رحلة إلى الفضاء الخارجي

لما شوفت الغلاف عجبني وقررت اقرأ الكتاب وكنت متوقعة انه هيكون حاجة حلوة بس طلع فعلاً الكتاب مش بيبان من عنوانه خااالص.

الكتاب المفروض عبارة عن ٣ قصص قصيرة في مجال الخيال العلمي والمغامرات ..اول قصة لرائد فضاء وزميله ذهبوا بالمكوك الي الفضاء الخارجي لاستكشافه وفعلا بيكتشفوا كوكب برتقالي وبيدخلوا الكوكب وبيتعرفوا علي طبيعته وقوانينه (وطبعاً الكوكب دا طلع بيرفيكت ومفيهوش غلطة وكل الجوانب ممتازة ) ،

وثاني قصة اثناء عودتهم بيكتشفوا كواكب كتير ممتازة جداً ولكن بيرجعوا ارض الوطن وبينقلوا كل المعلومات اللي عرفوها وكل الافكار عشان تُطبق في ارضنا وتكون مفيش منها اتنين !! (وبتُنفذ الافكار وبتكون ارضنا حاجة كدا بسم الله ماشاء الله مفيش منها اتنين) ،

القصة الثالثة جزيرة الأحلام وعبارة عن رحلة في المحيط والسفينة بتدخل مثلث برمودا وبترجع للعصر الطباشيري..!!!!!

وبنشوف طاقم السفينة والناس بيعيشوا ازاي في الجزيرة دي وبيقرروا ميرجعوش تاني لعالمهم لو في فرصة للرجوع وانهم مبسوططن جداً في الحياه البدائية دي.

انا مقدرة طبعاً انها خيال علمي بس مش كدا 🙃

الهدف الوحيد ان الكاتب بيحمد ربنا علي جمال الطبيعة وجمال صنع الله .

الكتاب فعلا في معلومات كتبر ولكن معلومات بسيطة ممكن تكون مُبهرة لطفل عنده ١١ سنة .. وهي صغيرة جداً معرفش هل هي فعلا قصص للاطفال ولا ايه ؟ بس الوصف كان غريب واغلب جُمل الوصف بتنتهي ب (جداً جداً جداً) ؛ اللغة مش سيئة ولكنها ليست الافضل .

رأي: مجموعة قصص قصيرة هتكون ممتازة جداً للاطفال .

#فنجان_قهوة_وكتاب

#مسابقة_تحدي_ابهار_وفنجان_قهوة