الفكرة تستغل صح..

للاسف معرفتش استمتع بالعمل.. دا مش معاناه انه وحش.. إطلاقاً لا هو مخالف لذوقي في الأدب و برده زي ما قلت اول قصة كانت جميلة حقيقي.