فجر المرايا: مولد الظل

فجر المرايا

تصنيف الفانتازيا الملحمية نادر الوجود في الأدب العربي وقليل جدا ما بلاقي حد واخد الموضوع على محمل الجد في بناء عالم كامل متكامل بعيدا عن النحت من المطروح.

رواية فجر المرايا هي رواية من التصنيف دا واحد أهم الروايات اللي خلتني أجدد شغفي بالفانتازيا العربية، الرواية للكاتبة منار بدر الدين وعدد صفحاتها 440 صفحة وجزئها الاول من نشر المكتبة العربية للنشر والتوزيع والجدير بالذكر ان جزئها التاني متوافر مع دار ابهار للنشر والتوزيع.

القصة:

بتبدأ الحكاية في مملكة كبيرة عاش فيها زمان ما يعرفوا بأخوة الظل وهما مجموعة من المحاربين الأشداء اللي ليهم قصص كتيرة ومخيفة عن طريقة قتالهم المريبة وسحرهم المرعب اللي ذاع صيته في كل مكان، لحد ما قامت الحرب وبدون ذكر تفاصيل انتهى الأمر بتركهم للمملكة وحلول شعبين جداد مكانهم هما شعب العيون الصفراء وشعب العيون الحمراء.

قبل ما أخوة الظل يمشوا سابوا وراهم لعنة هي سر العالم دا كله وهي لعنة المرايا، وباختصار الشعبين مجبورين على أخذ اطفالهم من سن معين وعرضهم قدام مرايا عملاقة ظهرت جراء سحر أخوة الظل وبالتالي يكتشفوا حقيقة أرواحهم هي بتنتمي لأي شعب من الشعبين وعليه يترتب المكان اللي هيعيشوا فيهم سنين حياتهم القادمة

لعنة المرايا لو تم عدم الالتزام بيها لأي سبب هتحل كوارث مميتة، وفي نبوؤة بتقول ان هلاك الشعبين هيكون على ايد طفل هجين بروح نصف حمراء ونصف صفراء.

بداية الاحداث لما بنكتشف ظهور حقيقة احد الشخصيات المهمة ذات المكانة المرموقة ان روحها هجينة فيا ترى ايه اللي هيحصل.

الشخصيات والعالم:

بناء العالم أصعب نقطة ممكن تواجه أي شخص حابب أنه يكتب فانتازيا لانه مطالب بانشاء شعوب وثقافات وعادات وتقاليد وأعراق كل ده من الصفر، وقد اجادت الكاتبة بناء العالم بشكل مرعب فالتنوع بين البيئات من جبال الثلج وأراضي الصقيع والغرب الأخضر والسواحل خلاني أحس فعلا بالعالم الواسع وأنه موجود فعلا مش حبر على ورقـ، عالم كبير بتسافر فيه مع شخصياته بين الحلو والمر في عدد صفحات كبير(وهو الأصل في روايات الفانتازيا) بتحس مع كل لحظة فيه بحماس للركض بحرية بين المدن والقرى والأقاليم

بالنسبة للشخصيات فخليني أقول أن كل شخصية كانت واضحة المعالم ذات بعد نفسي قوي جدا، بين الشاب فاقد الهوية اللي بيبحث هدف جديد وأخواته الي اتفرقوا وكل واحد فيهم قدام تحدي كبير، بين الأسرة المالكة والإنقسام الل بينهم وهشاشة نظام الحكم الي على شعرة وينهار، الجواسيس والمؤامرات الي بتحاك في الخفاء وبين العالم المهووس بالبحث عن الحقيقة ومساعدته الي تعرضت لظروف من شأنها تكسر أي بنت، كل دا وبشكل مبهر بيتم تجسيده بسرد وحوار رقيق ساعات وقاسي دموي في ساعات تانية، مخابش ظني أبدا في الشخصيات اللي حبيتها زي رادو وبودير وكيرا على رغبتي في معرفة المزيد عنها

اللغة:

لو ليا مأخذ على الرواية هيكون تكرر بعض الكلمات وده سهل التعديل ومش بينقص أبدا من جمال العمل، ده غير التشبيهات والوصف الجمالي حقيقي للمعارك والقصور والقرى والي رسم العالم رسم في دماغي وحفر مناطق بعينها في ذهني بطريقة صعب أنساها.

جمل السرد مثلا بيظهر في وصف السفينة والجو البحري الرطب أو التعذيب الي حصل في فترة من فترات الرواية أو بؤس المرضى ومشاعرهم المضطربة.

حتى الحوار كان فيه رنة جميلة لكل شخصية، الأطفال لسانهم بريء ورقيق وأسألتهم الساذجة بتضيف للنص واقعية ساحرة الحقيقة، والكبار بعقلياتهم الي ساعات متحجرة وساعات مرنة بتتجلى في الملك وأبناءه على سبيل المثال وغيره من الامثلة

خلاصة:

حكاية ملحمية بأرض تحمل الكثير من الأسرار تجري بين صفحاتها لاهثا للبحث عن المزيد ولا شيء سوى المزيد

متحمس جدا للجزء التاني الي أكيد هقراه قريب وأنصح وبشدة بهذا العمل.

