انا كقارئ بفضل في انواع الروايات (الرعب) و للاسف في ٢٠٢٣ كتابات الرعب كانت ضعيفة.. المعروض كتير لكن الي يستحق القراءة فعلا و عامل نص قوي يتعد علي صوابع اليد.. وعين الرب تعتبر واحدة من الفئة القليلة الي تستحق القراءة
الكاتب هنا طرح سؤال غريب جدا.. ببساطة هل ينفع يحاسب الناس علي الافعال الخاطئة لمن هم من دمهم.. يعني انت كشخص مثلا تتحاسب او تعاقب علي فعلة قذرة عملها جدك من عشرات السنين.. هل دا عدل.. ولا عشان بيربطكم دم واحد؟!!
(الرواية تصلح لمن هم فوق الـ ١٨ سنة لوجود مشاهد جن.سية و دمو.ية) ⚠️⚠️
بتبدء احداث العمل بعزاء خاص بالجدة ماريتشا، و بنشوف الأم و بنتها الطفلة (إيما) الي هي تبقي حفيدة الجدة المتوفية، بتاخد الطفلة ايما دي صديقتها و يروحوا يلعبه في غرفة جدتها عشان زهقنين من اجواء العزاء الكئيبة، و فجاة بيحصل شيء غريب للطفلتين دول و نقطع هتا..
بعد كذا سنة من الموقف دا بنلاقي عدة اشخاص بنمشي مع واحد واحد في خط زمني، وكل منهم بيستلم بطريقة ما خطاب غريب.. خطاب عايز يجمعهم في مكان واحد و توقيت واحد
ياتري مين دول، و ايه علاقة الخطابات دي بيهم، وهل الوضع هيمر بسلام معاهم؟؟
لغة العمل جميلة جدا، متقنة و قوية الألفاظ و التعبيرات اللغوية، الحوار بالفصحى
السرد كان متقن و سلس بالرغم ان احداث الرواية بتدور في الثلاث أزمنة (ماضي، حاضر، مستقبل) إلا ان الكاتب قدر يعمل كدا بدون ربكة للقارئ..
الوصف كان ممتاز، رواية تعتبر بمشهادية عالية جدا.. يعني مثلا مشاهد العزاء بأدق تفاصيلها و اه العمل دا كل احداثه بتدور في دولة أجنبية خارج مصر إذا عادات و تقاليد الدفن و العزاء مختلفة و الكاتب نجح فعلا انه يدخلني في تلك الاجزاء الجديدة عليا بالوصف الممتاز حقيقي ممتاااز
و افتكرني في مشاهد (المستشفى العقلي)👌🥵
شخصيات العمل تعتبر كتيرة نسبيا.. مش اوي بس في كذة شخصية محورية.. و بجد كلهم تقريبا بلا استثناء لهم بناء تاريخي و رسم كويس و دوافع منتقية (ممكن تبقي مجنونة او قاسية لكنها منتقية) حتي الوصف الشكلي لهم كان كافي و وافي انك تكون شايفهم و تتعلق بيهم و تحس بآالامهم و معانتهم النفسية...👌
زي ما ذكرت ان العمل بيدور في أزمنة مختلفة و كل شوية نروح للمستقبل و نرجع للماضي و هكذا مع ابطالنا، و نفتح خطوط جديدة وانت بتقرأ هتحس ان (ايه علاقة دا ب دا و دول ب دول) لكن يا عزيزي انا بقولك ان النهاية جت عشان ترد عليك و تربط كل الخطوط دي ببعض بكل حرافية.. فلا تتعجل النهاية قوية جداااا جدااا
و اقوي جانب في العمل هو النهاية.. صادمة دا انسب وصف ليها
و قاسية و هتخليك بتقول ليه.. بجد ليه😓
و طبعا بما أننا قصاد عمل رعب.. ف مشاهد الرعب هنا كانت مدروسة مش اي مشاهد مبتذلة وخلاص.. مشاهد ترعبك نفسياً.. بالذات مشاهد الجدة
أتصممت بطريقة تخليك تتوجس فعلا
حتي بعض حوارات العمل كانت تحمل شيء مربك
اه والله حوار بين شخصيتين يخوف تصدق 🙂
عمل يستاهل القراءة، متعوب عليه، أتبسط جدا لأني زي ما قولت بحب الرعب و ٩٠٪ من الاعمال في النوع بتكون هابطة و نمطية و ضعيفة.. عكس هنا كان عمل قوي، متقن و فعلا يخوفك.. مش لازم يكون رعب من نوع عفاريت و واحدة طالعة بعين بيضاء و بتنزل د.م من بوقها لا دا انت تخاف من مجرد شخصية بتاعني من الوحدة
