صفحات الرواية تبدأ بإهداء جميل وعبقري صراحة وبعدين مقدمة وتوضيح إن أحداث الرواية في عام 2005 على لسان أو من منظور بطلها وهو خالد وتبدأ مع تعريف مين هو البطل ده وظروفه.
ونبدأ
أحداث الرواية تبدأ بمشهد روعة مشهد خاطف غريب عبقري ولغة عبقرية سلسلة وسهلة تبدأ تتفاعل معها وتدريجيا تحس وكأنك بتشوف إفتتاحية لواحدة من أجمل أفلام كونان المتحري الذكي أو ده كان شعوري الشخصي يعني.
عندنا مشهد استفتاح قوي جدا جدا وبصراحة من اجمل المشاهد الافتتاحية.
وبعد المشهد ده ندخل في عالم الرواية ونتعرف على البطل و ظروفه الشخصية وحياته وأصحابه وعمله.
وتدريجيا هوب شقلباظ مع دبل كيك نلاقي نفسنا في وسط معمعة مش عارفين مين مع مين ومين طيب ومين شرير.
ويلا بينا بقى نتسحل مع الكاتب وعالم الديبوك والجن والشياطين لكن مش منظور ديني احنا هنا بنتكلم عن فكرة بره الصندوق شوية تحس وكأنها من قصص عوالم ألف ليلة وليلة إن كانت في عصر جديد نسبيا وده اللي يمكن نقول عليه فانتازيا مخلوطة بالرعب.
وخلوني هنا نتكلم عن السرد المكتوب بلغة عربية فصحى كويسة جدا جدا وحوار مكتوب بالعامية مناسب جدا لطبيعة الأشخاص وقريب جدا من اللغة الدارجة في الشوارع والحارات والتي شعرت معها ببعض الافتعال.
تعالوا بقى نتكلم عن النهاية والحقيقة إن العمل منتهي فتح المجال لجزء ثاني - إن شاء الله - واللي أتمنى إنه يجاوب على بعض الأسئلة والاستفسارات.
#أحمدمجدي
