مراجعات رواية خرونوس

❞ جُثّة زائدة مجهولة، ناس اختفوا بدون أثر، والآن رجل ميّت يأخذ مُلاحظات.. ❝

الاقتباس ده يشوقك للرواية من غير أي حرق للأحداث.

لو انت من محبي القراءة عن الأحداث الغامضة او الخيال العلمي ف الرواية هاتعجبك..

لو انت من محبي فيلم interstellar ف الرواية دي هاتعجبك هما مش شبه بعض بس نفس الأجواء يعني.

ترتيب أحداث الرواية بالنسبة وضح فكرة الرواية.. بمعني انه بدء من حدث أساسي هايبقي غير مفهوم في البداية ولكن هايوضح في النهاية وهاتحس انك بتلف في نفس الدايرة بين الماضي والحاضر والمستقبل..اللي هيا أساسا الفكرة الأساسية.

الجزء الأول كان سرد أحداث منفصلة (بس هيا متصلة 😀 وده أسلوب الكاتب في مقالاته ف انا كنت عارفة ان معدل التشويق هايزيد.. والحقيقة ماخيبش ظني).. بتبدأ توضح واحدة واحدة في سلسلة أحداث غامضة وانفجارات وجثث وتجارب علمية وبالمناسبة شرحها كان جميل ( بس اللي مش بيحب اجواء شرح نظريات علمية اللي هيا حاليا بمثابة خيال علمي هايحس بملل في الجزء ده).. في الجزء الأخير كل حاجة بتحصل تقريبا بنعرف سببها..

فيه روايات تحب تتوقع احداثها ولو طلعت توقعاتك صح تعجبك اكتر الرواية دي كانت بالنسبة لي كدة (بردو النقطة دي ممكن تكون سبب انها ماتعجبش حد تاني) .. توقعت كام حاجة وطلعوا صح ف اتبسطت جدا.. ومع ذلك فيه أحداث تانية فاجئتني..

خلصتها في جلسة واحدة ماقدرتش أسيبها لأن السرد مشوق جدا وعجبني انها كانت باللغة العربية مش العامية .. الغلاف والاسم كان غريب بالنسبة لي ولذلك بحثت عن الاسم الاول وفهمت الطابع العام بتاع الرواية.. بالنسبة لي كانت قراءة خفيفة وجميلة ✨

الرواية صغيرة مش كبيرة، بتبدأ كجريمة وبتكمل كخيال علمي، في الاول بتنط مع اكتر من شخصية لأكتر من حدث هتحس ان في رابط غامض بينهم بس مش هتكون مستقر مع شخصية واحدة لفترة او حدث واحد الا بعد شوية مش من بدايتها. النقطة دي عجبتني الطريقة اللي اتعملت بيها لإنها رغم انك مش ماسك الحبكة لسة بالظبط الا انها اتكتبت ببساطة، فمتهتش.

بمعنى؟، بمعنى ان الجريمة نفسها او الخط الاساسي اللي اتمسك بيه حبكة الرواية ده، مكانش فيه استعراض لقدرة الكاتب على انه يخلق الجريمة المتفرعة الكبيرة ويرمي انتباه القارئ في مليون اتجاه، دي حتة شفت كتير بيقع فيها وبتيجي عند نقطة بتفصلك من الرواية بالكامل، غير انك بتبقى عارف ان الكاتب او الكاتبة بيعمل كدة بقصد علشان يتوهك، فانت بتلاقي نفسك خمنت النهاية + حسيت بإحباط لإن من كتر التفرعات الخيوط متجمعتش كلها.

ده محصلش هنا، ودي كانت نقطة قوة حلوة جدًا عجبتني وخلتني اكمل.

اسلوب الكتابة في السرد والحوار كان ناضج، ده كان نقطة قوة تانية حلوة جدًا. العمل مفيهوش استسهال ومفيهوش استعراض، وبالتالي هيعجب اللي مبيقراش تقيل واللي متعود عالقراءة الثقيلة.

حبيت الرواية من اولها لآخرها بصراحة، حبيت المعلومات اللي اتذكرت في الرواية جدًا والاسلوب اللي اتعرضت بيه، يمكن الحاجتين الوحيدين اللي ضايقوني شوية اني كنت محتاجة تفاصيل اكتر عن الشخصيات، عمق اكبر للشخصية بحيث احس بإني متعاطفة معاها او كارهاها، والرواية كانت محتاجة تطول حبة، لإن النهاية جت سريعة جدًا مقارنة بالجزء اللي قبلها كله.

لكن كمجمل كانت تجربة حلوة جدًا واستمتعت بيها بصراحة، خلصتها في يوم

#ريڤيو_سريع عن رواية (خرونوس) للكاتب/ محمد عبد المُحسن.

★★★★★

«أنا أُنهي أسطورتي بنفسي.»

يمكننا أن نرىٰ من خلال هذه الجملة المعنىٰ الضمني للعمل الروائي (خرونوس) حيثُ يختار الكاتب أن يبدأ أولىٰ رواياته بطفل صغير تحاربه الدنيا منذ ولادته، لينتقل بعدها مباشرة لعالم التحقيقات الجاذب لمحبي الجرائم والتفاصيل الجنائية.

عالم (شريف) و(عظيم) الذي يظن كلاهما في بداية الأمر أنهما علىٰ موعد مع حادث روتيني، إلا أنه سرعان ما تتكشّف لهما خطورة التحقيق وتوابعه.

المميز في هذه الرواية أنها من النوع الذي يبدو عاديًا في باديء الأمر؛ إلا أن مرور الأوراق والأحداث يُظهر لقارئها أنه أمام عمل روائي مميز؛ ومن أكثر النقاط تميزًا -من وجهة نظري-صياغة الحبكة. فالبداية تأتي كجريمة والنهاية تتحول لخيط من المعلومات الدقيقة والمميزة.

أما عن تفاصيل الرواية فجاءت مليئة بالأحداث والمعلومات العلمية التي تحتاج إلىٰ تركيز المطلع عليها طيلة فترة القراءة، بالإضافة لسلاسة الأسلوب وبساطته مع سرد وافٍ ومفصل باللغة العربية الفصحىٰ.

ونهايةً؛ أرشحها لمحبي الألغاز المرتبطة بعالم الخيال العلمي.

#قراءات_حول_العالم

كنت متأكدة ان محسن يوم ما يكتب رواية هتكون تحفة والحقيقة انه فعلا عند حسن ظني فيه

الرواية جميلة و فكرتها رائعة عيبها الوحيد انها خلصت بسرعة