الحياة المزدوجة للمدعو ج

#ريفيو_مش_قصير

الرواية: الحياة المزدوجة للمدعو "ج"

اسم المؤلف: سلوان البري

صدرت عن: دار الرسم بالكلمات/ العليا للنشر

_______________________________________________

عدد صفحاتها:

- ما يقرب من ١٥٠ صفحة على أبجد، رغم قصرها يظل موقفي منها رمادي شوية، بين تتابع الأحداث المشوق والتويستات اللطيفة، إلا إن فيه أجزاء في الحوار والسرد خلتني اقف شوية، لكن في النهاية تعتبر خفيفة نسبيا.

________________________________________________

الفكرة:

ركيزتها الأساسية عن غريزة الانتقام، ونظرة عن طريقة الإنسان وتحوله للنقيض، والصراع في التحول ده، وتداخل المصائر وصولا لمرحلة لا غالب ولا مغلوب.

- بالإضافة لأفكار عن أشياء وعكسها زي الطاعة العمياء والتسلط، البراءة والمكر، الرفق المبالغ والجفاء مع القسوة المفرطة، تم توظيفها بشكل جيد موائم لطابع الحبكة

- بالإضافة لأفكار فرعية عن فجيعة الموت للمحبين ودي كانت متداخلة مع الركيزة ومظبطة رتم الأحداث

_______________________________________________

الحبكة:

- معقولة شوية لطابعها شبه البوليسي، خط سيرها كان متسارع نسبيا، الأحداث كانت معقولة في تحولها وتنظيمها، يمكن بس كان فيها حاجات غامضة شوية كانت محتاجة تفاصيل أوضح في الشخصيات، لكن كانت ممكن تتقل الحبكة وتشوه القالب

- لفت انتباهي إن الخط الزمني والمكاني على رغم انهم مذكورين إلا إن الدخول في تفاصيل أكتر مكانش بقدر كبير، حتى في مهنة جمال أو تفاصيلها إلا بعض القشور، ده جيد بالنسبة لي بسبب الفكرة وإنها كانت ممكن تتشتت بسبب كده

-رسم الفكرة في الحبكة كان واضح ومباشر، وده اللي خلى المشاهد كأنها حية بشكل كبير، وده اللي خلاني اتأثرت بمشاهد موجودة فيه

- النهاية مكانتش ظريفة بالنسبة لي، يمكن شوفتها تسريع للأحداث والمصائر، بس بناء على بناء الأحداث في الأول كنت متوقعها أقوى، إلا إنها نوعا ما مناسبة، غير كده مشهد النهاية كان لطيف بالتويست اللي فيه رغم تقليديته شوية بس عجبني.

________________________________________________

الشخصيات:

- دوافعها مرسومة بشكل حلو، عجبني فيها ازدواجية شخصية جمال وتردده بين الشيء وعكسه، وتأثيرها على اللي حواليه، وكان واضح فيها عقدة الاضطهاد والبارانويا بشكل كبير

- شخصية أحمد كانت لطيفة لو اعتبرناها ماضي جمال أو ضميره وتمثيل النزاع بين الغريزة والعقل

- الشخصيات الفرعية كانت لطيفة في إنها عادية فعملت مساحة كويسة للفكرة وتأثير الغريزة بين دواخل اللشخصيالا زي شخصية "حسين" وفكرة الطمع شخصية يوسف وعادل في "قلة الحيلة" البراءة في شخصية طفولية زي "كرمة" أو شابة زي "سولاف أو جميلة أو رامي"

- نيجي للخلفية الدينية، دي شايفها موحدة زيادة عن اللازم شوية، لطيفة أينعم لكن فصلته شوية عن الواقع، وده تفضيل شخصي مش أكتر

________________________________________________

اللغة والسرد والحوار:

- اللغة فصحى، جامدة شوية في العبارات والألفاظ، فدي خلتني اقف شوية عن النص، وكان بالنسبة لي يكون اللغة أسهل شوية باعتبار الحبكة والفكرة نفسها خفيفة

- السرد بين الراوي العليم والمتكلم، فيه أوقات بشوفهم تداخلوا مع بعض لكن فيه أوقات بحس إنها مقصودة، زي مشهد كأنه سينمائي مع تعقيب بسيط من الراوي المتكلم.

- الحوار عن لغته ذكرت مشكلته في اللغة، ولكن من ناحية تانية كان لطيف شوية ووازن السرد، بس اللي استغربته وجود اسماء المتحاورين كأنه حوار مسرحي، يمكن ده مش معتاده من اللي قرأته، لكن مجملا عمل مساحة لطيفة لدوافع الشخصيات.

قصيرة سريعة بحبكة جيدة لكن النهاية بالنسبالي كان ممكن تكون افضل و أقوي

استمتعت بتفاصيلها وتسلسل احداثها، واعتقد انها تستحق التحول لعمل درامي