📌الجميع لديه ما يخشى الحديث عنه أو بمعنى آخر ما يرغب فى نسيانه واقتطاع هذا الجزء من ذكرياته.
دايما فى المواصلات هتلاقى نفسك سرحان
سواء أنت اللى سايق ولا قاعد متفرج من الشباك
هتسرح فى ماضيك وتقلب على نفسك قديم وجديد..
هتقارن حالك بين الزمنين
وتراجع قراراتك واختياراتك وتدمع دمعتين..
ما بالك بقى لو الطريق طويل ومعاك ركاب آخرين
واتعطل بك القطار ومش هتفضل سارح مع نفسك كتير
علشان مش مضمون العطل هيستمر قد ايه..
وبما أنك طبيب 👨🏼⚕️ نفسي
فأكيد هتبدأ تقرأ وشوش اللى حواليك
وتستشف منهم الحياة شكلها ايه
طيب ما تحاول تفتح حوار ونقلبها فضفضة مع الغرباء يمكن نرتاح ونشيل شوية من الهم اللى على الأكتاف.. أصل مع الغريب مفيش حكم عليك
مش هيسيطر على تفكيرك ولا هيتحكم فيك
ولا هيقولك ما أنت لو كنت عملت اللى قولتلك عليك ويفرح ويشمت فيك لا والأسوء أنه ممكن يمسكها عليك 😉
بالعكس هيسمعك وبس من غير تنظير..
وبعد ثوانى هينسى أنت أصلا مين و قولتله ايه
ويا عالم لو اتقابلتوا تانى هيتعرف عليك.
اقتراح مسلى صحيح نضيع به وقت العطل أكيد..
بس يا ترى الحكايات اللى هيبوحوا بها الركاب
هتبقى ممتعة ولا موجعة..
أكيد مرهقة ومتعبة هو فى حد بيحكى الفرح 😀
كل واحد قرر يبوح بالبقعة السوداء فى حياته
اللى عكرت يومياته وتأثيرها مازال معلم فى وجدانه.. ولحد اللحظة مش قادر يتجاوز ولا يعدى ولا يسامح.. ومين عارف عطل القطار 🚆 هيبقى آخر المطاف وهيكتب نهاية سيناريوهات الأبطال
ولا هيدخل حبة نور من شبابيك العربات 🤷♀️
رواية انسانية مكتوبة بأسلوب راقى حزينة صحيح بس هتلمسك أكيد… بالرغم من سطور الحزن والوجع هتحس بهدوء فى طريقة الكاتبة وهى بتعبر عن الألم..
ياترى لو أنت مكان واحد من الأبطال
هتفضفض ببقعتك السوداء مع الغرباء❓
ناقم على أفعالك ومش عارف تتجاوز أزماتك ونفسك تتخلص من حياتك وجات الفرصة قدامك
هتتمسك وقتها وتقول سماح هتجاوز خلاص والحياة لسه قدام اقدر اصلح اللى فات ❓
ولا هتسلم نفسك للموت اللى اتمنته يجيلك يوم ويخلصك من افكارك اللى اثرت على حياتك❓
اسئلة صعبة بس محتاجة رجوع للنفس كده وشوية تفكير أكيد بعدها الوضع هيتغير كتير بس احنا ندى فرصة لنفسنا ونشوف ونعرف عايزين ايه 🤷♀️
📌يبدو أن من كُسر جزء بداخله يستطيع أن ينصت إلى حطام الآخرين، وأن يفهم ما مروا به فبالرغم من اختلاف المشاهد يبقى الشعور واحد.
#مكتبة_دنيا
#قراءات_٢٠٢٤
