طيب بسم الله الرحمن الرحيم بر الضيف تعتبر قصة مجزأه بمعني انها حكاية واحدة متجزأه علي ثالت كتب لو مش معاك كل الأجزاء متبتدتيش تقرا لأن هيجيلك جلطة بالذات ان كل كتاب بيقفل في حتت صعبة جدأ وقد اعذر من انذر.. يلا بينا...
بر الضيف بيتتكلم عن قرية بتحمل نفس الأسم مجهولة، معزولة لا يسمح للغرباء زيارتها ولا يسمح لأي شخص بدخولها والتجول فيها بعد ما الدنيا تضلم أحداث الرواية بتبتدي لما تبتدي سمعة المدينة تخرج برها وتتسرب عندنا من خلال حدث ما..
طيب انا ايه الي عجبني في الرواية:
أولا: السرد والبيلد اب: الطريقة الي الكتاب مركب بيها الأحداث بتفكرني بالبازل الاول تبقي تايه ومش فاهم هو مين ايه فين وليه وبعدين حته حتة تبتدي الاحداث تقوم، الشحصيات تترابط وتشوف هيكل وقصة بتقوم قدامك من عامود صلب بيتركب لحد ما في الأخر تبقي قاعد قدام بازل مهيبة شيك، مع أعجابي بمراعاة الكاتب لتفاصيل بيرميها كده من اول الرواية عشان يشرحه لك في اخر 15 صفحة في الرواية عشان تهز دماغك في تفهم تام وتقول يا ابن اللعيبة انا كده فهمت ولذلك شابو..
ثانياً: الوصف: اسمحولي هنا اتقمص شخصية يوسف بك وهبي واقول "يا للهول" وصف الكاتب للهلع بتاع المخاليق والرعب الي بتحكيه الأحداث كان حاجة فوق الشناعة لدرجة الي خلت واحدة خيالها نشط زي حالاتي لما قريت الرواية قبل ما انام معرفتش انام في الظلام الكالح المعتاد بتاعي.. مش بس وصف شكلهم لكن حركتهم، صوتهم، ملامحهم.. انا كرهت جملة "العب معايا" الحقيقة لأني سماعها بالصوت بتاع الشخصية حاجة اخر حلاوة بالنسبة لحد زي حالاتي بيحب يقطع لنفسه الخلف في تلذذ ولذلك عجبني الوصف..
نيجي عند التقيل بقي الرعب الموصوف الكاتب بيقدم اكتر رعب بيجبلي انا شخصياً هلع رعب النفس البشرية، رعب نفوسنا وضعفها ووسوستها.. رعب بتاع المواقف الي من عينه يا رب ما تحطني في موقف يختبرني الي بيخليك تنزل من علي كرسي الحكم العالي بتاع الأخلاق الي بنحكم بيه علي حد غلط من بمدأ انا عمري ما هعمل كده..
انا كسارة اتكيفيت وكلت الثلاثية في يومين بالتمام والكمال وبناءأ عليه #سو_ريفيو لثلاثية بر الضيف 4 من 5 وده فقط لبطء الجزء الأولاني من اول كتاب فقط او مط بعض الأحداث فيه ليس الا، لكنه مش البطئ الي خلاني عايزة ابطل اقرا ولكنه بطئ خلاني اقرا اسرع
شابو يحيي صفوت لقد انضمت الي صفوفك قارئة جديدة، تيجي "تلعب معايا" :)