#فجر_المرايا

في قراءة جماعية كالعادة مع اختي الغالية اسراء عادل و اول قراءة مع اسراء صبحي الرواية دي انا عرفتها من مراجعة البوكتيوبر طارق عز وقت ما عمل عنها مراجعة و مر علي الفيديو ده سنتين، وقتها كنت عاوز اشتريها و مش عارف ده ماحصلش ليه ساعتها ثم انتقلت لدار ابهار و صدر الجزء الثاني و برده كنت عاوز اجيبها بس قررت انتظار صدورها في أبجد و نزل الجزئين بالفعل و اتحطوا في مغارة قائمة سوف اقرأ.

و من بداية السنه كنت حاطط اكتر من عنوان أقراهم علي مدار السنه و فات نص سنه و قررت بقي اني اعمل وقفة واخد حاجه من القائمة و بالاتفاق مع اسراء عادل اتفقنا نقراها سواء و انضمت لينا اسراء صبحي اللي سبقتنا احنا الاتنين و خلصت و بدأت الجزء الثاني و يمكن تكون خلصته وقت كتابة الريفيو ده ، رغي كتير بس دي حكاية العمل معايا.

مولد الظل - الجزء الأول من فجر المرايا

صادره عن دار ابهار

تنتمي لأدب الفانتازيا و متوفره علي تطبيق أبجد

التقييم 4 نجوم

الصراحة انا كنت داخل العمل بسقف عالي من السمع عن العمل و ده أتأكد بعد ما خلصت الجزء الاول منه و بدأت الجزء الثاني علي طول فكرة ان ده يكون بسم الله الرحمن الرحيم اول كتابة للكاتبة منار بدر الدين ده لوحده يستحق رفع القبعة ، بس خلينا نتفق ان الرواية عاوزه قارئ بيحب الفانتازيا و عنده طوله البال عشان يفهم العالم و يحفظ الشخصيات الكتير منهم الاحياء و منهم الأموات ده غير ان الأحداث بتدور في اكتر من مكان من الحاجات اللي تتحسب للعمل وجود الخريطة و وجود شجرة عائلة للشخصيات ده سهل كتير في فهم العمل لغة العمل محترمة السرد و الحوار متوازن و ان كان بس في نقطة و هي تقديم رد الفعل ثم ذكر صاحب الفعل .

بناء الشخصيات في عمل فانتازي زي ده كان حلو و متماسك جدا ، بالنسبالي العمل كان ممكن ياخد العلامه الكاملة لكن كان في كام خطأ.

عزيزي قارئ الريفيو ارجع عشان في حرق للاحداث جاي ⚠️⚠️

-طول العمل كنت منتظر اعرف "فين" اصيب ازاي و لما جيه المشهد اللي مفروض افهم فيه طلعت منه مش فاهم حاجه خالص و المشهد ناقص كتير. -"كيرا" كنت مفروض افهم اي لمحه عن اللي حصلها .

مشهد "فين" في وادي الاسود كان ممكن يتكتب افضل من كده لان في نقط وقعت مني مفهمتش هو بيحلم ولا بين الواقع و بين مقاومته للغيبوبة كنت احب افهم اتصاب ازاي اعتقد ان الاستاذة منار كانت عاوزه تكتب المشهد من منظور اللحظة اللي بيعيشها و ازاي متعرض ل اصابة و بينزف و ازاي بيعيش احداث بين الواقع و بداية فقدان الوعي.

-نيجي بقي للمعلم ران و مساعدته ليليس و المشهد الملحمي في انقاض الحالمين الصراحه هو حلو لكن انا فهمت منه حاجات و حاجات وقعت مني لان الرؤية من الماضي و الواقع اللي حصل تداخلوا و حصل لبس بينهم.

- بعض الاماكن كانت بتذكر لكن غير موجوده علي الخريطة .

-اخر نقطة وهي متعلقة بالتدقيق الإملائي للأسف فيه اخطاء و في كلمات حروفها مفككه من بعض او شابكه في بعض كانت مزعجه جدا في نسخه أبجد.

في المجمل هي رواية تستحق القراءة و لكن عايزة صبر و روقان

أنهيت الرواية ومازلت أعيش أحداثها شكرا للكاتبة منار بدر الدين

على هذه القراءة الممتعة التي أحاطتني بمشاعر قلما يحيطني بها كتاب ، من المؤكد أنني سأقفز مباشرة للجزء الثاني موسم الرماد ..

من أفضل روايات الفانتازيا اللى قريتها فى حياتى

فجر المرايا

عالم فانتازيا جديدة مؤسس بعناية و هدوء و مع ذلك شيق جدا

السرد غير ممل و التنقل فيه رائع و غير مشتت اطلاقا

الشخصيات مبنية بشكل تفصيلى مبهر و اتعلقت بيهم جدا و بعالم المرايا عموما

تجربة كويسة اوى و انبسطت بيها

و متحمسة للجزء التانى