جريمة اتعملت بشكل مختلفة، رواية بنعرف خلالها ايه علاقة الجريمة بالطب والعقاقير الطبية، ايه علاقة أبقراط مؤسس الطب بالجريمة، دايمًا روايات الجريمة اللي بتتنفذ بشكل غير المؤلوف بتكون مميزة لذلك الرواية دي قوية جدًا.
رواية جريمة أبقراط لمي صالح هي أول رواية أقرأها بعد بلوك قراءة طويل شوية والصراحة كنت قلقان منها نسبيًا لأني مش من محبين القلم النسائي في النوع ده من الأدب -أدب الجريمة-.
الحقيقة ده مش ريفيو خالص، فبما إنه مجرد رأي أنا هتكلم بالعامية عادي…
الرواية بدأت بوصف المكان الرئيسي لانطلاق الأحداث، وبعد كده بدأ التدرج -الممتاز- في بناء بعض الشخصيات الأساسية، البساطة المفرطة في اللغويات والتماسك القوي للسرد كانوا من أقوى مقومات الرواية من وجهة نظري.
تتابع الأحداث كان متوازن، النقلات بين الخطوط والحِقَب الزمنية اتنفذت بشكل كويس، التلاعب بالمسميات كان عبقري.
النهاية كانت الجزء الأقوى بالنسبالي لأني بحب الالتواءات اللي بتقلب شكل الرواية تمامًا.
الرواية بشكل عام مختلفة عن روايات الجريمة المتعارف عليها، أحداثها بسيطة وسلسة والحقيقة أنا اتبسطت بيها جدًا، وكانت تجربة لذيذة وموفقة.
